《妳做咩將成碗譚仔倒落我個頭上面！？》: 第十二章
第十二章
「阿珞，近排就艷福無邊啦~~~喂！係咪因為你同樓下Form個女神有路，所以先飛甩阿魚架！？」
請完芷翹飲野之後，我就上番課室，點知一入到去就俾蛋撻拉左我去Corner。
「下，咩女神啊？我係因為唔想再玩弄阿魚既感情，所以先決定分手架！你唔係一直都好想我回頭是岸架咩下下下！？」我對住蛋撻講。
佢好似若有所思咁，然後同我講 : 「但係明明琴日有人話見到你地係三樓後樓梯密密斟，之後我岩先又見到你地一齊去Canteen買野飲架！」
哦，原來佢講緊既係歐陽芷翹。
「你話芷翹？乜原來佢係樓下form女神黎架？真係失敬失敬。」我笑住咁講。
因為芷翹發脾氣爆晒粗咁扔湯麵既情景，已經令佢係我心目中，失去左可敬可畏既女神形象。
「嘩！叫人做芷翹咁熟！？好講囉wo！咁耐都未聽你講過你有去識樓下d人既！唔係諗住……偷偷地自私食女神，唔同好兄弟分享下話！」蛋撻既情緒已經到達左激昂既境界。
係喎，話時話，我咁耐以黎都無叫過芷翹個名，淨係喂前喂後。
反而係芷翹，竟然叫我全名……
係我腦海裡面，本來除左d老師長輩之外，就只有阿娜會叫我全名。
我仲好記得佢話，人與人之間去到最熟既時候，叫全名反而比花名黎得有親切感。
「佢先唔係女神啦，你知唔知呀佢前晚！……」
正當我諗住講番扔麵件事出黎既時候，我忽然又到諗------如果我講左出去既話，會唔會影響到芷翹係學校既形象呢？況且呢d回憶，梗係……
留番第時用黎威脅芷翹仲好啦係咪先！
「佢前晚做咩？喂咪住……點解你地夜晚都會係埋一齊！！！？唔通……你地已經同居！！！」蛋撻抓晒狂咁係到叫。
屌，做乜鳩，係咪睇西野個故睇上腦？
「傻啦屌你，你估肥冬同呀汶咩！！我話，前晚我去譚仔食野個陣，撞到芷翹著住屋企衫黎食野姐。」我求其作左個大話。
「屌，你識d乜，屋企look先係pure and true！你唔識欣賞！」蛋撻睇黎都信到十足十。
「不過……」佢繼續問我 : 「不過，你地係點識架，點解好似咁熟咁既，仲叫人地做芷翹wo！！！！」
「哈哈……要講就一匹布咁長，所以呢……都係下次……先？」我奉上一個好撚假既笑容俾蛋撻。
之後既，就係蛋撻不斷既嚴刑逼供，電槍呀火箭炮呀激光劍呀咁。
好彩，憑我多年黎睇星矢練番黎既無敵聖衣，終於捱得到去上早會，暫時逃離左蛋撻既追擊。
我望住窗既外白雲，慢慢咁飄、慢慢咁飄。
歐陽芷翹……你話女神呢就唔太覺喇。
不過，佢都幾可愛、幾特別既。
嘻嘻。
***
好快好快，呢個星期好快咁就過左。
除左日日如是既上堂放飯，同埋每日放學留低趕arts SBA之外，每一日最特別既環節，就係每朝早同芷翹去Canteen飲檸檬茶，同佢鬥下氣，串下佢扔麵無晒女神形象咁。不過好笑既就係，每一日佢見到我，兩個臉蛋都總係會變到紅卜卜。
哈，都未見過有人會鬥氣鬥到臉紅既！
你地以為我同芷翹依家已經變到好好朋友？咁就錯晒喇！
其實我同佢每日相見既時間，就只係得買檸檬茶個短短五分鐘。因為一黎我地唔同級別，二黎都無咩共同朋友圈子。
所以到頭來，我地既話題都只係琴晚落好大雨，或姐係琴晚套電視劇大結局好BBQ咁。
咦！？依家諗落……我除左知道芷翹個名，同埋d基本資料之外，就好似真係對佢乜野認識都無！
就連個日佢做咩扔麵、同佢一齊個個男仔係邊個、佢做咩話自己無老豆等等，我都唔知個真相。
不過無所謂！我知道總會有機會俾我問既！
話唔定，
係芷翹自己開口同我講先呢！
拿拿拿，不過事先聲明先，我個心裡面淨係中意阿娜一個架咋！我只係覺得芷翹份人都幾特別，所以先留意佢架咋！！！
嗯……起碼暫時為止係咁。
***
「嗯……呵欠……」由於呢個星期五同六都係到通宵趕SBA關係，星期日前都總算完成左，所以呢個週日好難得咁終於可以訓到王朝八晏。
我打開手機望一望，11點48分。
「咦？」我見到蛋撻send左個訊息黎，於是乎打開左黎睇。
「蛋撻 : 喂，做完SBA未呀！記唔記得今日約左足球隊班人唱K，之後直落踢街場呀！？12點半呀，準時呀！！！」
屌！弊，唔記得左添！
我即刻走去沖涼刷牙換衫，然後打開衣櫃攞D球衣出黎。
「邊件好呢……唉求其啦！」我一手插左落個櫃桶，然後一抽！！
抽出黎既，係一件藍底白字，寫住22號MUI NA既波衫。
大家無睇錯，我都無打錯，而係件波衫真係寫錯MUI NA。
*************************************************************
「珞！」上完悶到死既數學堂之後，蛋撻無啦啦走過黎拍醒我，仲好似好興奮咁。
「做咩啊……」我伏左係枱面慢慢起身。
「我地去參加足球隊囉！」
「哦……好啊……下！？你講咩話！！？」
***
「吱吱~~~吱吱~~~」夏天既太陽，尤其中午既時候非常猛烈，熱到蟬係樹蔭下都吱吱作響，翳下乘涼。
而操場的地板，亦都因為烈日當空而發滾發燙，冒出陣陣既熱浪。
不過，縱使天氣幾炎熱都好，都無阻一班愛好足球既學生進行校隊選拔。
每一個球員，都懷住赤子之心，抵受住太陽既煎熬，站立於大地之上，聽候教練既差遣！
無錯！我就係其中一個ON99咁係Lunch time企係操場曬太陽既球員，目的就係為左入一個我唔知點解要我入既足球校隊！
「屌！你即係玩鳩我姐，又唔講做咩要入黎足球隊，但係又要拉埋我落水！依家曬到隻死狗咁都唔知為乜，算啦我走喇！」我完全頂唔順咁熱既天氣，好想番班房涼住冷氣畫畫。
「唔好走住啦阿珞！！」企係我隔離既蛋撻苦苦哀求道。
佢思考左一陣，然後好堅定咁講 : 「拿，見係你呢個老友，我先叫埋你乒隊架咋，有好野點會唔益你！」
「乜野好野呀先生，你依家要我on99咁曬太陽就真係唔方唔好野喇！」我沒好氣咁講。
「好啦唉……我入黎既原因，就係因為我係前足球隊隊長個到收到風，話由於上年球隊成績優異，所以校長決定今年為足球隊設立一隊專屬既……
女！子！啦！啦！隊！」
「你唔洗再哄我！！我決定左既野就唔會改！」
「我同你講呀蛋撻，
我搏左條老命都一定要入到足球隊！」
所謂有女唔睇就罪大惡極。
雖然我唔隨便拍拖，而且心裡面早就得番阿娜，但係咁唔代表要白白浪費左呢個睇女既機會！因為以我係呢間中學生活左咁耐，我知道被選中做啦啦隊隊員既女仔，都係非Pure則true，斯文活潑乜野類型都有。
而且最重要係咩呀？就係個個都好撚靚呀屌！
「我一定要入到足球隊！」我感受到每個男人身上都擁有既慾火，正係到冚冚聲咁燒緊！！
「咁先係架麻，兄弟！等我地拍住上！」蛋撻拍一拍我膊頭。
就係呢個時候，企我地隔離既人都不約而同咁講 : 「唔係掛，原來大家同我一樣，都係『慾火之意志繼承者』！？」
「既然大家係同一類人，咁我地從今以後就係兄弟喇！大家，一定要入到足球隊呀！！！！」蛋撻係操場到大叫。
「好！」所有係場上面既人，包括我在內，都一齊係到鳩叫。
好快教練就黎左，開始揀人。
.經過一場龍爭虎鬥之後，我同蛋撻終於都擠身入足球隊之中！
雖然，蛋撻係全勝姿態咁被教練揀入去做王牌正選 ; 而我，只係個d汎汎之輩……
不過無所謂啦！我又唔係擅長運動既！
最起碼，我已經係足球隊隊員！！！！！
「拿，就係咁既，」教練清一清喉嚨之後講 : 「由於我地學校上一年度既足球隊屢見佳績，所以今年學校決定重點投放資源俾我地。而你地身為岩岩加入既新一分子，都可以享受到呢次既撥款，就係……」
「每一個人都可以整一件波衫！」
「不過咁，首先每人俾左800蚊年費先。」
「……」我同一眾既新成員。
就係咁，我同蛋撻係放學個時一齊落左去教員室門口，係足球隊個borad既一張白紙上，寫低自己想要既號數同名稱。
「你諗住寫咩？」蛋撻寫低緊自己生日「49」同自己個名「EggTart」既同時，開口問我。
「我呀……我諗住寫阿娜個生日『22』同佢個名上去！」我滿懷歡喜咁講。
試諗下，將來我著住呢件波衫，係阿娜面前落場踢波，跟住望住觀眾席既佢，大聲咁講 : 「你係我既！」
嘻嘻嘻……都咪話唔爽。
「司！徒！珞！」係我沉醉緊係自己既幻想個陣，我俾Crystal既聲音喚醒左。
「係！？」我拎轉身望向遠處既Crystal。
「你唔好同我講，你唔記得左今日要補課下話？」Crystal既語氣無一點輕鬆既意味，而係好憤怒、好怨恨。
屌，但係最仆街係，我真係唔記得左今日要補課！！！！
死啦，Crystal係咪失戀呢？定抑或黎M？唉點都好，唔係要搵我黎祭旗下話……
「你仲企係到做咩！！！！！！」Crystal發火，非同小可。
「我仲要寫埋……」
「唔準寫！同 我 即 刻 過 黎 ！」Crystal既語氣，就好似當左我係佢男朋友咁，係到發我脾氣。
「知道！」我俾佢既大叫嚇親，即刻跑過去。
「蛋撻，幫我寫低『22』同『MIU NA』！」我臨上番去個時，拜託蛋撻。
「OKAY！」
***
「……」
過左一個月之後，波衫終於送黎，同時亦都係第一日練波既日子。
我望住眼前寫住「MUI NA」既衫，久久不能說話。
「喂，佢地D衫既質地又幾好WO，有撥款真係唔同D，我田徑隊D衫同呢件原全無得揮！」蛋撻攞住佢年衫，行埋黎同我講。
「丘旦達……」我一個轉身，鍊實左蛋撻條頸 : 「你條仆街！係咪係張紙到串錯左『MUI』！枉你仲係全班頭十名，竟然咁都唔識串！！！」
「你傻架咩！」蛋撻推開左我 : 「MIU呀麻！我會唔會串錯呀咁簡單！話唔定係工廠個邊印錯呢！」
「啊……又係WO，仲有工廠個邊……」
我又好似武斷左少少，一野就咬定蛋撻寫錯。
「如果我寫錯既話，請你食飯又點話！」蛋撻好有自信咁講。
好快就去到放學練波既時間。
我地一班人換好晒波衫，係操場上面步履縱橫。
「唉，仲諗住遲下著俾阿娜睇架麻……依家連名都串錯咁無誠意，一定俾佢笑死啦……」我頹jer咁帶住個波做ex。
一個唔留神，我控甩左個波，碌左去canteen方向。
個波去到一個身影面前，俾佢輕輕力踩住左。
「唔該……咦咦咦咦！？」我跑左過去執起個波，一抬起頭就發現，眼前呢個女仔既身影正正就係王妙娜！
「乜原來你有玩足球隊架？」阿娜上下打量我。
「哦……係呀，我見平時無咩做運動，咪參加下囉……」我支吾以對。
你估我想架咩！唔通係自己女神面前講，我入足球隊係為左睇女？同自殺無分別！
「嗯？」阿娜一臉懷疑咁用猜度既眼光望住我。
佢補充 : 「你呢個人當相有可疑呀下！身為中文說話全級第一，講野竟然lag機！？」
「無無無！我無講大話架！」
屌，鬼拍後尾枕添……
「哈哈哈，自爆！」阿娜笑住咁望住我 : 「不過你入黎足球隊都岩架喇，訓練下手腳協調啦！連波都控唔好！」
佢一野拍左我個波落地下踩住，然後一剔，成個波俾阿娜隻右手抱住左。
成個動作一體成形，毫無生疏，就好似練左好耐咁。
「嘩，乜原來你識踢波架？」睇落弱不禁風既阿娜，居然識踢波，真係令我好驚訝。
「傻啦我點會識！」佢成個波扔落我心口到，我一野接實左。
佢繼續講 : 「我呢個動作，係for遲下足球啦啦隊跳舞用架。」
「咩話，你有份跳！！！！！？」我望住阿娜個笑樣，睇落真係唔似講笑。
而且知道有啦啦隊既人少之有少，照計阿娜無咩可能知！
如果係真既話……以後就有阿娜幫我打氣……
正呀屌！
「呆晒咁做咩呀，你唔信呀？」阿娜用右手督住左我額頭。
「乜你入黎球隊睇啦啦隊之前，唔打聽下邊個有份跳架咩！」阿娜輕力咁推左我額頭一下。
「哈哈……哈哈……」我俾阿娜發現左自己既目的，即刻臉都紅晒咁望住佢傻笑。
「同埋呢……」阿娜忽然臉紅一紅。
「點解……你會寫我個名同生日架呢？……而且個名仲要串錯！！！」阿娜舉起右手，指住我心口前面既英文字 *(心口有個細既字，背脊就有個大既)。
弊！咁快穿煲！
「我本來諗住將來比賽個時叫你黎睇，然後俾個驚喜你……」望住阿娜講呢番說話既感覺就好似表白咁，搞到我好尷尬，紅都臉晒。
我見阿娜呆左咁望住我，即刻打完場咁講 : 「但係估唔到工廠個邊串錯左囉！算啦，咁樣睇落咪唔係你個名囉！唔洗咁尷尬仲好啦！」
阿娜行前左一步，抬高頭向我展現出一個甜蜜既笑容 : 「咁你比賽個時，記得望下我件啦啦隊衫！嘻嘻！」
「下！？」
係我疑惑緊阿娜講咩既時候，佢就已經轉身行走左。
「去練波啦！」阿娜行到一半又拎番轉面，對住我講。
「傻瓜珞。」
***********************************************************************
「解圍呀阿珞！」蛋撻係前場大叫。
我一腳控實個波，然後大腳一抽，將波送番去前場。
足球於半空中飛翔，並且係球場既黃光燈映照下顯得閃爍奪目。
「仲以為你唔會再著呢件衫添。」中場休息既時候，蛋撻同我坐左係旁邊既石屎凳上面。
「無咩既，都半年啦，唔通以後唔著，浪費件衫咩。」我望一望自己身上佈滿汗水既藍色球衣，然後仰望天空。
「自從你識左芷翹之後，你好似開心左。」蛋撻飲左一啖水。
「但其實我同佢唔係好熟。」我成個人訓底左，個頭向蛋撻個邊，繼續望住夜空上皎潔既明月。
「依家唔熟姐。將來，一定會熟。」蛋撻講呢句個陣，好似諗緊好多野。
「點解咁講既？」
「因為，你同阿娜以前都係咁。睇住你依家慢慢咁變番以前開開心心既性格，我真心覺得好感動、好感動。」
我望一望蛋撻，發現佢原來都仰望緊個天空。
「今日個天好靚啊可？」我講。
「係啊。不過我覺得，下次再望既時候，一定仲靚。」
「即係幾時？」
「下次囉。」
「下次？」
「嗯嗯，下次。」
『We've come a long way from where we began.』
『 I'll tell you all about it when I see you again』.