遺傳的眼: 第五篇～黑影的路

喺漆黑嘅環境下無論身處喺邊度，
甚至乎喺屋企，都會難免令人產生恐懼，
更何況係喺街。不過我知道有人係唔怕黑嘅，但如果你由一條平時行慣行熟嘅路，
變到好黑，黑到有種陌生嘅感覺，
你會唔會有一點點怯呢？

呢件事係發生喺我有一次踢完波返屋企
嘅時候，順帶一提果時係屬於盂蘭節嘅月份，雖然未到盂蘭節，但外面明顯比平時
熱閙好多，而且亦都係我自開眼以離
第一次嘅農曆七月。





但身為一個足球員，雖然唔係話職業級，
唔係學界比賽，只係踢下街波，
但基本練習一定要，
我相信總有一曰我可以踢出香港
（利申：最後做左廚師?）
我出去踢波，阿爸平時都唔會出聲，
今次竟然主動叫我小心d，
就好似大家惺惺相識咁，事不宜遲，出發！
到步大概夜晚8:00，




踢嘅期間其實都見到唔小黑影，
但都唔係問題嘅，習慣成自然，
只要唔係太反常都唔會怕嘅，
踢到12:00，踢完波成班人去m記食d野吹水，吹完水，望一望電話都成3:00，
係時候返去，大家好好人咁送我去撘車，
通宵巴果然係唔同d，'撘順風車嘅'相對多，
平安無事咁到站之後，我仲要行一條好長嘅路，初頭行嘅都係喺大馬路格離嘅行人路，
所以基本上光線好充足，
我都冇咁驚（小編好怕黑），
但係中途有段L字形嘅路，




路嘅兩邊分別有三間學校，
同埋有d唔係太高嘅樹，
光線大部分都比樹蔭擋住，
呢條路行過咁多次，今次係最夜、
最靜嘅一次，時間係凌晨3:30，
我離遠已經感覺到唔多好，
喺右邊嘅學校門口有一隻d毛好有光澤嘅全黑嘅貓坐左喺度望住我，好可愛，
突然間我聽到左邊嘅學校有d好詭異嘅
籃球拍球聲，其實我覺得3:30有人偷偷地
入學校打籃球唔出奇，
但當時我都可以好肯定d拍球聲唔係人為嘅，
因為我感覺到，但值得一提嘅係個拍球嘅節奏（拍⋯⋯⋯拍⋯⋯⋯拍⋯⋯⋯）好機械式，
同埋正常格咁耐先有第二下聲，
姐係應該係好高跌返落離好大聲至係，
但係一d都唔大聲，好奇之下我望左入去，




我見到有八個小朋友size嘅黑影手拖手咁圍左一個圈，而中間嘅竟然唔係籃球，
竟然係一個頭向地嘅黑影，原來果d啪啪聲係佢個頭落地嘅聲，而且佢唔係彈返起，
佢係落地果下入左去地下喺空中再跌過落地，望到咁嘅情況我有d怯，打算走嘅時候，
果個黑影突然停左喺空中，
用左唔夠一秒嘅時間沖過離喺我面前消失左，本能反應下我跳後左一步，合左合眼，
?面嘅黑影唔見哂，我真係好驚，
打算即刻轉埋個彎行埋呢條好黑大概有50米嘅直路就可以出返好光嘅大馬路，
當我起步一轉彎嘅時候我聽到後面有高根鞋嘅聲同我同步咁行，而且有微量嘅感覺喺後面，

有野跟著我⋯

我第一個反應係行快d,
因為我第一次比野跟著，
加快步速嘅同時果d高根鞋聲都好有規律咁跟住我，而且愈離愈近，
佢好似無視左我嘅直線加速咁，




聽落去係用同一個步速但係同我嘅距離反而短左，行左一半嘅路程，
呢個時候我大膽咁博左一博，我停低左，點知佢都停低左，

路見不平，跋足狂奔！

竟然冇跟著，當我以爲我甩左佢嘅時候，
我就係終點面前突然比一股力拉左一下，
唔算大力，但本能反應我停左一停企定左，
同時間我背脊後面立即有股好強烈嘅感覺，
好似有隻手由頸向下索到落屁股咁，
然後成個貼實左我，
第一個感覺係比佢貼住嘅位好凍，
然後我先識得起跑，終於成功逃脫。

跑左幾步我回頭望一望，發現佢唔係黑影，




係一個好接近人嘅形態著住紅色長裙嘅女人，髪形，輪廓都分得好清楚，冇表程，
唯獨是有一樣野可以清楚分到佢唔係人，
佢係冇腳嘅，
但係佢下面有一對紅色漆皮嘅高根鞋，
另外果隻黑色嘅貓坐左喺佢格離同佢一齊望住我，我已經頂唔順，
恐懼感令我用左生平以離最快嘅速度狂奔，
終於返到屋企。

小弟開左一個同步嘅ig:Theyallaroundyou，希望大家多多支持?