返到屋企,老母已經係到煮緊餸,家姐一見到小貞,就即刻狗衝過黎,手上揸住左把剪髮剪刀。
 
「小貞,跟我黎,我幫你剪返把靚靚頭髮。」哇屌!家姐故意擢高左把聲線,扮低能聲,好撚嘔心呀!
 
佢毫不客氣咁從我手上搶走左小貞,帶左佢去廁所。
 
係呀,我家姐係個髮型師黎。
 
「喂仆街傑,過黎幫手啦,唔洗做呀!」阿南係廚房到伸個頭出黎大叫。
 


「喂!叫左你地唔好係小貞面前講粗口架!」最爛口嗰個家姐係廁所咆哮。
 
我行到入廚房,細細聲咁問阿南:「屌你做乜係到既?」
 
阿南又細細聲咁答:「屌你我幫手拎左咁多野,唔撚係無得食呀嘛?」
 
講完我地兩個細細聲咁樣鳩笑。
 
「喂!你兩個呀,快啲拎啲碗出去啦。」係灶頭到既老母話。
 


擺好哂啲碗碗碟碟,老母亦開始將啲飯餸逐樣逐樣咁放上枱,有番茄薯仔湯、蘿蔔炆牛腩、三色蒸水蛋、薑蔥蒸魚、檸檬雞翼,四餸一湯,雖然唔係啲咩山珍海味,但香味撲鼻而來,令人垂涎三尺。
 
「阿女呀,得未呀?快啲同小貞出黎食飯啦。」老母大聲叫喊。
 
原來家姐早已經幫小貞剪完頭髮,仲洗埋吹埋,眼前既小貞,用左兩條黃絲帶紮左對孖辮仔,因為頭髮全部紮起左,本身圓圓既臉就顯得更加圓,阿南見到,就忍唔住走埋去係咁搓小貞塊臉,搞到佢臉容扭曲。
 
我心諗,你死撚硬啦彭浩南。
 
家姐隨即拎返把剪刀出黎,隊向阿南到,阿南即刻放手,嚇到臉都青哂。
 


老母喝住佢地:「喂!咪教壞小貞!」
 
唉,呢家人最好唔好日日出現,如果唔係小貞都唔知會變成點,分分鐘仲慘過做乞丐既結局。
 
搞完一輪,終於可以埋位食飯啦。老母係咁遞啲餸落小貞到,搞到小貞個碗滿到根本食唔到,不過小貞似乎好鐘意食蘿蔔,佢係咁畢啲蘿蔔黎食,細細啖細細啖咁食,食得津津有味,老母見到小貞咁享受,佢自己都樂此不疲。
 
望住老母,望住家姐,我先發現原來我地好耐都無試過咁開心咁一齊食飯,自從我中左六合彩之後就夜夜笙歌,每日花天酒地,老母都唔會望多眼,不過小貞出現左之後,我先明白到,有種幸福,真係要從家人身上先可以得到。
 
食食下,小貞突然走過黎,佢手上揸住舊紅蘿蔔,然後一野隊落去我個口到,我黎唔切反應,就咁吞左落肚,我其實唔鐘意食紅蘿蔔架,但見到小貞笑笑口咁好滿足個樣,幾咁唔鐘意我都要食啦,我見到小貞手上仲留住左啲蘿蔔汁,我就一野啜左落去佢隻手仔到,老母見到即刻打左我個頭一下,鬧我好鬼污糟。
 
「登登登!」
就係呢個時候,我褲袋到部手機響起個鈴聲。
 
邊個whatsapp我呢?
 


「sry呀,我今日好似惡得濟?」
我一望個頭象同個名,原來係Miss Cheung!
 
阿南見我一副驚訝既樣,就好好奇咁哄個頭埋黎,我即刻收埋部手機扮無野。
 
「邊個黎架?」阿南用啲好詫異既眼神望住我。
「之前啲女姐,仲會有邊個。」我扮鎮定繼續食飯。
「係呢,阿南呀,其實你都唔細架啦,幾時先搵返個固定既女朋友呀?」哇,老母,你問呢條問題既時間真係掌握得啱啱好呀!
「佢咁花心會結到婚?我由細識到佢大,肯定佢結唔成婚!」家姐笑到格格聲。
 
因為老豆早死,老母要返工,所以有時會將我同家姐暫託俾隔離屋個姨姨睇住,而住係隔離屋個姨姨亦有個仔,嗰個就係阿南,所以我地三個係由細識到大。
 
「喂乜你咁樣講我架!」
 
襯佢兩個嘈緊,我借尿遁走去廁所望返個whatsapp。


 
望到Miss Cheung個頭像,佢耷低頭,對眼合埋左,好似好陶醉咁啜住支飲管飲野,個嘴巴嘟起左,長曲髮擺埋一邊,屌!想j死人咩!
 
「 ? 」
 
佢可能見我無回應,所以又send多個表情符號過黎。
 
嗚哇我好緊張,緊張到唔知覆佢啲乜好,但係我緊張啲乜呢?明明澤勁英龍華就唔係我杯茶,唔通係因為而家個感覺就好似偷情咁?定係因為佢係幼稚園老師,我係家長?但係我唔可以咁仆街勾二嫂架喎!但係阿南又唔係同緊Miss Cheung一齊!佢溝唔溝到Miss Cheung都成問題啦!大佬你食過咁多女,唔係而家先黎緊張呀嘛?廿幾歲人仲好似個十幾歲靚仔咁,俾人笑到你臉都黃呀!
 
我係廁所掙扎左好耐,最後決定咁樣覆佢:
「唔係呀, 係我太八掛姐  麻煩到你就真!」
 
哇屌!終於send左出去!
 
「細佬你肚痾呀?去咁耐廁所既?」家姐大叫。


「出緊啦出緊啦!」
 
我出返去,見到佢地都差唔多食完啦,於是幫手執埋啲野,小貞都似乎想幫手,佢係廁所拎左我買俾佢張粉紅色細凳仔出黎,佢用兩隻手仔捧住,跌下又捧下咁,最後終於順利捧到去廚房。
 
小貞將張凳擺左係洗手盤旁邊,然後小心翼翼咁企上去,不過廚房既洗手盤比廁所既高,所以就算小貞企左上去張凳到都唔夠高,老母企係小貞隔離洗緊碗,而小貞企左係凳到既高度只係去到老母個大腿到,佢遞高左對手,好似係想試下掂唔掂到啲碗,但係佢只係勉強捉到個洗手盤邊,呢個畫面好滑稽,我企係到睇,忍笑忍得好辛苦。
 
老母太專注係洗碗到,都無留意到小貞係佢隔離,小貞知道自己唔夠高,佢又吉高對腳,呢個時候家姐發現左佢,覺得危險於是就抱起左小貞。
 
「黎,小貞跟我黎!」
家姐將小貞帶到去牆角,小貞條孖辮fing下fing下咁,好鬼趣緻。
 
家姐放低左小貞,叫小貞企埋去牆邊,我諗我估到家姐想做咩啦。
 
然後我拎左支顏色筆同紙過去,小貞好乖咁企定定係到,我將張紙擺係小貞頭頂,再用支筆係牆到畫左一筆,家姐就笑住咁話:「小貞你以後會快高長大,我地就幫你量住你高左幾多。」
 


「我又要幫你地量!」小貞好興奮咁用比卡超聲線講。
 
「哦,好啦咁。」輪到我走埋去牆邊,小貞左手拎住左張紙,右手拎住支顏色筆,但佢唔夠高,佢凝視住家姐,家姐就好識做咁抱起佢。
 
本身家姐都算高,我180差1 cm,而家姐就176 cm,所以佢一抱起小貞時,小貞已經高過我,小貞第一次由咁高既位置望住我,佢覺得好新奇,係咁摸住我個頭叫:「哇!我摸到傑哥哥個頭呀!」笑到隻眼又眯埋左。
 
「好啦,快啲幫傑哥哥度身高啦。」家姐笑到成個身都震緊。
 
於是小貞好乖咁幫我係牆到畫左筆,仲係旁邊草草地寫住「X哥哥」。
 
家姐放低左小貞,禁住自己個肚係咁笑,「咩叫X哥哥?」
 
小貞俾人笑,紅都臉哂,扁住嘴好細聲咁講:「我唔識寫個『傑』字……」
 
我重新抱起小貞,「家姐笑你咁衰,我地唔好幫佢度姐!」
 
「吓唔好啦……」家姐又黎扮低b聲,佢拖住小貞雙手係到fing,小貞又俾我地氹到格格聲咁笑。
 
我忽然諗到個主意,原來我未同小貞玩過騎膊馬,於是一手將小貞放係自己個膊頭到,小貞一對腳仔一左一右咁係我膊頭兩邊係咁fing,好開心咁嗌:「哇好高呀!好高呀!」
 
家姐見到呢個情景好得意,即刻攞左部手機出黎影低左,呢一張,係我同小貞第一張合照。
 
我一定會放大曬出黎,擺係廳中間。
 
「喂!有水果食啦!」阿南切好哂啲水果,成個水果盤遞左出黎。
 
小貞拎左片梨,擺係我口邊,「傑哥哥,我餵你食吖。」
 
「好呀!呀!」嗯,甜到入心。
 
「登登登」
 
又黎whatsapp?唔通又係Miss Cheung?
 
我放低小貞,俾佢行去食水果,然後拎部手機出黎睇。
 
「屌,你個冧樣好撚嘔心呀。」
 
屌,原來係家姐!
 
最後大家一邊睇電視一邊食完水果就走啦,小貞向大家道別之後就好乖咁同我沖涼,今日佢都笑得好攰啦,所以唔洗幾耐佢就訓著左。
 
見佢訓得好冧,我就再睇下whatsapp。
 
「其實係因為校長經過,我先會咁?」Miss Cheung覆。
「我都估到架啦, 真係無野喎, 你係老師黎架嘛, 你係要有專業操守?」我覆。
「多謝你呀, 你真係好好人? 」
「好啦夜啦, 你聽日仲要返工, 早啲訓啦」
「好的, 你都係, 早抖?」
已有 0 人追稿