搞掂哂啲手續之後,我就去買埋張粉紅色凳仔,忽然覺得人生有返啲意義,做左老豆既感覺真係好好,就算中左六合彩,幾有錢都好,有幾多女埋身都好,生存無左嗰份責任感,就算你著得幾光鮮,生活有幾奢華,你都只係得個殼,無靈魂,行屍走肉。但而家唔同左,有個人等緊我去照顧佢、去關心佢、去愛護佢,佢無左我唔得,呢一種實在感同使命感,真係食幾多女都搵唔到。
 
行行下,經過公園,見到成班師奶係到吹水,有一、兩個係喺幼稚園果到見過既,於是我厚臉皮咁走埋過去,睇下會唔會取到啲咩西經。
 
班師奶見到有個男人走過去,個個都停哂口,眼甘甘咁望住我,屌,搞到我鬼死咁尷尬,而家未見過靚仔咩?
 
「呀我認得你!」其中一個體型略肥既師奶大叫。「你係今朝送嗰個無老豆老母既細路女既男人!」
 
無老豆老母既細路女……睇黎小貞係幼稚園都幾出名下。
 


「個細路女叫小貞,佢唔係無老豆老母,由今日開始我就係佢老豆。」我扯扯地火咁應佢。
 
「呀,唔好意思,師奶係口直心快左啲,講錯說話希望你唔好見怪。」
 
都算佢有返啲禮貌,不過既然佢知道小貞既事,話唔定我可以問到一啲有關小貞父母既線索。
 
「係呢,唔知你地知唔知之前小貞係由邊個接送開架?」
 
肥師奶望一望身旁果幾位師奶,但大家都頭擰擰咁,肥師奶唯有尷尷尬尬咁回應:「之前就一向有個女人接送佢既,不過個女人又自己無認係個細路女既媽媽,到早嗰排先開始每日有唔同既人去接送佢,所以我地都唔太清楚。」
 


屌,成班八婆只係識係到食花生,見到個細路女咁既情況好明顯係有問題啦,但一句關心都無,咩都唔撚知。
 
不過無所謂啦,查唔到小貞個父母係邊個都無乜所謂,小貞唔需要啲咁無責任感既父母照顧,以後小貞只有我一個就已經足夠!
 
「唔緊要啦,以後我就係小貞老豆,唔會再人唔同人去接送佢架啦。」我笑笑口咁回應,睇黎我已經完全浸醉係做人老豆既世界。
 
「哦,咁咪好囉,但睇落你都好後生咋喎,你有時間同金錢去照顧一個細路女架啦?」肥師奶質疑我,佢果然係好口直心快。
 
「放心啦,呢點你地唔洗替我擔心。」唔通我中左六合彩我又講俾你知咩。「係呢,你地啱先講緊乜,我想取下經,第一次做人老豆,乜都唔識。」
 


「我地講緊將來揀邊間小學好呀。」企係肥師奶右手邊比較瘦既師奶搭嘴。
 
「吓,佢地而家係K2咋喎,咁快要諗定讀邊間小學?」
 
「差不多啦,他們還有幾個月就升讀高班啦,高班之後很快就要選小學啦。」又有個師奶用普通話搭嗲。
 
屌,又係香港人娶大陸女人既個案。
 
「係呀,小學啲面試好難架,尤其係你要揀名校就更加難,我二姨個細仔而家已經開始補緊面試班啦,我都打算叫我個仔去。」另一個樣貌普通既師奶話。
 
「除左面試班之外,仲要學多樣樂器先得呀,會加好多分架……」肥師奶繼續進攻,拎返個主導權。
 
就係咁,幾個師奶七嘴八舌咁樣繼續討論點樣可以係小學面試到拎多啲分數,要幫個仔報呢樣報嗰樣咁。
 
我聽到心都灰哂,完全唔想搭嘴,點解一定要幫啲細路編滿哂啲時間,四、五歲架咋,四、五歲既時候應該留係屋企睇下動畫,玩下芭比,玩下玩具車先啱,但你地將佢地既時間放哂係面試、學樂器、讀英文到,佢地完全無時間休息,佢地既童年無哂啦,係,佢地可能最後會好成功咁入到間好好既小學,然後又入到間band 1既中學,最後仲讀埋最頂尖既大學,但個結果,咪就係係你面前撕爛張成績表,同你講:「你要我做既野我全部都做哂。」咁囉。


 
睇黎呢班人都係唔會醒架啦,我先唔會要小貞變成咁,我要小貞開開心心、活活潑潑咁成長,唔受任何人同事既約束。
 
我唔想再聽佢地講野,所以好瀟灑咁頭也不回就走左。
 
Hea下hea下,話咁快又到接小貞返屋企既時間,我好準時咁到左學校門口,幻想小貞會好開心,彈下彈下咁衝過黎迎接我。
 
但呢啲都只係FF姐,去到幼稚園,只係見小貞頭耷耷眼濕濕咁,我走過去踎低身問佢咩事,但佢唔應我,只係頭擰擰咁,眼尾望住坐係佢旁邊既一個細路仔。
 
我認得呢個細路仔,係今朝個闊太個仔。
 
佢個仔都好肥下,應該係去到痴肥既程度,用技安黎形容佢就最適合不過,好明顯就係係屋企好食好住,好食懶飛既大少。
 
見到個肥仔玩緊芭比,屌你咩男人老狗玩芭比,我望一望小貞,小貞又望一望個芭比,我諗我知發生乜事啦。
 


正當我走埋去想話個肥仔時,Miss Cheung及時走左過黎,佢望一望肥仔同小貞,睇黎佢都知發生左乜事啦,然後搶先一步走左過去肥仔到,話:「吳富友同學,你記唔記得我地食點心時講過既野?」
 
原來肥仔個名叫吳富友,真陰公,有個柒老母改個柒名。
 
「咩野?」富友仲未識驚,依然手握住個芭比。
 
「富友你唔鐘意紅色,但偏偏拎膠叉時拎到個紅色既,咁你會點做?」Miss Cheung繼續好溫柔咁循循善誘佢。
 
「問其他同學可以唔可以同佢交換……」
 
「無錯啦,你而家想玩芭比,但小貞又玩緊喎,你應該要點做?」
 
「過去問佢可唔可以俾我玩……」
 
「無錯啦,但係你啱先點做?」


 
「就咁拎左佢既黎玩……」富友望一望小貞,見到小貞楚楚可憐個樣,睇黎佢都俾小貞冧掂左,於是走埋去,好溫柔咁摸一摸小貞個頭,再遞個芭比俾小貞,話:「對唔住呀小貞同學,我無心架……」
 
屌你死肥仔,道歉都唔識,咩叫我無心架?
 
「唔緊要啦,下次一齊玩啦。」小貞笨笨拙拙咁抹走啲眼淚,然後拖住富友隻手講。
 
嗚哇我見到富友當堂成個都軟哂咁,笑到見牙唔見眼,女神貞咁就收左第一個兵啦!!!
 
我無眼睇,於是走過去拖走小貞,「好啦,我地要返屋企啦。」
 
同Miss Cheung同富友講完byebye之後,我就拖住小貞既小手,連埋架單車一齊慢慢行返去啦。
 
「今日咁唔開心,我地不如去食啲會令你開心返既野囉!」
 


「好呀!」小貞興奮到一路行一路跳,跳到紅都臉哂。
 
「咁你想食啲咩?」
 
「乜當當!」
 
「乜當當?麥當勞係咪呀?」
 
「係呀,我要食雪糕!」
 
好開心,好開心見到小貞咁可愛純真既樣,好開心見到佢咁開心,好開心見到佢開心到眯埋左對眼……
 
「好啦我地去食雪糕喔!」
已有 0 人追稿