又係一個平凡既星期一番學日。
 
        經過上個禮拜之後,我已經慣左早起身,係7:45番到學校,目的就係為左請芷翹飲檸檬茶。
 
        正當我就行到番學校門口既時候,我見到前面有一個好熟悉既背影。
 
        我走到去前面,拍左芷翹左邊膊頭一下,然後整鬼佢咁企係佢右邊。
 
        佢一拎轉個頭望左邊,我就哄個頭埋佢到。跟住佢好快就望過黎右邊,然後就俾我嚇親。
 


        「嘩!嚇…嚇…嚇死人咩!仲要哄咁埋……」芷翹既雙頰唔知點解紅起上黎,仲係咁打我。
 
        「哈哈你係咪傻架,咁低能既玩人方法都中招既!」
 
        唔知點解呢,我就係好中意串下佢、整下佢,搞到佢臉紅紅咁打我鬧我。
 
        唔通我屬於M系!?
 
        「咁低能你都仲玩架喎!低能仔!」芷翹無啦啦搣我塊面。
 


        「做咩搣我!」我講完之後,打側左個身,舉起雙手係到“初”芷翹塊包包面。
 
        係我個角度望過去,芷翹個樣就好似「=3=」呢個emoji咁。
 
        「哈哈哈,你舍樣好好笑呀!」我起勢咁繼續捽佢塊面,搞到佢之後講左d乜我都聽唔到,因為已經變晒「!@$@!^#$%&%^*#$@%#$」呢d我聽唔明既火星話。
 
        我地打打鬧鬧咁,好快就已經去左canteen買完野飲。
 
        「咕…咕…咕」芷翹好快咁就飲晒包野。
 


        「咁就飲完lu,又要等聽日……」芷翹一野將個紙包捵到鈔左。
 
        我偷偷咁斜視左芷翹一眼,發現佢既側面原來睇落係咁清秀脫俗,而且臉上既輪廓分明,質素好比一個專業既模特兒。
 
        雖然叫對左芷翹成個星期,而且日日都見,但係老實講,我都未試過好認真咁望住佢。
 
        而且,仲有芷翹既所有野,我都唔清楚。
 
        究竟,我地呢個咁既檸檬茶約定,會持續到幾時呢?
 
        定應該係話,
 
        可以維持到幾時呢?
 
        我舉起隻左手,禁落佢個頭到然後講 : 「有無諗過,我地咁樣每朝早一齊飲野既日子,會去到幾耐呢?」


 
        或者芷翹無諗過我無啦啦懶感概問呢d問題,所以都窒左一窒。
 
        「我啊,我覺得……」芷翹思考左一陣,繼續講 : 「我講得,只要你願意既話,就去幾時都得。」
 
        「嘩,你即係無答過我問題姐,玄過圓玄學院喎你!」我嘲笑芷翹。
 
        「係架!鬼叫你問d咁難答既野,我無講咩『直到永遠,阿門』咪算好!」芷翹又串番我。
 
        「但係你諗下喎,我同你又唔熟,彼此又一無所知。你唔覺得咁樣既關係好脆弱,一擊即散咩?」我問。
 
        「既然係咁既話,每一朝早既呢段時間,唔係正正就係一個機會俾我地認識大家咩?而且我覺得,你想要了解我既話,我一定唔會拒你於千里之外既。」芷翹答。
 
        啊,我硬係覺得佢講呢番說話,係有d深層意思。
 


        但係我又估唔到,算啦,哈哈!
 
        「咁你又岩既……」我飲住包檸檬茶講。
 
        「司徒珞先生,俾d勇氣自己啦!」芷翹無啦啦一句車埋黎,搞到我一頭霧水。
 
        「俾d勇氣出黎,認識下我,認識下自己啦!你唔覺我地相識係一種緣份黎架咩?」芷翹幽幽咁講。
 
        「下,你話你扔我麵係緣份!?咁……都幾緣既,我都未見過有女仔咁神經質……」
 
        之後,又換黎一輪芷翹既搣面攻勢。
 
        「我既意思係話,每一個人係自己既生命中出現,必定有佢既原因。」
 
        可能,佢既出現係為左引導你去走呢個人生 ; 又或者調番轉,你既出現係為左引導佢去走呢個人生。」


 
        簡單d黎講,緣份令到人彼此認識,而認識一個人之後,都必定有佢既作用,可能係想佢教你d野,又或者想你教佢d野。」
 
        聽完芷翹講之後,我都係唔明。
 
        「er……唔係好明。」我真心咁講。
 
        「晒口水!唔同你講野喇,死蠢死蠢死蠢!」芷翹拎轉面就諗住走。
 
        「喂,」我叫停左佢。
 
        「咩事啊!」芷翹嬲爆爆咁拎轉面望番住我。
 
        「雖然我唔明呢句姐,但係你之前講既我都明既!」我笑一笑,然後行埋去芷翹前面。
 


        我繼續講 : 「我會努力去認識你架喇,芷翹!」
 
        「你第一次叫我個名!」芷翹雙手掩口,勁驚訝咁講。
 
        「咁唔通次次都喂前喂後咩!你中意既,我咪繼續喂囉!」我講。
 
        「唔好唔好,一於繼續叫芷翹啦,哈哈!」佢唔知做咩,聽完我叫佢之後,就好開心咁走左。
 
        都話架啦,我都未見過一個女仔係咁神經質……
 
        但係咁可愛。
 
        ***
        上到課室同蛋撻傾左陣計,班主任就上左黎。
 
        「咁多位同學,下個星期三同四就係陸運會,大家記得要上網填番自己報咩項目,如果咪到時就兩日都係看台坐架喇!」班主任望住我地講。
 
        「屌,又係陸運會,即係又係蛋撻表演既時候喇……」
        「咪就係!都唔俾機會我地呢班毒撚既,唉……」
        「抵制蛋撻!堅決反對壟斷市場!」
 
        係班主任講完句野之後,班房既毒男們隨即暴動起上黎。
 
        蛋撻同我對望左一下,之後都得啖笑。
 
***********************************************************************
 
        「黃社!啪啪啪!黃社!啪啪啪……」啦啦隊打氣既節奏,仿佛帶動左成個運動場既氣氛,令到看台上淨係睇比賽既觀眾們,都好激昂咁落力大叫口號。
 
        今日係我升上中學以黎第三次既陸運會。
 
        不過呢三年黎,我都係頹到仆街咁坐係看台畫畫睇書,無落過去參加任何一場比賽。
 
        一黎係因為自己只係一個肥版沈震軒,同身邊才高八斗既羅仲謙跟本無得揮,無理由落去跑步,SHOW肚腩俾人睇姐係咪先!
 
        二黎就係因為,我覺得無咩動力去比賽,反正落到去都係輸既,跑黎托春咩。
 
        「喂!肥仔珞!」
 
        一聽呢把清甜既聲音,就知道係王妙娜。
 
        「做咩叫我肥仔!我只不過係好肉地姐!」我拎轉個頭望向係左邊行緊過黎既阿娜。
 
        嘩!不得了,雖然廣州交流團個陣已經見過佢便服裝,但係依家著起運動服,完全將佢玲瓏浮凸既上半身展現無遺,而且仲要隱約見到佢個黃色bra……
 
        屌,真係夠晒品味,我中意呀!!!
 
        望落少少,佢纖細既腰下面係一條黑色PE褲。但係短既程度已經可以話係一條熱褲,將佢水嫩白皙既大腿露晒出黎。
 
        好撚正呀師父!!!
 
        正當我係到將眼前既良辰美景盡收眼底既時候,阿娜開口講野拉翻我番現實。
 
        「你啊有無參加比賽架,都唔見你有落過場既!?」
 
        「我無參加呀……運動都唔係我擅長既野黎既……」我有D自卑咁答。
 
        「咁以前呢?」阿娜繼續追問。
 
        「都無……」
 
        「你都未試過,又點知自己唔擅長呀肥仔!」阿娜雙手叉腰,哄前個上身同我講野。
 
        嘩……由上而下呢個角度望落去,阿娜既身體比例真係好撚完美……
 
        「咁…咁…咁依家都無得話報名架啦,一係咁!我下年一定參加,好無!?」我好有自信咁講。
 
        但查實我都只係諗住敷衍下阿娜,廢事佢覺得我好頹好廢,無黎大志。
 
        「唔洗等下年喇,就今日啦!」
 
        「咩話!!?」
 
***********************************************************************
 
        好快又上完一日既堂,因為我今日唔洗留底做SBA關係,終於有得同蛋撻搞住GAY咁放學。
 
        「珞,你諗住今年報咩?」行到出去學校門口個時,蛋撻無啦啦問我。
 
        「我今年唔多想玩。」我低住頭繼續玩手機。
 
        「唔好咁啦,我地依家中五喇,玩埋今次同中六個次之後,就再無陸運會架喇!!!所以不如就求其報個項目啦,當俾自己投入下都好麻!」蛋撻不停咁勸我。
 
        咁又係既,話晒中三中四既陸運會我都有參加,無咩理由今年唔玩姐?
 
        「好啦好啦,我報100米啦咁,跑完就算。」
 
        不過玩還玩,我諗,
 
        我諗我已經好似變番中一中二咁,
 
        唔知參加黎為左咩。
 
        尤其係無左阿娜之後。
 
***********************************************************************
 
        「咩話!?今日參加比賽?唔好玩啦邊有得WALK-IN架,你估去BALL咩!」我沒好氣咁同阿娜講。
 
        「傻架咩你!個人比賽就梗係無得即場報名啦,但係……團體比賽就可以隨時換人!」阿娜好興奮咁講。
 
        乜解救依家係我要去比賽,但係會係佢開心架呢?
 
        「點會有CLUB肯俾位一個未跑過步既肥仔落場呀……」不知不覺間,連我都叫左自己做肥仔。
 
        人地肥冬就話有VENUS幫手加速姐,我肥軒撚識跑步咩,話唔定學肥冬咁熱身都暈Q左,唉。
 
        啊對唔住,我係肥珞先岩,哈哈!
 
        「點會無呀,足球隊咪得囉!」阿娜一言驚醒「珞」克人。
 
        係BO!我唔記得左自己都係足球隊成員!
 
        但其實我唔記得都難怪既。
 
自從係中三學期頭參加左足球隊之後,我雖然次次都有去練波,但係總係俾呀SIR鬧我波都唔撚識控 (係呀,我地呀SIR講粗口架,吹呀?),然後就叫我同其他幾個廢柴去做協調訓練,搞到我都未試過同隊友一齊練過波。
 
        而且最有問題既係咩呀?我練左起碼十次波,一條啦啦隊既女都未見過呀!!!
 
        我有問過阿娜,佢答我就係話老師未編好啦啦隊排練時間,所以未有得跳住。
 
        屌,即係玩我姐!!?咁我入足球隊黎做咩!
 
        「唔得啦,我同個教練唔多岩嘴型架,佢成日都串我既。」我對住阿娜講。
 
        「咁不如我同你依家落去搵佢,求佢俾個位你跑!」阿娜都未等我回應,就上前捉實我既前臀,然後將我由看台拉左落去。
 
        嘻嘻!~~~阿娜捉住我呀!!!
 
        雖然個一刻我真係好開心,之但係乜解救阿娜係都要我落場呢?我直到依家都未明。
 
***********************************************************************
 
        好快就去到陸運會前一日既上學天。
 
        呢個幾星期,其實都無咩特別事情發生,就係HEA下HEA下咁。不過好笑既就係,自從個日我同芷翹講話會努力認識佢之後,佢唔知做咩無啦啦係檸檬茶約定之後設立左個問答環節,要 (俾) 我每朝早都問佢一條問題。
 
(括號內為芷翹之後既修飾字眼,好似係想搞到佢賜個機會俾我咁。謝主隆恩?)
 
        當然啦,佢答既野係真心定係真心膠呢,我就唔清楚喇。
 
        「你幾多歲?」「八十歲!」
 
        「你有無兄弟姊妹?」「我有個二伯父,嘻嘻!」
 
        「你三圍幾多?」「嗯……」
 
        「呀!!!!!」呢個係我俾芷翹勁大力搣面時既慘叫聲。
 
        今日,我終於忍唔住用呢個環節既機會問佢。
 
        「其實每日問一條問題既作用係邊?唔係用黎俾我認識你架咩?」我雙手搣落芷翹塊面到。
 
        好軟~~~好滑~~~
 
「哈哈,你呢條問題我可以認真答你喇!作用就係用黎玩你!鬼叫你抽我水呀拿,抵死!」芷翹講完之後,將視線望向我對手掌。
 
        不過佢睇落又唔似係想鬧我捽佢塊面,反而仲好陶醉咁笑,俾我感覺佢好ENJOY咁。
 
        佢一講起抽水,我不由自主咁諗番起第一日識芷翹既時候攬住佢既情景。
 
        「係呢,其實你個日做咩會扔麵既,個個男仔又係邊個黎?」我覺得我同芷翹都叫開始熟絡,所以係時候問下呢件事。
 
        芷翹佢諗左一諗,然後舉起左手示意我哄個耳仔埋黎。
 
我哄前準備聽芷翹講。佢將嘴慢慢貼近我耳邊,好輕聲咁話 : 「其實呢……」
 
忽然!佢將音量提高左10既唔知幾多次方,總之就係會令你耳仔受到永久性傷害既頻率!
 
佢勁大聲係我耳邊講 : 「今日問題時間已經完結左喇!想問就聽日問啦!哈哈哈!」
 
        然後佢就彈下彈下咁上左班房。
 
        「你呢個芷翹呀……」我掩住右耳,望住芷翹個個可愛既背影消失係後樓梯轉角位。
 
好!我聽日就要拆開當日我地相識之緣既呢個真相!
 
        ***
 
        「鈴鈴鈴~~~」
 
        又到左放飯時間
 
        「食咩好?」我行埋去蛋撻個位到。
 
        「咪又係譚仔,有得揀架咩!」蛋撻佢對住我講。
 
        又係既,我學校呢邊慘就慘在無咩好食。最近最就腳既,就係樓下間譚仔。
 
        「嘩?!邊個黎架,咁靚女既?」
        「咦?!佢咪樓下FORM個女神?做咩走左上黎既?」
        「屌,一定係黎搵我啦!」
 
        班毒男們突然係門口喧嘩,搞到我同蛋撻都望左過去。
 
        「下!!」我望過去門口到,竟然發現芷翹上左黎搵我!
 
        識左佢呢個月以黎,佢都係第一次特登咁搵我!
 
        「唔好阻住條路!」我左閃右避咁推開晒前面個班想食左芷翹既厹,走到去芷翹既面前。
 
        「做咩上左黎既!?」我望住芷翹水晶晶既眼睛。
 
        「司徒珞先生,乜你咁自戀架!」芷翹笑左一笑咁講。
 
        「下?」我唔係好明佢講咩。
 
        「點解你覺得我上黎就係為左搵你架呢?」芷翹沒好氣咁講。
 
        屌,7左添!點解我竟然覺得佢一定係搵我?我地又唔係咩關係!
 
       係我勁尷尬咁笑緊既時候,芷翹繼續講 : 「我上黎係為左搵丘旦達架。」
 
        「咩話!!!!」我望一望向裡面同人傾緊計既蛋撻。
 
        又係既,蛋撻比我大隻,又比我更加識得同女仔傾計,仲要係我地學校既男神,芷翹想識佢其實都明白既。
 
        「喂,先生,你好似好傷心咁喎!」芷翹望住我係到笑。
 
        唉,大概係我已經將「失望」兩隻字掛左上塊面,所以芷翹先GET到我諗乜。
 
        「唉好啦好啦唔玩你喇。我其實係幫何SIR轉達個訊息俾丘同學知,聽日陸運會田徑隊個接力想佢跑尾捧姐!」芷翹係到嘲笑我。
 
        喔!原來係為左公事!
 
        「乜你係田徑隊架咩?」我好奇咁問。
 
        「你係咪傻架,乜要係田徑隊先可以幫手轉達訊息架咩!」芷翹彈左一下我額頭。
 
        「呀你又岩喎哈哈哈!」我係到為剛才自己既ON9而恥笑。
 
        我補充 : 「之但係點解係搵你上黎既?」
 
        「咁係因為我……」芷翹講到一半個時,無啦啦窒左一窒,然後視線打側咁望左出去操場。
 
        佢支支吾吾咁講 : 「因為……我咁岩有D事想上黎搵你,所以咪順便幫下何SIR咁囉……」
 
        話你地聽,如果芷翹平日唔係串開我既話,我真係會以為佢呢個臉紅既動作係怕羞!
 
        不過咁,原來芷翹上黎真係特登為左搵我!!
 
        「啊,歐陽小姐,咁做咩你岩先又唔承認你係黎搵我架呢!」今次終於到我調番轉笑芷翹。
 
        「咁……咁係因為我想挫下你D銳氣!」芷翹繼續講 : 「廢事你以為自己同我好熟!仲成日搣人塊面!」
 
        「喂,一開始好似係你搣我先架喎!」唔知點解佢講完之後,我就好鬼想搣佢。
 
        於是我又搣左落去。
 
        跟住芷翹紅都臉晒咁望住我,係到講 : 「咁我搣你姐,無話俾你搣番!」
 
        佢講完之後,伸左對手出黎搣我塊面。結果依家我地成個動作就好似情侶咁係到互搣,勁好笑。
 
        玩左一輪之後,蛋撻係裡面叫左出黎 : 「珞兄,唔好再纏綿遊戲喇,再唔行就食西北風架喇!」
 
        芷翹聽到之後,好似做左虧心事俾人發現左咁,即時勁快放開左手。
 
        我望一望隻錶,然後同芷翹講 : 「不如我一陣黎放學黎搵你啦!因為我約左朋友食飯,廢事要佢等。」
 
        芷翹好快就回應番我 : 「好啊我都約左人!咁你幫我同你個FRD講番何SIR交帶落既說話啦,唔該晒!」
 
        講完之後,佢就拎轉身走左。
 
        就係咁,呢個LUNCH既見面最後乜都無講到,就只係用黎互相搣下塊面。
 
        UM……不過諗番起芷翹個臉紅既樣,真係令我心跳有D加速!
 
        但係我唔係中意佢既!只係佢個樣幾可愛、幾討好,所以先會動心姐,男人之常情!
 
        ***放學後***
 
        「我落去搵芷翹先,你留係班房等我啦!」
 
        我同蛋撻交帶左之後,就落左去樓下三樓搵芷翹。
 
        不過最好笑既事情咁就發生了。
 
        就係……我都唔知芷翹咩班!
 
        「WTF……」我滿心歡喜咁落左樓下之後,先發現到呢個問題。
 
        「靚仔,你黎搵我呀?~~~」係呢個時候,有一把好撚嗲但係聽到我打冷震既女聲,係我左邊耳仔陰聲細氣咁傳黎。
 
        我一拎轉面,屌!又係個架坦克車!
 
        「哦……唔係呀…我想搵歐陽芷翹,唔知道佢邊班呢?」我快步後退,同呢隻大佬保持一定距離。
 
        所謂進可攻,退可守。如果佢無啦啦一啖咀埋黎既話,我呢個距離都仲可以黎個昇龍拳KO佢。
 
        「嗚嗚嗚……」條肥婆無啦啦喊。
 
        屌,枉佢讀咁多年書,東施效顰呢個成語咁都唔識!?
 
        「ER……請問你無事呀麻?」我唔係好咁行埋去,廢事佢無啦啦攬住我啦係咪先。
 
        「你地每一個男仔都係咁架啦,淨係見人地個樣標標緻緻咁,就狗衝流晒口水咁,」肥婆繼續係到喊。
 
        屌!雖然芷翹真係好靚好靚,但係我唔認為自己會同班厹一樣,為左呢樣野而狗衝流晒口水囉!(P.S. 我無狗衝)
 
        而且,
 
        唔狗衝芷翹,唔通狗衝你呢架坦克車咩!我怕我衝衝下俾你輾死左都仲未知發生咩事。
 
        佢喊左幾秒之後,又再講野。
 
        不過,今次佢講既野,令我頗為驚訝。
 
        「你地班仔呀,淨係識睇樣架咋,你地認識個個咩芷翹咩?你地知佢既事咩?佢呀,淨係中意TB架咋,唔會中意你地班仔架,慳D啦!」
 
        我聽完之後,O撚晒嘴,思緒非常混亂。
 
個心唔知點解,有D硬住硬住咁。
 
        我諗可能係因為,咁靚既女仔竟然係LES,所以因為覺得可惜而心痛?
 
        咦唔係喎!我做咩要信條肥婆講!
 
        係喇係喇,話唔定係條肥婆講大話!無錯喇,等我搵D矛盾位出黎鬧爆佢先!
 
        「咪住先!」我對住個肥婆大叫左出黎。
 
        我將腦海裡面浮現出黎既句子,即時對住個肥婆講 : 「首先,我同芷翹雖然唔係勁熟,但我唔認為你會比我更加同佢熟,所以我唔知點解你要咁樣屈佢。」
 
        「第二,就算芷翹真係LES,你唔俾佢其實都中意男仔架咩?點可以咁就判斷追佢個班男仔無機?」
 
        「最後,」我眼神堅定咁講 : 「就算芷翹依家只係中意TB,我司徒珞都會令佢變到中意男仔,中意我!」
 
        講完之後,我同個肥婆對望住,大家都呆撚左。
 
        我諗,佢呆既原因,係因為我喪鬧佢。
 
        而我諗,我呆既原因,係因為自己最後個句說話。
 
        「屌,仆街,我係到講緊咩……」我低頭不停咁諗,自己個腦點解會浮現左最後個句野出黎!!!
 
        就係我腦海混亂之際,我一抬起頭就發現,
 
        芷翹佢正正咁企左係肥婆後面!
 
        芷翹既臉紅到可以攞黎做顏料,而雙眼則目不轉睛咁望實我。
 
        仆街啦!我今次水洗都唔清喇!!
 
        「芷翹!你誤會喇!我只係想加多D力去反駁個肥婆……」我對住芷翹講左出口之後,先記得個肥婆仲係我前面。
 
        「你叫我肥婆?人身攻擊呀嗚嗚嗚……」架坦克車又喊多獲,然後就跑走左。
 
        我望住呢個情景,心諗,
 
        洗唔洗咁戲劇性呀,你估依家寫緊小說咩!
 
        個肥婆係我面前走左之後,芷翹緩緩咁行左埋黎。
 
        「呀司徒珞先生,話你自戀呢真係一D都無錯!咁睇得起自己,以為我會中意你啊?!」芷翹哄前上半身,個樣唔知做咩笑到好甜咁講。
 
        「唔係啦!」我荒忙解釋道 : 「我岩先咪講左囉,因為個肥婆無啦啦話你LES,咁我為左反駁佢,咪先講話要令你中意我……」
 
        我講到「LES」個個字眼既時候,芷翹臉上流露出一絲既驚訝,但係之後再講到「令你中意我」既時候,芷翹又笑左出黎。
 
        「總之一句到尾,我先唔會中意你呢個傻瓜囉!」芷翹係到嘲笑我。
 
        嘩屌!呢句既意思即係咩呀?究竟係話我唔夠吸引力呀,定抑或係佢真係LES?
 
        「咁……」因為我勁想知芷翹係咪LES,所以就算尷尬都要問 : 「其實係咪學個肥婆講咁,你真係中意TB?」
 
        芷翹思考左一陣,然後講 : 「見係你咋,我同你講啦!」
 
        之後就哄落我右耳到。
 
        突然!佢係我右耳大叫 : 「今日問答既機會已經用左架喇!想知呀?明天請早啦!」
 
        屌,又中伏!!!
 
        「洗唔洗咁大聲!」今朝掩完左耳,依家輪到右耳。
 
        「哈哈傻瓜~~~!」芷翹係咁笑,但係呢種笑唔係嘲笑,而係發自內心既甜蜜笑容。
 
        望住呢個笑容,唔知點解我都笑左出黎。
 
        「點啊搵我其實係咩事姐!」我一路笑一路講。
 
        「喔係喇!」芷翹一聽到我句說話之後,先係興奮,後係怕羞。
 
        「呢……」佢支支吾吾咁講 : 「平時我地每朝早咪一齊去CANTEEN既……」
 
        「哦係呀,做咩?」我問。
 
        「之但係……聽日同後日去西貢運動場,咁點算……」芷翹終於講左出黎。
 
        其實呢個問題我一早就有諗過,之但係芷翹又好似唔多CARE咁,咁我咪當呢兩日會暫停。
 
        「我諗住你想暫停兩日咋!」我講。
 
        「不如呢……」
 
        「嗯?」
 
        「不如一齊去啊?不過你要請我食M記早餐個杯檸檬茶。」