於這個Wtsapp群組中輸入名字，他就死路一條: 其之二十九

其之二十九)
 
在陌生的地方，即使是龍床，也難以睡得安寧。
整個晚上，我都盤旋於夢境與現實之間。
 
「細佬，雖然我哋會分開生活，但我哋始終係親兄弟。」這是哥哥的話。
「你哥哥過咗身之後...我開始覺得你爸爸之前講嘅嘢好似有啲道理。」這是媽媽的話。
「我係效外有間小木屋，用黎畫嘢，但其實仲收埋咗啲嘢，係我依世人最大嘅發現，到我老死後會留俾你哋兩兄弟。」這是爸爸的話。
 
才早上7:00am，人已經清醒。




還記得昨晚與一懿閒談之間，她先睡著，隨後響出樂平的電話，內容大約是陳仔那邊有回覆，說待中午時間約三點見面，地點待定。著我們先休息，他們明早會帶齊裝備來醫院會合。
 
梁一懿顯然身心疲累，依然深睡，一動不動。我不好意思打搞，自行作簡單梳洗，雖然樂平已「搭通天地線」，但還是難料當醫生護士進來為我換藥與巡房時，會如何看待這位小姑娘。
 
在看見自己滿面鬚根時，卻發現鏡子反照出門牌的字眼。此時我突然想起：「我係病人，所以有名字...同時間，樂平係醫生，佢嘅名字應該更易搵到先啱。佢講過自己會喺醫院做下當值醫生，又有到診所應診...咁...」
 
這個想法只是剎那間，昨天沒想到皆因太多事同時發生。但睡了一覺，思路似乎較清醒，同時間我又反問自己樂平會犯下這些錯誤嗎？如果他的名字曝光率這樣高，他應該會隱藏自己身份吧？加上以當下而言，他對我們有恩，亦非敵人，調查他的名字並不首要。
 
這間醫院也許充滿他的耳目，我貿然調查，或問其他人的話，可能樂平會立即知道，到時不利的就是自己。要記得，我可是連電話都不在手。
 




基於這些原因，我將此想法先收於心底。
時間只是9時許，但樂平與阿空已經來到病房中與我們合流。
而一懿亦醒了來過。
 
「兩位，精唔精神呀？」樂平心情不錯，是對今日的計劃滿懷信心？抑或昨晚與阿空達成了一些「共識」？
 
一懿伸展筋骨：「好精神就未算，起碼訓咗陣囉。」
阿空走到一懿的身旁：「嚟食啲嘢先啦，我哋買咗早餐呀。」
而樂平則將一部手機拋給我：「江生，你部新電話已經送到！用住先啦，今日阿空一定可以完成任務，到時先還返俾我啦。」
 




我心想他們那來的自信...但看見阿空氣定神閒，又不似太緊張。
 
「不如講下今日嘅計劃啦，我雙手短期內唔會100%康復，但行動自如，之後keep住食藥同復診就算數。」我為免他們擔心，特地說出自己情況。
 
樂平咬著麵包說：「一路食一路講啦，對面話今日三點，地點待定。但我哋當然唔會坐以待弊啦。到時3點，佢哋一定會Suggest一個偏僻地點，唔帶埋啲電話黎，仲有機會持住人多捉走埋阿空。而我哋嘅優勢係知佢哋係邊。所以大約一點至兩點鐘，阿空會直接踩上個巢穴度談判，殺一個措手不及。」
 
阿空在旁點頭：「一切喺佢哋預計之外，而且兩點鐘，佢哋應該都喺老巢合流，手機一定齊全。再者佢哋連所在位置都俾我掌握到，自然會覺得我有機會知更多嘢，我就可以再兇下佢哋，令佢哋唔敢貿然出手，要心平氣和同我傾。」
 
「嘿，你叫阿空，唔係叫阿兇呀...嗰班人一直喺刀口邊過生活，會唔會咁易俾你兇到呀？」我認為他們想法太單純。
 
阿空眼神堅定：「如果佢哋嘅生活叫刀口，我哋依幾日嘅生活就係阿修羅地獄。我諗大家經驗值都係咁上下。佢哋殺一個人，可能要斬十幾刀，仲要祈求醫生唔好救返佢。而我哋呢？打個名就將佢哋Game Over，喺死亡面前，佢哋只係微不足道。」
 
我喝下這杯溫熱的洋甘菊，希望這不是我倆的「最後早餐」吧。
 
「另外，我哋三個都會隨阿空去到巢穴附近待命，但有咩事嘅衝上去救人只有我同懷禮，一懿你嘅任務只係觀察，即使我哋出咗咩事，甚至俾人殺咗，你都要即時離開。你嘅《亡選》係我方最後籌碼。」樂平再說。




 
一懿卻不贊同：「唔得！共同進退！」
未待她說完，樂平立時用比較重的語氣：「唔好扭計！如果我哋兩個男人要衝上去，即係阿空處境極危險！我哋拎哂刀衝上去。你一個女仔幫到咩手？我哋無辦法照顧你。加上如果四個俾人捉哂，就死硬。你仲喺外頭，就有辦法救我哋。」
 
 
她沒再反駁，樂平模模她的頭，將一個小布袋交給她。
「我們出事的話，照辦就可以。」他說。
 
時間將近11:30am，
「好。我們出發啦，先到現場觀察一上地形，因為陳仔今朝嘅位置有變，睇黎佢哋每日都會轉移陣地，的確小心至上，阿空，對手唔差呀。」樂平說得輕鬆。
 
阿空無甚表情：「對手唔差，但我哋更高。」
 
我的視線與阿空對上，她以口形說出一句：「唔怕死嘅人，唔只你一個。」
 




 
「出發吧，地點是沿海村屋，大埔汀角路。」樂平一聲令下，能否奪回手機，全看剩下這幾個小時。
 
PS.下一章於明晚深夜更新！！！