而家距離計劃仲有十分鐘,行去十六樓只需兩三分鐘。
照我估計警察都應該黎到,不過估係無用,要有根據先得。
我從褲袋中拎出失而復得既對講機,黎一次竊聽風雲。

”唦...唦...狗仔隧果邊咩情況...Over。”

”陳SIR,有三名男子啱啱係興偉大廈門口落車。”
佢地而家行緊去大廈入面,門口個看更上前查問緊佢地。Over”

”好,衝鋒隊果邊準備好未?Over”





”Team Alpha Bravo Charlie Delta,Reporting In”

話咁快我已經去到十六樓果層,而家等既就係等警察去二十樓將大嬸佢地一網打盡。
我伸出頭從防火門既玻璃窗視察一下十六樓既情況,見到有五隻毛毛係到把守。

”陳SIR,佢地啱啱入咗電梯。Over...”

”好,佢地交易既時候我地就上門拉人,Over...”





黎啦,佢地終於黎啦!真係好緊張!
放係手袋既Nokia手機無端端震動起來,我睇一睇,係大叔佢打過黎。我接過電話,問
”喂,大叔。”

傳黎既並唔係大叔既聲音,而係大嬸既聲音。佢話
”仁,去接泰國佬黎。”
哩一個叫「仁」既人究竟係邊個呢?莫非就係之前演奏廳謎之男人其中一人?

過咗一陣間,電話傳出開門既聲音,大嬸好高興咁話
”表弟!沙嘩Dee級...沙嘩Dee級。”





傳黎既係另一把男人既聲音
”沙嘩Dee級...媽咪麵?”

”咩貨式?”

”荀野奶。”

”香港冷不冷?”

”好凍呀...”

”嘩!廣東話都識你咁犀利?哈哈哈哈。仲夠你玩既真係...犀利犀利犀利,勁呀!”

正當大嬸果一邊講緊野既時候,警察果邊又開始講野啦。對講機傳黎




”陳SIR,有個男人拆開咗包粉,將佢倒去檯面,而家吸緊啲粉,Over...”

而電話又出現另一把男人聲,應該就係大嬸口中既「仁」,即係警察從遠方監視到既人。
呀仁好大聲講咗句
”AA+!”

當大嬸聽到呀仁哩句話後,好開心咁講咗句
”彈屎太(成交)!哈哈!”

而對講機果邊同時傳黎通知
”手足,拉大隊上去!Over!”

過咗十幾秒之後,十六樓既警報器響咗,
負責把守既毛毛都準備撤退,佢地強行打開電梯門,全部擠身哂係電梯槽到。
十六樓既走廊回復一遍死寂,我就趁哩個機會沖入去困住呀怡佢地既房間。





不過,受過一次教訓,我唔會再犯第二次。我知道哩一道門只係出面先入到黎,
所以我就搵咗部Nokia 3310頂住度門,貪佢夠哂硬,等佢唔好閂門。
而且,我計過嫁啦,Nokia 3310既密度再加上跌落地下既速度,
所發出既聲響足以夠我三秒之內面向大門,到時有邊個入黎我一定知。

我推開大門,立即同大家講
”大家,今次我又返黎救你地啦!”

但係,大家卻用絕望既眼神望住我...唔通佢地以為我會重複上一次既失敗?
突然,揚惠係我旁邊彈出黎。佢同其他人唔同,佢帶住充滿希望既眼神對我講
”果然我冇信錯你...你終於返黎救我地...”
之後佢伏係我肩膀,不斷痛哭,好似有啲野想同我講又講唔出。我問佢
”到底發生咩事?”





”呀怡佢比毛毛佢地捉咗...”

”吓!?你講咩話?”

揚惠講完之後,喊得更厲害,佢含糊不清咁講

”廣...東...話...”

”屌,我知你講廣東話。咁允行呢?
毛毛捉呀怡果時佢冇幫手?”

呀強行過黎問我,手都震埋,指住遠方既允行
”佢已經痴咗線...”

遠方既允行,對住道牆大叫




”Chris Wong!Chris Wong我知你係入面,你快啲出黎見我!
你睇吓我!我左腳可以掂到左手!快啲同我寫返個英文report記錄哩件事!
之後同我去西伯利亞打邊爐!我同你講,我到時食魚要走肉!”

雖然允行係我既情敵,但係見到咁樣既允行,都有種可惜既感覺。
我同揚惠仲有呀強講
”你地帶啲人離開哩度先,去到樓下既時候應該會有警察係到,
到時將你地比藍毛毛佢地捉既事一五一十話比佢地知。
而我會返去救埋呀怡。”

呀強好唏噓講咗句
”你睇下...個個都已經冇信心可以走出哩一度。連你入黎都唔理你。
你望吓個呀伯,自從佢被毛毛打敗咗之後,就廢咗自己武功,而家只係一個普通既呀伯,行步路都仆親。
你再望下個鬼佬Dicky,佢同索女分手之後,就一路係度唱側田果首《KONG》,你睇吓,又黎料啦。”

”縱是遺憾收場 都必需跟你明刀明槍!”

見到咁既情況,我實在睇唔過行,我同大家講
”大家留心聽我講,而家你地仲唔走就冇機會嫁啦。
你估我唔想走嫁?但係我知道大家仲係到,我先返黎救你地!”

呀伯行過黎同我講
”走?點走呀?行行下又會比毛毛佢地埋伏!我唔會中第二次計!”

其他既旁人都加把口
”係囉!”

”今次會冇埋伏嫁啦!信我啦!警察已經黎到,毛毛佢地都唔敢出黎住。”

我見大家仲係好似唔相信我,我決定講一個故事比大家聽
”從前,有一個肥仔跌落渠到,之後佢叫朋友幫佢。
但係大家冇幫不特止,仲要影住佢,問佢「吓...點幫呀...」。
而肥仔佢冇放棄,佢潛返落水搵返屬於佢既野,幾經辛苦爬返上行人路。
我想同大家講既就係,無論一件事幾辛苦,都有成功既時候。”

大家聽到我既一番話之後,個個都企起身,眼神又充滿番希望。
我同呀強講
”呀強,你做頭,從走火通道果邊走。”

”唔得,我唔可以拋低我既好兄弟。”

估唔到陳強都有咁型既時候,我實在忍唔住要攬住佢。
而揚惠都行過黎攬住我地,佢話
”救呀怡又點可以差我。

揚惠真係估唔到...我估唔到佢真係咁撚大力。
而索女行過黎同我地講
”你地去救你地既朋友啦,我地會知點走嫁啦。”

傻咗既允行指住我地
”你走啦!我唔想攪大佢呀!”

於是,我地就兵分兩路,一組逃脫,一組營救。


臨分別之前,索女問我
”你有冇電話係身?藍毛毛佢地搶哂我地啲電話,我有緊要事要用一用。”

從我係情場既經驗睇黎,佢已經鐘意咗我啦,因為佢用埋哂啲古老既橋問我拎電話。
不過,我來者不拒既...

索女佢登入Facebook,無端端對住大家玩自拍,之後仲要打埋卡。
我頂,佢唔係鐘意我,只不過借我部電話滿足佢港女性格。佢話
”攪掂!Bye!”

”等等!我可唔可以問你叫咩名?”

”我仲未登出我Facebook,你自己睇啦。”

索女跟隨住大隊落緊樓下,而我、呀強同揚惠就準備行上樓上,去搵大叔,
睇下佢咩情況,之後再為拯救呀怡從長計議。
係哩個時候,我望住部手機,睇一睇索女叫咩名,
原來,佢個名叫「Shiga Li」...