所有小磨擦加加埋埋,慢慢做成我開始抗拒係E小姐屋企逗留同過夜既心理,我理解E小姐好孝順。但最考順既佢,反而受到最不公平既對待。最慘既係佢既家事,我點暗示比E小姐知佢都係當無事發生,咁我都無謂枉作小人。 

畢竟,家人係無得揀既,而男女朋友可以慢慢揀。 

過咗幾個月之後E小姐都開始感受到我既不滿同為難之處,而開始叫我唔好再係佢度過夜,雖然佢有少少失落,不過我除咗搬出黎一齊住之外諗唔到解決辦法。 

可惜既係,我唔止係毒撚,仲係窮撚。 

我同E小姐都要交家用,我屋企都係上有高堂,而且都退晒休仲要無退休金,如果夾硬搬出黎住就只可以租屋,而且要降低生活質素,連一年去一次旅行都唔使諗。更甚既係完全儲唔到錢,如果想要小朋友,更加養唔起… 所以完全打消呢個念頭。 



日子日復一日咁過,我都習慣咗每逢節日都帶埋Ella出去玩,感覺上似自己成家多過Emma同佢老公,而影響亦開始浮現。首先連我都覺得同E小姐缺乏咗拍拖既感覺,始終無咩二人世界既空間,跟住再引申出影響我地親密既時間同機會,始終無私人空間同要帶住個細路係有難度。權宜之計係,連酒店都去過,不過所費不菲,始終都係偶一為之,而每次都係要事先向E小姐屋企人申請幫忙睇住Ella,其實都幾尷尬。 

令情況變得更差既係,我開始要經常返大陸出trip,多數星期四、五晚先返香港。聚少離多,令E小姐開始不滿。但係為份工,我諗唔到可以點,唯有趕到返香港果晚就見面。點知後來E小姐升職開始多野做,有時我返到香港時佢仲要OT,淨係可以陪佢返屋企。 

雖然係咁,我都慢慢開始習慣,最錯既係,我以為E小姐都會明白,會習慣。 

經過一年甜蜜生活,一年家庭式生活同一年聚少離多既生活之後,我追求既係安定,以為慢慢地自然地會有日進入人生下一個階段。直至某日我送完佢返屋企之後一日收到E小姐個whatsapp: 

「我地之間有問題。」 



我當時都未意識到有幾嚴重,以為可以坐底傾下就無事,點知係我仲未反應得切既時候又收到佢whatsapp: 

「我覺得我地距離好遠。」 
「我開始感受唔到你需要我。」 
「我地都係無結果架喇。」 

一連串既字句不斷咁打擊我既思緒同神經,我開始打比佢同whatsapp佢,不過佢已經關咗機… 

我自己一個不斷咁問自己問題,到底邊度做得唔好,邊度做得唔夠,幾時開始變得無可挽救。但身為毒撚既我根本就唔明白,根本唔可以用邏輯去理解女人…