行緊上二十樓既時候,我拎出Nokia手機繼續聽一聽大嬸果邊發生既事情。
”陳SIR,仲有幾箱白粉係度,大概值十億到。Over...”

”哈,今次我仲唔升識?十億白粉咁大單案都比我破到!同我Call定記者都得。”

”陳SIR,等一等。果批貨好似唔係白粉。
啱啱我試咗一啖,有種似層相識既感覺,原來係媽咪麵既調味粉。Over...”

”你講乜春話!?”





果然如計劃所料,當啲警察發現果批並唔係白粉既時候,應該就會撤退。
但係,當警察佢地見到一大班人逃走既時候,就會問過究竟,到時就會返去十二樓。

對講機果邊傳黎大叔既聲音
”細路,你而家係邊?”

”行緊去二十樓搵你,做咩事?”

”千奇唔好上黎!發生咗啲好奇怪既事!”





”啱啱班警察每個人都試完啲粉,之後個個都暈哂係地下,就好似你之前變毛毛果次咁。”

揚惠笑笑口望住我講
”唔怪得知你多咗咁多毛,不過我唔介意,我好鐘意多毛既男人。”

嘩,我即刻打咗吓冷震,我問大叔
”我有個朋友比藍毛毛佢地捉咗,我而家唔知佢係邊。”

”總之你唔好上黎!”





突然,Nokia果邊傳黎慘叫聲
”呀!好痛苦呀!你做過啲咩黎?”

大嬸一邊奸笑一邊講
”哈哈!只要哩一批貨流出市面,整個香港都會改變。
到時我個仔一定好開心,以後都可以唔洗攪咩藍毛毛演奏會!”

我拎起對講機問大叔
”你而家安唔安全?”

”恐怕唔係幾安全...佢地望緊我...唦...唦...”

大叔發生咩事!?計劃唔通已經失敗?






雖然大叔同我講唔好去二十樓,但係我地已經行到十九樓同二十樓之間。
去二十樓只不過差幾步,即使唔入去,都可以從門口睇吓到底發生咩事既啫。
不過,陳強聽完大叔咁講之後,神色顯得都幾慌張。佢話
”不如我地等埋啲警察黎到先上去啦。”

我同大叔話哂都叫做出生入死,唔上去睇吓又好似不合情理,所以我回應呀強,
”等埋警察的確係一個唔錯既方法,但係等埋警察可能好快,都可能好慢。
短短幾秒或幾分鐘都可以發生重大既事情,而且,我地只不過係防火門既窗口望一望咩情況。”

陳強聽到我講之後只好繼續同我地一齊行。
而佢一路行,就一路口噏噏話
”千奇唔好出事...千奇唔好出事...”

再行多幾級樓梯後,我地發現有血由二十樓地板開始流落黎,順住階級,流至我地既腳邊。
呀強見到之後就爆咗句




”你地係都唔聽話,出事嫁嘛!”

我地再踏前多幾級,發現二十樓有兩個便衣警察倒臥係血泊之中,
而且,仲有一隻著住警察制服既黑毛毛伏係牆邊,
身上有多個子彈窿,傷口流緊血,睇黎都係奄奄一息。

話哂我地都係第一次見到真正既死屍,真係嚇到暈暈地。
陳強已經行埋一二邊係到嘔,而揚惠雖然都好驚,
但都不忘借啲椅攬住我一路抽水,一路講
”點解睇落去你唔驚既?”

”其實我心入面好驚。但係如果我表現出不安既樣,大家唔係會更加驚咩?”

揚惠聽到我講之後,用一個好祟拜既目光望住我。
我再望一望地下,發現地下已經濕哂,唔通我真係攪到揚惠咁興奮?





咦?點解我塊面無端端都濕埋既?
等等,啲水好似係天花板滴落黎,我抹乾面上果滴水,抬頭望住天花板,
陳強同揚惠都望上去。我地三個異口同聲講咗聲
”Oh...Shit...”