《香港革命軍首部曲：洋紫荊共和國》: 第三章 人質
第三章 人質
「哼！都唔知你哋點做野！」特首拍檯怒吼。
「特首，係暫時情況下係無可能攻上島……」保安局局長說。
特首咆哮：「咩嘢叫無可能？你哋唔係唔知呢單野已經變咗國際新聞，中央最忌就係呢啲叛亂分裂嘅事，你哋竟然搞咗咁多日都未搞得掂？食屎大嫁你哋？」
政務司司長答話：「特首，不如我哋搵網路安全中心嘅人幫手，hack入去島上面嘅系統，再關閉佢哋個系統。」
「好！呢個主意好！保安局快啲做野！」
網路安全中心收到一哥的命令，要入侵石鼓洲的國防系統。
「唔得喎。」那人說。
那人上司呆了一呆，「咩嘢唔得？叫你做就做啦！」
那人接著說：「嗱，首先唔係話hack就hack到，再講，我早幾日已經試過連接上去個島度，點知發現島上面嘅系統根本就無同互聯網連接。既然無連接，我想問下你又點hack到入去呢？」
上司呆若木雞。
「好，為咗避免比人入侵系統，成個國防系統都係無連接到互聯網，不過我安排左三部國防系統外嘅電腦係可以連接到互聯網，而且仲有一間房提供wifi服務。」我解說給各人聽。
我接著說：「不過呢啲都唔重要，最重要係黎緊人質嘅移交安排。」
王冰萍舉手發問：「關於人質嘅安排，我想問下大家有冇共識？」
女班長說：「我哋不如黎個投票，睇下要點處置班人質。」
「我動議拎佢哋黎同政府交換物資或者一啲對我地有利嘅條件。」阿輝說。
林恨凡（煩人）說：「UM…我諗為咗我地公國既形象，應該無條件交還人質，如果唔係會比人攻擊我哋，將我哋形容成恐怖份子。」
阿輝想了想，同意的點點頭。
我右手在眼前掃了幾掃，在google glass內開啟了一個投票app。
「現在請各位透過google glass進行投票。」我說。
「投票將以記名形式進行，請選出自己嘅決定。」
在場包括我在內總共有十人，在三分鐘的投票時間內，各人都很快作出了自己的選擇。
「系統，將投票結果顯示出黎。」
『投票已完成，投票人數十人，棄權票為零。選項一，以人質換取利益，票數為３；選項二，無條件釋放人質，票數為７。』
我沉思片刻，雙手拍了拍。
「大家，我哋無達成共識，我哋不如進行一個辯論黎解決分歧？」
我接著說：「如果無人反對，咁我會公開各人嘅選擇，然後再為各自嘅選擇進行辯論。」
「系統，進行不反對辯論投票。」
『投票開始。』
這次投票時間為一分鐘，大家都在十多秒內就完成投票。
『投票結果顯示，沒有人反對進行辯論。』
「好，咁就開始辯論，題目為『應該無條件釋放人質』，正方為投了選項二的七人，反方為其餘三人。」
正方七人分別為我、煩人、阿輝、司徒依風、王冰萍、駱天瑤和林翠珍。反方為女班長、非凡哥和黃聽易。
「一於由我黎做今次主持，由於反方人數只有三人，三人都會成為辯論成員，而正方就要揀出三個代表黎進行辯論。」我站在眾人前道。
眾人點頭。
「就由正方開始發言，請問你哋搵好代表未？由邊一位負責發言？」
駱天瑤舉手，「由我黎做第一個發言。」
「OK，你有三分鐘時間發言，依家可以開始。」
駱天瑤雙手輕放在前方的木桌，雙眼掃視現場各人，輕吸一口氣。
「我哋既目的係為咗建立一個自由民主既國家，我哋為咗防止香港一直以黎嘅心血被中國強行奪取，為咗防止佢哋嘅惡劣文化進一步蠶食我哋嘅故鄉，所以先至會進行今次嘅革命。假如，我哋呢家用手頭上嘅人質去威脅政府，去換取物資，咁樣同邪惡嘅中共有咩嘢分別？我哋都只會成為一堆罪犯，一堆為咗建立自己王國而佔領香港土地嘅罪犯！所以，我哋應該無條件釋放所有人質！！」
「天瑤，你發言完結？」
「完結。」
「好，咁呢家就到反方嘅第一次發言。」廖永祥看了看女班長。
女班長用手拉拉衣領，稍作整理，走前兩步。
「由我黎做反方第一次發言。」
「好，你可以開始，時間係三分鐘。」
「我哋今日之所以會係埋一齊，去佔領石鼓洲係因為我哋已經走投無路，我哋睇唔到香港會有未來，睇唔到我哋嘅屋企人、下一代可以點樣再居住係一個由中共控制嘅國土之內。黑心食物、官商勾結、二等公民、文化嘅侵蝕……呢一切一切都迫使我哋進行今次嘅行動！呢家！我哋係進行緊一場革命！我哋唔係一群君子！就算我哋點樣唔承認都好，我哋都係一群罪犯。我哋為咗香港既未來而不惜犯法，我哋要做嘅就係為咗我哋嘅親友、下一代創造一個屬於我哋嘅香港！而要做到呢個目的，我哋就唔可以再咁仁慈，我哋要用盡一切嘅方法，去達成我哋嘅目的！」
「女班長，你發言已經完結？」
女班長點頭。
「咁呢家就由兩隊既第二位成員開始進行一對一嘅發問，每人可以發問兩條問題，發問時間三十秒，回答時間為一分鐘。」
司徒依風說：「我係正方代表。」
黃聽易說：「我係反方代表。」
「好，由反方開始發問。」
黃聽易用他那凌厲的眼神，狠狠的瞪著司徒依風，被瞪著的司徒依風，後背涼了一涼，黃聽易在司法界是有名的狀王，由出道至今未嘗一敗。
「你哋話我哋咁樣做同中共完全無分別，咁我想你哋諗清楚，到底我哋香港人試過幾多次『和理非非』嘅行動？而呢類行動又得到咩嘢嘅後果？……我想問嘅係，你哋到底有咩野計劃，可以有信心令到我哋呢場革命可以和平理性咁進行落去，而又可以成功達到目的？」
司徒依風淡然道：「香港係世界上最特別嘅地方，香港人熱愛和平，鍾意用務實嘅方式去處理問題……咁多年黎我哋試過唔同嘅方法去喚醒仍然沉睡嘅人，不過我哋都知道，呢個世界上面有一種人係永遠都無可能叫醒，就係扮訓嘅人……香港正正係有太多扮訓嘅人存在，我哋之所以選擇革命，並唔係為咗『寧為玉碎、不為瓦存』，我哋係想透過呢場革命，去喚醒所有香港人！去喚醒所有扮訓嘅香港人！我哋要佢地知道，香港人係有能力，亦都可以去爭取自己嘅權益，我哋唔係二等公民！我哋係寫正體字，講廣東話嘅香港人！……要叫醒呢班人，需要嘅並唔係血，而係耐性，用無比嘅耐性透過理性務實嘅方式迎合港人口味進行革命，咁樣做先至有一絲嘅希望激起千重浪。我講咁多都只係想表達出用激進嘅方法只係可以叫醒一班沉睡已久嘅香港人，而呢種激進行動，係好多年前已經成功喚醒咗唔少訓緊嘅香港人，而現在，我哋已經唔再需要用激進方式去喚醒一班唔係訓緊嘅香港人……我哋要做嘅係用和平而有力量嘅方式叫醒埋班扮訓嘅香港人。」
黃聽易嘴角一笑，眼內泛出微弱的淚光，然而在其他人察覺前就用手輕輕拭去。
黃聽易說：「我諗你無聽清楚我嘅問題，我嘅問題係你點樣保證呢件事可以用理性方式進行而又可以成功？」
司徒依風大大力吸了一口氣，「咁你又有咩嘢方法保證激進行為可以成功？我哋無人可以保證任何事！假如呢個世界所有人都覺得『既然你都唔可以保證成功，我做乜要做』嘅話，咁香港只有滅亡一條路可以行！我哋唔可以有『不做無用之功』嘅心態，我哋要做嘅應該係『明知不可為而為之』，就算到最後失敗，我哋都為香港嘅未來踏出咗重要嘅一步，革命嘅種子終有一日會遍地開花！」