[情人節限定短篇] 餐肉煎蛋飯，毒撚既午餐: 第二章：Call me 毒撚

唯一無改變到既，就係平凡枯燥既毒撚生涯：返工放工加班進修打機。而E小姐亦有一位感情穩定既男朋友，所以我地只係保持係一齊食飯打機同間中收工後whatsapp交換情報既關係。簡單黎講放工之後我地之間既唯一維繫只有無關重要既打機進度同互送點數，而我對E小姐既唯一感覺就係佢非常隨和，同一般港女唔一樣。


轉眼間差不多一年過去，我同E小姐亦順利成章咁比以前熟絡，話雖如此，亦只係多傾咗少少無關痛痒既話題，而轉捩點就發生係我完成進修後日子。


E小姐某日收工後whatsapp我：


「又打緊機呀？」



「係呀，就回夠點，一個鐘內岩岩好用盡晒就又升呢喇。」

「咪咁毒啦你！」

「你返緊工果時咪一樣，頂你仲升得快過我喇！」

「你呢家放工後同星期六日都唔使返學，淨係掛住打機上網，因住孤毒終老呀！」

「妖！毒撚既浪漫，你明咩?！」



「見你咁可憐，黎緊星期六我同班friend一齊燒野食，到時你都join啦！有好多靚女架！」


我睇到呢度即時呆?一呆，咁有聯誼feel既？同時間對指公好誠實咁打?：


「好，不過唔好咁早喎，我想瞓晏少少。」

「咩呀，比少少男士風度出黎，幫手霸爐呀！」




%&$#?


頂，毒撚命運本該如此。


到咗星期六，我變咗做最早到果個…


點幾兩點烈日當空，明明十月都廿幾三十度，我唯有放底背囊霸位後搵個樹蔭位坐底，拎出我部PSP出黎打芒享…


正當我努力咁用太刀去挑金銀火龍時，背脊比人大力咁拍咗一下，就係咁我就毒已中。




「我頂，無帶解毒呀！」我語帶哀怨地叫出黎，個心入面仲好大力咁屌咗下。


之後一把熟悉既聲音響起：

「喂！毒撚，真係準時喎！」


我擰轉面，見到E小姐大大個燦爛既笑容，同埋佢身後面既三位女性朋友。


「嘩，終於到喇，仲有幾多人呀？」



「你咁心急做咩，黎，等我介紹下先，呢位係短髮既係阿Sue，同我一樣都係長髮既係Ada，最後呢位挷馬尾既係Nancy。佢地幾位都係我好姊妹黎架！」


一時之間彈出幾位女性，仲要比人見到打機個投入樣，真係樣衰到極點。我扮輕鬆咁同佢地say個hi，點知E小姐劈口就用佢響亮既聲音講道：


「呢位就係我同你地提到果位毒撚同事喇，不過佢有名既，叫阿Don。」


「多謝晒喎。」我擠起笑臉對E小姐講，而佢果幾位好姊姊已經係一旁偷笑。


點知係今日稍後會遇到一位對我日後影響甚深既人出現…