有咩恐怖得過同自己玩MSN？: 第二十節 - 雙打
上回講到連贏兩場之後，休息期間冥通係天台比鬼邪偷襲，不過佢都將佢制服係把劍入面。
終於要開始第三場賽事，贏埋佢既話即係之後兩場唔洗打，直接贏。
SEN：「Yo！大家係咪好期待呢？廢話唔講咁多，抽出戰名單......結果出黎啦！今次係冥通vs帕特莉西亞！」
玥風：「帕特莉西亞唔通係果個囡囡？」
K：「係呀，你地最留意既女呀，今次因為公主上陣，我就唔求咩打生打死，邊個比自己既武器傷到就算輸，OK？」
我：「你玩晒啦！你果個囡囡都無武器，冥通就有把巨劍，即係你果邊咪唔會輸？」
帕特莉西亞：「咳，你個矮仔唔好咁無禮，我係水世界入面既默菲丹共和國既二公主，你應該叫我做公主，仲有我係有武器架。」
呢個二公主果然係水世界既人，連胸器都特別大，不過估唔到佢武器係兩個水晶球，唔通佢個胸係假既......
冥通：「唔好以為我唔打女人，不過我一定會渣你個波，唔會手下留情。」
SEN：「拿拿拿，冥通選手，你要注意你言行呀！唔好性騷擾公主呀！否則都會取消你資格，當你輸！」
K：「今次唔關我事，係公主有特別保護，你都係收下把臭口啦。」
帕特莉西亞：「你太無禮啦！〝水牢”。」
SEN：「公主果兩個水晶球即刻變左兩個保護網，一個包住自己，另一個包住冥通，唔通想一齊輸？」
鬼邪：「喂喂喂！689你咪咒公主呀，呢場係二打一既戰鬥黎，我當然唔會比公主輸啦！」
冥通：「你係我把劍入面想做啲咩呀？你覺得你會控制到我把劍咩？」
帕特莉西亞：「佢依家當然唔得，不過經本公主幫助後就可以，〝水之擁抱”。」
冥通：「我把巨劍竟然比你用水包住左？但咁又點呀！你既武器其實就係水，等我係呢一刻令你輸埋佢啦！」
SEＮ：「勁呀！估唔到冥通一拳當果把巨劍係波一樣，一野飛埋去公主到，到底兩層水牢足唔足夠保護公主呢？」
帕特莉西亞：「呢個粗人既靈氣真係好強，佢既力度竟然可以令把巨劍既衝力撞穿水牢......衝力太快，我根本唔可以令把劍停低。」
鬼邪：「公主唔洗怕！你唔夠力姐，但巨劍控制權係我到！我要報返琴晚既仇！」
SEN：「哇，估唔到剎那間勝負已分，巨劍已經直刺冥通的心藏，即係今次勝利者係帕特莉西亞公主！」
冥通：「估唔到......低估左佢......」
玥風：「咁都計贏？二打一根本唔公平！再講鬼邪已經係第二場輸左，即係犯規啦！」
K：「佢只係控制唔到自己把武器，咁都關人事？」
我：「算啦，下一場贏返就得，依家不如拿拿林醫左佢先啦，否則錯過黃金時機就唔好。」
呢個時候，我反而希望五個人可以完完整整平安咁離開呢個平行世界，所以唔公平咁輸一場真係唔重要。
SEN：「依家個場地都係濕左少少！咁就快快手手開始埋第四場......雷切爾vs穆！今次到仇魂決定勝負條件啦！」
我：「喂，佢地果邊果個穆仲唔出現既？咁我點決定玩咩？」
呢個時候有一個男人從天而降......
待續。