我參加了籃毛毛演奏會: 不知所蹤

話就話要去搵呀怡佢地，但係點都要同大叔會合咗先。
我睇一睇錶上面既時間，只差五分鐘就係十二點半，行定落去樓下都差唔多啦。
我同綠毛毛講，

”我落去樓下搵一個人，可唔可以同我一齊行。”

綠毛毛佢揮手兼擰頭，表示佢唔想出去。我又講，
”咁我萬一比其他毛毛捉咗，咁H漫就冇嫁啦喎。”

綠毛毛立刻開門，同我一齊出去。而我係出門口之前，我笠返個粉紅毛毛套裝，為防被其他毛毛捉我。





果然，一打開房門，就見到有一班毛毛係度遂間房拍門搜房。
原來，我為咗避開藍毛毛佢地而跑咗去毛毛佢地住房既樓層，真係幾諷刺。
走火通道就係負責檢查房既毛毛身後，要前往走火通道，就代表要經過佢地身邊。
正當我行到去負責檢查房既毛毛佢地既身邊時，突然，有其中一隻毛毛拉住我！
拉住我既係一隻橙毛毛，佢同我講左聲
”媽咪～”之後，就開始對我全身咁打量，而綠毛毛既樣就顯露出一幅抗拒既表情。
正當我望住橙毛毛既雙眼，發現佢呈現住色迷迷既眼神！究竟...佢會對我做啲咩？

佢露出一雙肥厚既手掌伸向我，但係我唔可以避開佢，一避開佢可能就會發覺我有問題。




佢一野渣咗落我既屎忽到，一邊係到叫
”媽咪”，之後仲舉起埋手指公讚好。
而綠毛毛都尷尬咁樣笑咗幾吓，答返佢”媽咪...”
如果我冇估錯，應該係橙毛毛佢當咗我係真正既女性毛毛，跟住對我毛手毛腳，不過，咁樣比佢渣法，真係都幾核突。
而橙毛毛都讓開咗條路，我同綠毛毛就咁行咗去走火通道，去到約定地點等大叔黎。

－－－－－

十二點半，大叔仲未到，佢係唔係又諗住喱埋係第二度跟住彈出黎講”Surprise”？
不過係哩一個緊張關頭，我諗佢都唔會咁無聊，或者可能真係大叔遲到。我同綠毛毛講，





”綠毛毛，我果位朋友可能要遲少少先黎到，所以我地不如再等一等啦。”

既然橫掂都係要等，不如同綠毛毛佢傾吓計，因為，我真係好好奇佢地係啲乜野。

”綠毛毛，其實你係咩黎，係怪物定係人？”

綠毛毛佢突然發嬲，一手捉住我條頸，我話
”對...對...對唔住，我唔應該話你係怪物，咁...咁...咁你係唔係人？”

綠毛毛佢鬆開佢隻手，好似深思緊哩一條問題，而我都要慢慢抖一抖條氣，因為啱啱真係好大力。
佢舉起雙手，擰一擰頭，好唏噓咁講咗聲
”媽咪...”

咁即係代表佢地連自己係咩都唔知？咁我又問佢另一條問題啦，




”綠毛毛，其實你知唔知自己點黎到哩一個世上？”

佢又再一次擰頭，而藍毛毛佢地既秘密就愈黎愈充滿神秘感。
”點解你地要捉我朋友？”

今次，綠毛毛佢好堅定咁望住我，講咗聲
”媽咪～”

其實我都分唔清佢係講緊佢地既語言，定係真係答緊我問題，
如果佢係答緊我問題，咁哩一個”媽咪”又會係邊個？
當我望一望綠毛毛個樣，佢好似仍然深思緊自己係咩。氣氛都好彊硬吓。咁我就轉換話題啦，

”綠毛毛，我問你一條問題啦，好簡單既姐。
咁你呀媽就生左個仔，而果個仔既呀媽就有一個呀哥，咁佢呀哥同佢老婆又生咗一個仔，
而佢果個仔就有一個表哥，咁呀媽個仔要叫佢表弟啦，咁叫表弟佢呀爸既細妹要叫咩呢？”





綠毛毛都比我哩一條問題攪到好混亂，只見佢不斷擺出諗野既姿勢，
而佢跟住擰一擰頭，表示唔識，講咗聲
”媽咪...”之後好垂頭喪氣，不過，我點都估唔到佢真係答啱咗我條問題...我就話啦，

”你答啱咗啦！好勁呀你！”

跟住綠毛毛就好神氣咁笑，氣氛又再次好返起黎，而我同佢就賞試不斷打開話題，
雖然佢剩係識答”媽咪～”。


"十二點四十七分...點解大叔咁耐都未黎嫁，唔通今次真係出咗事？”我望住隻錶正在煩惱緊。

而眼前既綠毛毛都開始顯得有些少唔耐煩。我唔等大叔啦，於是我係褲袋到拎條鎖匙出黎，係牆上刻住
”大叔，我行先一步，我地一個鐘頭後係度再等過，即係一點半”。





而家，我就會同綠毛毛前往呀怡佢地既地點。