無啦啦有兩條女同左我一齊住: 43

43

搭緊西鐵果陣
我都展現gentleman風度,幫佢地拎野
「唔該哂呀阿池,你生日都要你拎野」
「唔緊要...」
智詩:「緊係要啦,你係男仔黎架嘛,d野又咁重」

我:「做乜你地兩個...今日著成咁呀?」
阿白:「咁你今日生日嘛,我咪同智詩扮靚d囉」




「智詩...你都肯著到咁?」我上下打量智詩
「咩..咩喎,咁.阿白話你生日嘛....你再昅丫嗱?打..打死你架」
阿白細細聲響我耳邊講:「係智詩話要著到咁架」
智詩紅哂面咁:「喂呀阿白..」
「智詩,你真係唔似會肯著到咁喎...」
「有..有得比你望就望啦,咁多野講!」

搭左一個鐘車,終於到左迪士尼站
再轉果架R8,就去到迪欣湖





個景都幾靚,塊草原都幾大下,不過已經好多人
雖然今日熱少少,不過太陽都唔曬
又有D風咁,都適合出去玩

我:「嘩,原來呢度都幾靚架喎...又有海,一陣可以玩海上單車喎」
「快d搵位啦,好肚餓呀!!!」
「咁我地霸左位先啦」
好彩我地搵到個樹陰靚位,之後我地就開始擺陣

我:「阿白,你地整左d咩食呀?」




阿白係咁拎d餐盒出黎
「有雞翼啦,有菠蘿腸仔啦,有三文治啦,有壽司啦,仲有....」
「嘩...阿白你連壽司都識整咁勁既?」
阿白拎起一舊壽司,示意餵我咁:「嗯,阿池你試下丫,呀...」
我食左一啖:「嘩又幾好味喎..」
我留意到,有舊手卷包到特別核突
「...點解..有舊手卷包到咁既?」
「係咪智詩你包架..?」
智詩面紅紅咁:「做.咩呀..係包得核突d姐..你點都要食架!」智詩係咁隊埋黎質我食
味道係就係冇乜分別,不過咁既賣相真係嚇死人

阿白拎起塊三文治黎食,我留意到..
「咦,阿白..做咩..你食緊果件三文治有蕃茄既?」
「係喎,阿白你唔食蕃茄架喎..做咩...」
「果次阿池見到話我偏食唔好嘛,咁..我咪試下克服佢囉..原來都好好食架...」




原來,我都幾大影響力

食食下,就有一大班後生仔黎,仲要坐響我地前面
成班有男有女咁,好似好happy咁

智詩留意到我望住佢地
「喂,阿池你做咩睇住佢地呀?你昅緊女呀?」
「唔..唔係呀...只係諗起d野姐」
阿白:「咁..阿池你諗緊乜呀?」
「以前我好驚響街撞見呢d一堆堆既mk仔mk妹」
「吓,呢堆都mk..後生仔黎咋喎,睇落咪最多year1..」
「頂,咁我係毒撚黎嘛...果d打扮少少既後生仔我都當mk架啦..」
「每次見到呢堆人就會忽然好自卑,會覺得自己響佢地面前係一個柒頭,毒撚咁」
「不過,今日,已經冇呢種感覺」
「因為...有你地兩個響度嘛,以後我都唔會再驚架啦」





講完呢句,阿白同智詩個樣好似怪怪地咁
「喂你地做咩咁既樣既?」
阿白挨落我大脾上面:「冇..冇野呀」
智詩就挨落我膊頭度:「阿池,聽朝我地就要...」
「嗯,要搬丫嘛,放心啦,屯門果度都唔差丫..」

對面既果堆後生仔開始留意到阿白同智詩,牛咁眼咁昅住
佢地個個都好似好嬲咁
「哈,酸呀?」我果陣心諗
不過佢地果邊d女仔個樣仲嬲

食多陣,傾下計咁,都過左成個下晝
智詩:「喂阿池阿白,不如我地玩下水上單車囉」
「好呀,我咁大個女都未玩過呀」




「好..好囉」
之後我地比完錢就開始玩

點知
「踩快d啦阿池你未撚食飯呀?1212隻腳呀!小兒麻痹呀你?」
屌,原來智詩一味得個坐,要我同阿白做阿四
「喂頂你,係你話玩架喎,點解你就響度坐,要我同阿白踩喎...」
「我就係想試下你服待我之嘛!阿白唔好幫阿池啦!等佢做我地司機」
「邊得呀,阿池生日唔好要佢咁辛苦啦..我同阿池一齊踩仲..sweet啦」
我地咁樣三個坐住同一架水上單車,又真係幾浪漫既..

快樂不知時日過,同阿白智詩已經玩左成日
阿白:「嘩,原來都六點幾架啦...不如我地去食飯囉...」
「好呀..咁阿白你地想去食咩呀?」
「吓,但係阿池你生日喎...」




「唔緊要啦」
「唔....」

智詩鼓起個嘴:「喂你淨係問阿白,唔問我架!」
「咁我問埋你囉,你想食咩呀?」
「嗯....」
我:「不如食...花園餐廳啦..」
「吓又食?」
「咁...大排檔囉!又有得隊下啤咁!」
「好..好囉...」
「阿白呢?」
「ok呀,最緊要阿池你鐘意!」
「智詩你學下阿白啦!又就得人」
「咩喎..咁我係咁架啦」

因為我地都唔知出面有邊間大排檔好食
所以唯有on99咁返去元朗食

一坐低,個伙記已經話:「喂,靚仔,兩位靚女又係你地呀!」
「係呀...你記得我地既...」
「緊係啦,你兩個女朋友仔咁靚...」呢句明顯冇惡意,係出於問候果d語氣
智詩:「嘩咁比面呀!」

點埋菜之後,d餸就好快到
阿白飲左啖啤酒:「阿池呀,你記唔記得呀...」
「我地第一日一齊住果日..就係黎呢度食飯架啦」
「嗯...我都記得,果陣我同智詩仲係水溝油咁..」
「緊係啦,你果日響巴士站個樣幾咸濕呀,實對你有防範啦...」
「邊忽咸濕呀..果陣我真係想關心你地架咋」
「不過..時間,真係過得好快...聽日,我地就要搬走啦..」
一講到呢度,只見阿白同智詩苦口苦面咁
我拍拍佢地兩個「唔駛咁灰喎...聽日之後我地咪當開始新生活囉」
「嗱,我地為聽日開始既新屋,新生活飲杯!」

返到去都係9點幾
阿白就話:「阿池你沖涼先啦...」
「吓..點解既?」
阿白同智詩推我入去:「你唔好理啦..你快d沖啦!」
我心諗:做乜鳩呀

沖完涼一出黎
嘩屌,做乜鳩熄哂燈呀
「喂,阿白,智詩,你地去左邊呀?」

刷!
忽然我聽到後面有開門聲
我擰轉面

見到既係,


蠋光
「happy birthday to you...happy birthday to you...happy birthday to 阿池...happy birthday to you!!!」

阿白同智詩兩人一齊講:「阿池!22歲生日快樂呀!」
呢一刻真係..有d眼濕濕...

我即刻去開返燈
阿白同智詩都著返上次去ball果條裙,一齊捧住個生日蛋糕
「嘩,你地做咩..著到咁呀?」
「生日party嘛,即係著得靚d啦」

我睇睇個蛋糕,係上次我同阿白整果個藍莓cheesecake
「個蛋糕...」
「係阿白今朝早起身整架」
「多謝..阿白」
「唔駛客氣啦阿池...阿池快d吹蠟燭啦!」

嘩有成22支蠟燭
我吸一口氣,大大力吹熄哂佢
「好野!!!!!」

「喂,食蛋糕啦..」
智詩:「唔好住啦,你坐低先啦」
我坐落梳化度:「做咩呀」
「阿白準備好未呀?」
「...嗯..」
阿白同智詩各遮住我一邊眼
做乜呀,冇啦啦...

啜!!啜!!

吓?
兩邊面響同一時間比阿白同智詩錫左啖....

我仲未回返神
阿白好似面紅紅咁
智詩:「嗱,我同阿白呢兩下birthday kiss做生日禮物夠唔夠重手先?」
「多..多謝你地...我都.好耐冇試過有人為我慶祝生日」我開始有d眼淚流出黎,因為真係好撚感動
智詩即刻恥笑:「你唔係掛,咁大個人仲流馬尿?!」
「咩呀?我果次贏比賽你都喊啦」
「邊...有喎!」

雖然聽日就要搬走,不過呢一刻仍然好warm
「以後仲有大把機會食阿白既蛋糕」
「以係仲有大把機會三個人一齊慶祝生日」
呢一刻既我的確係咁諗