[情人節限定短篇] 餐肉煎蛋飯，毒撚既午餐: 第四章：是愛情說謊

唉，反正毒撚成日都得閒，一句yes之後就轉眼到當晚。 

其實我地都間中有放工後一齊行，不過往往都係先經地鐵站既佢走先，淨底我一丁友繼續毒行。當晚係我第一次同佢一齊搭地鐵落尖咀咁遠。 

「今晚有咩人去呀？」我邊上高登邊問。 
「同上次燒野食差唔多，不過你放心，阿爸阿媽唔去。」佢笑住答。 
「你以為我驚佢地去咩… 係呢，你男朋友自己過去？唔過黎接你？」我瞄一瞄佢之後繼續高登，睇唔到佢接下來臉上閃過一抹異樣。 
「佢今晚唔得閒呀。」佢爽快咁答。 
「哦。」 
「人地同你講緊野，你咁hea架。又上高登呀你？唔怪之得你咁毒啦！」 


「咪咁大聲啦，成卡都知我係高登仔喇！上高登無罪架，知唔知高登度有幾多高人奇事…」我落力地解釋。 

之後我開咗高質巴打如“你的樣子如何”既post比佢睇，之後佢笑到肚痛咁滯，最後我仲幫佢裝埋LIHK，方面我得閒用 whatsapp share post 比佢睇。傾下傾下我地就到K房，推開明就見到子明一個人坐係度傾電話，Sue、 Ada 同Nancy係坐埋係個mon前面狂點歌。 

大家say個Hi之後E小姐就走埋去Sue果邊點埋一份，我就坐在係子明旁邊拎咗部電話出黎打機。打打下子明收咗線，之後佢望下我打緊咩game，不過佢似乎唔多感興趣，於是我就問佢： 

「係呢，你有無打開咩game？」 
「都係麻雀game多。」 
「嘩，用腦game，我唔掂。係呢，唔見傑傑既？阿Sue都到咗喎？」 
「岩岩同佢講完電話，話等埋個friend一齊黎。」 


「Friend定女朋友呀？」我講笑咁問。 
「我都無問呀，陣間咪知，你都好去點歌喇，如果唔係成晚都無得你唱呀！」 
「我又無咩所謂，當打發下時間，而且我有佢。」我邊講邊揚咗下我部電話，子明見狀發出會心微笑。 

「你地傾咩傾得咁開心呀？」E小姐突然走埋黎講。 
「無，讚緊你地唱歌好聽啫！」子明笑住應。 

E小姐一臉得戚樣咁話：「呢個就梗啦。係喇毒撚，你今晚點都要唱番一兩首歌呀，話晒第一次出黎同我地唱K。」 
「得喇得喇…」 



講完無耐就見到傑傑帶住個男仔入黎。 

「Hello！佢叫Eric，我個friend。」之後傑傑逐一向Eric介紹，之後我地班男仔就坐底吹水同出去拎野食。 

當大家食咗一兩輪野之後，突然間： 

「好喇！齊人喇！我地玩骰盅！」Sue大叫完之後就去call骰盅同嗌酒入房」 

呀屌，我係個心入面叫出黎，我最怕飲酒，知自已唔飲得，飲完又會眼訓。 

之後玩咗幾round大話骰，好彩我無點輸到。不過大家飲咗少之後玩咗幾round大話骰，好彩我無點輸到。不過大家飲咗少少都開始high high地，講野都大聲咗。 

「咦，到你點既歌呀毒撚。」E小姐嗌出黎。 
「你又知係我點？」 
「咁奇怪無人識既歌無人點架喇，講咁多攸咩，唱啦你，唔使怕羞架！」 



我無佢咁好氣，之後我開始唱歌唔理佢地，心諗仲好可以玩少轉。

當時我係唱：https://www.youtube.com/watch?v=ftfJRzW0MPo