好快又過多左幾日。
 
        今日就係結業禮,然後就開始放暑假,而後日就係去法國既日子。
 
        由於我仲未搞清楚芷翹真正想法既關係,我呢幾日以黎一直都忐忑不安。
 
        我有將呢件事同蛋撻講,但係佢都分唔清芷翹既諗法係點。
 
        「點呀,仲諗緊芷翹單野呀?」結業禮完結之後蛋撻走左過黎。「老實講呀,你想確認下既話點解唔直接去搵芷翹姐?」
 


        「咪話左我應承過芷翹唔可以出現係佢既生命之中囉!」我沒好氣咁講。「呢個係我對佢最後既承諾!」
 
        蛋撻對住我搖一搖頭,嘆氣道 : 「唉,你呢份人,永遠都係咁自以為是,抵你仆街既!」
 
        「下?即係點?」
 
        「無野喇,無眼睇你!」
 
        跟住之後蛋撻話要陪我食餐「餞行晚飯」,而且仲要搞大佢喎!
 


        結果,我地兩個最後就去左吉野家打邊爐,哈哈!
 
        好快就去到法國之旅前既一日。
 
        由於要買既野,要做既野都搞晒既關係,我同阿娜今日並無出黎,而係自己做自己野。
 
        「嗚啊!」一諗到過埋聽日之後我就要成兩個月後先可以再訓呢張床,我就情不自禁咁攤左係張床到勁耐。
 
        「芷翹啊,你其實係點諗架......」我望住手機中芷翹既相片暗暗嘆氣道。
 


        「唉,好煩啊!」我隨手將部電話放埋一邊,然後閉上雙眼養神。
 
        突然間手機震左一震,於是乎我就諗住攞番起部手機啦。
 
        呀屌,我唔記得左自己dum左部手機係邊!
 
        我搵周圍搵周圍搵,終於係床發現到有封信遮住左我部電話。
 
        我攞起左封信,然後攞部電話出黎望下。
 
        我一睇,咦,原來係Crystal send信息俾我。
 
        Crystal : 珞仔!聽日幾點上機呀,我送你!
 
        於是乎我就直接答 : 我聽日九點鐘呀,我爸媽、蛋撻都會送我機,你都黎啦!


 
        覆完之後我就放番低部手機。
 
        「話說......呢封係咩黎?」我望住手中既信。
 
        一打開,我發現信中只有一個地址。
 
        哦,原來係巧塋個封信。
 
        突然間,我有個突發其想既諗法!
 
        不如......親身去一轉?
 
        於是乎我極速換好晒衫,然後就步出門口。
 


        「哈哈......臨去外國前最後一日先黎搞d咁既野......」我坐著開往西貢既小巴個時諗。
 
        不過我呢個做法其實都唔難理解姐,咪即係好似d人臨去旅行前最後一晚先黎通宵打番d以前唔玩既game咁。
 
        一踏進西貢,往事立即係腦海中湧上黎。
 
多少往事甜在心頭
 
        過左無耐,小巴就轉左入運動場對出既馬路口,而我都係個到落左車。
 
        呢一到,係屬於我同芷翹回憶中既一部份。
 
        全靠呢一到,我先能夠清楚咁明白自己對芷翹既感覺。
 
        全靠呢一到,我先能夠同芷翹進一步咁拉近彼此既距離。
 
        「唉......」我帶住落寞既心情,跟住信中既地址走去。


 
        沿住西貢市中心旁邊既一條小徑走去,我慢慢遠離左繁囂既街道,轉而到達左一個寧靜既小村。
 
        「睇黎就係呢條村喇喎……」我望住眼前既路牌再三確認。
 
        於是乎我緩緩走到入去村內,然後根據信上既地址走到去一座白色既3層大屋面前。
 
        我企係大屋既門前,內心不斷咁係到掙扎應唔應該按下門鈴。
 
        「屌,我係咪痴左線呀!」我係到鬧緊自己。「無啦啦一時衝動就走黎左呢到,依家都唔知點收料!」
 
        大家可以試想像一下,當你有一個朋友成幾年都無聯絡過,點知有一日佢突然間無啦啦上門走黎搵你喎,睇怕係人都驚啦!
 
        「唉……不如……都係番去?」我暗自盤算著。
 


        突然,門口有扭動既聲音!
 
        「唔係掛撞到正?」我一邊講,一邊跑去旁邊既後巷「哩埋」。
 
        無幾耐門口就被打開,然後走左一個上年紀既男人出黎。
 
        「唔撚係掛,巧瑩係麻甩佬?!」我差d屌左出聲。
 
        呢個時候有把天外之音叫道 : 屌,主角呀主角,你係咪傻撚左呀,故事一早咪講左巧瑩係一個同你同齡既女仔囉!呢個好明顯就係佢老豆啦笨柒!
 
        咦,又好似係喎,哈哈……
 
        男人走左出黎之後,門口處又出現左一個女生!
 
        呢個女生著住一件白色小背心同白色熱褲,盡露出佢既小蠻腰同埋佢對白滑長腿。
 
不過由於呢個女生既身影俾道大門遮住左,加上佢又背住我既關係,搞到我根本睇唔清楚佢個樣。
 
但就咁以背影黎俾分既話,呢個女仔真係「貝多芬」。
 
男人著好鞋之後拎轉面對住個女仔講 : 「阿瑩,我出去喇,今晚自己搞掂啦!」
 
        阿瑩?唔通呢個女仔就係巧瑩?!
 
        「嗯,咁你好聲行喇,做野小心d!」女仔回答道。
 
        啊……呢把聲咁鬼熟既……
 
        正當我係到思考緊既時候,個男人就行左出黎準備經過我呢到!
 
        於是乎我立即縮番個頭入黎,然後等待男人離開。
 
        隨住佢既身影漸漸遠去,我終於可以出番黎。
 
        不過大門早就已經被個個女仔關上。
 
        「頂……呢到洗唔洗咁多蚊!」我一路係到拍蚊,一路行過去門口。
 
        結果,我又企多左十幾分鐘。
 
        由於正值盛夏加上烈日當空既關係,我就咁企係到都已經出晒汗。
 
        「唉,講到尾我都係唔夠薑……」我頹過碌蔗咁講。「都係首先番歸寫信寄俾巧瑩傾下計,然之後先至再約佢出黎見面罷啦。」
 
        突然間,我feel到有d野係我下身既位置晃動!
 
        我驚嚇咁低頭望,結果俾我見到……一隻歌姬!!!
 
        呢隻歌姬伸左條脷出黎望住我,條尾fing下fing下咁,非常趣緻。
 
        而係佢隔離就有一個狗窩,睇黎佢應該係巧瑩呢家人養既寵物。
 
哈哈,我頭先仲以為呢個狗窩係唔知d咩裝飾品黎架添!
 
「狗狗~~~hello~~~<3!」我蹲低左個身,然後伸左隻手出去摸隻歌姬。
 
好得意既就係隻狗竟然完全唔驚我,而且仲要俾我任掂!
 
「你好可愛呀~~~!」我係到喪同隻狗玩,搞到都唔記得左自己黎呢到既真正目標。
 
唔知d狗開心得濟個陣係咪就會亂咁吠架呢?呢隻歌姬同我玩得正高興個陣竟然突然間叫起上黎!
 
「汪汪!汪汪!」佢不停咁係到吠,搞到我好似d黎偷野既賊咁一時之間勁驚俾人發現,於是乎就係到周圍望。
 
「狗狗乖呀下,唔好吠喇乖!」我不停咁係到安撫隻歌姬,但一d作用都無。
 
而且……佢仲好似越吠越大聲,仿似係有心想俾人發現我係呢到咁。
 
「你即係玩我姐狗狗……」我用雙手合實佢個口,不過佢都仲係係到照叫。
 
突然間,
 
「咔察。」係我身旁既門打開左!!!
 
一個腳步聲緩緩咁從屋內靠近。
 
Shiiiiiiit!今次仆街喇!
 
由於已經走唔切但我又未有心理準備既關係,我只好一野攬住隻狗,繼續蹲係到唔郁。
 
你問我做咩要咁做?er……多d安全感掛,哈哈……
 
「牛奶你做咩咁嘈呀……哎?!」剛才送別個個男人既女聲再次出現係我身後。「你係邊個,做咩攬住牛奶!同我放開佢!」
 
唉,呢個開場認真有夠糟糕的……
 
算啦,終需要面對!
 
我放番低隻狗,然後佢就跑左去我身後既女仔到。
 
我徐徐企番起身,然後拎轉面準備望向呢個女仔。
 
「唔好意思啊,其實我……哎?!」我本來仲諗住進行自我介紹,點知一見到眼前呢個女仔,我就愣左咁企係到,咩野都講唔出。
 
我地對望左幾秒,大家既表情都非常驚訝。
 
「珞……珞仔?」
 
「Hani……?」
 
唔係掛,Hani就係巧瑩?!
 
不過講起上黎,又真係有好多巧合!
 
第一,芷翹同Hani既家庭真係離左婚。
 
第二,我從來都唔知道Hani既中文全名係咩。
 
第三,岩先個個男人真係叫Hani做阿瑩......
 
「點解你會係到架!」Hani中斷左我既思想。「唔通......你有偷襲靚女既癖好?」
 
「痴線啦我鬼得閑搞你咩,我只係......er......」我支支吾吾咁講。
 
由於太多野一次過迫埋黎,搞到我都唔知由邊到開始解釋。
 
唉,搞到我成個變態佬咁。
 
唔係喎,依家唔係講呢d野既時候!
 
反正成個Hani企左係我面前,一於搞清楚先!
 
「咪住咪住!」我重新組織好自己既思緒。「Hani,我想問你一個問題先!」
 
「你中文全名係咩?」
 
「哦~~~」Hani仿似明白晒咁。「原來,你係為左封信而黎既~~~」
 
「仲以為你會寫信先添,點知你竟然大膽到直踩上人地屋企呀下!」
 
咁......咁即係......
 
「你好!」Hani伸左隻手出黎。
 
「我叫Hani,全名係歐陽巧瑩,請多多指教~~~<3 !」
 
我呆左咁望住Hani隻手,一時三刻俾唔出d咩反應。
 
唔係掛,當初同我書信來往既女仔竟然就係Hani?!
 
「喂,女方都伸左隻手出黎啦,身為男方既你仲唔握手,好無禮貌姐!」Hani鼓起泡腮咁講。
 
「啊!唔好意思......」我立即握手。「因為成件事對我黎講真係太震撼......」
 
「汪!」牛奶走左過黎我對腳到痴住我。
 
「睇黎牛奶好中意你喎!」Hani將握手既動作轉變為拖手既動作,然後拖住我入屋。「呢到好熱啊,睇下你啦都濕晒喇!一於就入左黎先再傾!」
 
入到去之後,整個環境基本上就係一個典型底層連花園既村屋設計。
 
Hani帶我去左廁所個到叫我去洗面,然後佢就出左去斟水俾我。
 
        「嗚啊,舒服晒!」洗完個靚面之後我行左去sofa到坐低嘆冷氣。
 
        「聽講你聽日就要上機去法國架喇喎,做咩揀今日先黎搞埋晒呢d『尋寶之旅』啊?」Hani斟左杯冰水放係我前面,然後坐左係我隔離。
 
        「Hani......你真係叫巧瑩?」我仲係未能夠相信呢個巧合。
 
        「你真係好鬼死麻煩架喎!」Hani行開左一陣,然後番黎個陣就遞左張身份證俾我睇。「俾你慢慢查牌查到夠啦,差佬!」
 
        我一望落去,就見到「歐陽巧瑩」四隻大字。
 
        「唔係掛......」我o晒嘴咁望住張身份證。
 
        「身份證黎架喎,乜仲有得假架咩!」Hani一手搶番張證。「唔準睇咁耐呀,幅相影到我好醜!」
 
        「咁即係呢封信係你拜託保良局交俾我既?!」我指住自己手上個封信。
 
        「係呀,我叫既。」Hani笑一笑。
 
        「咁點解你唔係當初搬屋個時就話俾我知,反而要揀係前幾個月個陣先同我講?」我十萬個不解咁講。「仲有,既然你係一早識我既話,點解又唔同我講?芷翹佢又知唔知道呢單野架?」
 
        「喂!」Hani叫左一聲。「你咪一輪嘴係咁問先得架,叫我可以點答你?」
 
        「er......sorry,哈哈......」我尷尬咁笑。「都係個句,一切黎得太突然喇,所以導致有好多問號出現左係我個腦裡面,令到我好想得到晒所有答案。」
 
        「咁好啦。」Hani望住我。「但係我講晒所有野出黎之前,我想先問你一個問題。」
 
        頂,其實係咪所有女仔都中意問答環節架?!
 
        芷翹又係咁、阿娜又係咁、依家連Hani都係咁!
 
        「嗯,你問啦!」不過我為左要聽故事,當然就係直接答應Hani啦!
 
        「你相唔相信緣份?」Hani問道。
 
        「下?」我塞左一塞。「我......相信。」
 
        「既然係咁既話,我就嘗試下用緣份黎解釋呢件事啦。」Hani講。「你同『巧瑩』之間既緣份,就係由書信來往個陣開始。」
 
        「雖然中間有好多既波折,但其實你地既緣份一早就注定左。」
 
        「所以縱使係有幾耐無見面,有幾耐無聯絡,甚至係消失過係對方既生命之中都好,緣份都會將『有緣人』拉番埋一齊。」
 
        「所以,我會寄信俾你,係緣份 ; 你今日會黎搵我,都係緣份。」
 
        「咁即係你想講,我同你之間有緣份?」我嘗試理解Hani講既野。
 
        只見Hani笑左一笑,然後輕輕搖頭。
 
        「我想講既係,你同『巧瑩』之間有緣份。」
 
        「下?!」我又一次唔明。「你唔係巧瑩咩?」
 
        「係啊,我就係巧瑩。」Hani講。「不過,我並唔係你認識既『巧瑩』。」
 
        「真正同你書信來往既『巧瑩』,係我個妹,歐陽芷翹。」
 
***********************************************************************
 
Hani視角篇
 
        大家好,我係歐陽巧瑩,Hani!
 
        當我仲係細路仔個陣,我就已經好懂事、好生性架喇!
 
        我既會幫手做好屋企既家務,又會努力好讀書,仲會悉心照顧好我既細妹芷翹添。
 
        點解我會咁乖?咁係因為我屋企既經濟環境一直都唔係咁好,所以爸媽都要為左生活而番工番到好夜,結果屋企就淨低我同細妹兩個人打理。
 
        仲記得個陣係我小六升中一既暑假。
 
        係某一日既下午,爸媽唔知做咩都提早左番屋企,然後就叫左我同細妹出黎,話要等一個叔叔上黎喎。
 
        過左無耐,就有個叔叔黎左,然後佢就自我介紹話自己係咩保良局關懷社區大使。
 
        之後爸媽就叫左我過去打聲招呼,然後佢地就同個個叔叔係到傾計。
 
        其實我都唔知佢地傾緊咩架,總之就係唔知d咩「助養計劃」、「幫補家庭開銷」咁囉。
 
        好快叔叔就走左喇,而呀爸呀媽就唔知做咩好開心咁捉住我地兩姊妹講,話遲d既生活將會逐漸變好。
 
        當然我係無幾耐之後就知道左原來我地呢個家庭參加左保良局既資助計劃,而且最後仲成功批核左,所以爸媽先咁開心。
 
        「巧瑩,資助我地個個家庭呢有個小男孩寫信俾你喎!」媽咪有一日突然遞左封信俾我。
 
        「下?」我放低手上既掃把,然後攞起封信。
 
        信既枱頭係寫住 : 給巧瑩  司徒珞。
 
        「哈哈,呢個男仔d字體真係有夠撩草架喎!」我取笑道。
 
        於是乎係個一晚,我就打開左封信黎睇。
 
        睇完之後一句講晒,對方就係一個勁怕羞、勁悶既男仔。
 
        不過其實就算佢變到幾健談、幾開放都好,我都真係無咩興趣同心情回信。
 
        點解?
 
        第一,我已經有阿修,仲同其他男仔來往做咩?
 
        第二,我大把家務同功課等住我去做,所以我先無咁得閑坐定定係到寫信!
 
        第三,寫信呢家野,真係好鬼麻煩,我唔中意!
 
        不過最衰既就係,呀媽今朝同我講話就算我點唔想回都好,始終人家都係幫緊我地家,所以禮貌上點都要做。
 
        結果,我都係惟有死死地氣咁回信。
 
        就係我落筆寫左第一句「你就係誠叔叔個仔?你好呀,我都好高興認識到你!」之後,我就腦閉塞咁坐左係書枱到。
 
        「家姐,你係到寫緊咩呀?」呢個時候芷翹走左過黎。
 
        「我係到回緊信啊......」我望一望封信,再望下自己d功課......唉。
 
        「好似好好玩咁喎!」芷翹聽完我既簡單講解之後道。「還掂我又想識下新朋友,而家姐你又咁忙,不如......就由我黎同佢傾計啦!」
 
        「下?!」我嚇左一嚇。「你意思係話你用我個名同佢傾計?」
 
        「梗係啦,佢係寫信俾你架麻!」芷翹笑住講。「反正又唔會穿煲既!最多佢想約出街個陣咪求其搵個藉口話爸媽唔俾黎拒絕佢囉!」
 
        於是乎我就諗左一諗。
 
        其實......只要我唔講,芷翹又唔講既話,爸媽係唔會知道芷翹代我筆呢件事架喎!
 
        再加上我又真係無咩興趣回信......既然係咁,
 
        「好啦!」我讓左個位出黎俾芷翹。「既然係咁,由今日開始,你就代替我用『巧瑩』呢個名同呢個男仔書信啦!」
 
        「好!」芷翹點頭道,然後就攞起支筆係到寫呀寫。
 
        就由個晚開始,芷翹就不停咁同呢個「司徒珞」書信。
 
        芷翹成日都會講佢地之間傾計個陣既笑料同趣事俾我聽,感覺上芷翹就好似真係已經同呢個男仔見過面咁,而且好熟好熟咁。
 
        「其實點解呢明明細妹你都無見過個個咩司徒珞架,但就好似已經同佢好投契咁既?」有一日我好奇一問。
 
        「唔知啊!」芷翹笑道。「但係我覺得自己已經中意左佢!」
 
        「哈哈,傻妹黎架你,都未見過人就話中意人!」我取笑芷翹。「話唔定人地係個死肥仔呢!」
 
        「肥仔又點喎,我先唔係睇樣揀男朋友既人!」芷翹嬲嬲地咁講。「其實我本來真係可以見到阿珞個真人架!因為佢真係有約過我出街......但係我又唔係真正既巧瑩,所以唔出得......」
 
        「唔怕啦,有緣份既話總會見到面既!」我安慰芷翹。
 
        「我先唔信緣份呢樣野囉!」芷翹反駁。「我相信人係要自己付出同努力,先可以得到愛!」
 
        「所以我已經決定左,下年要入讀阿珞個間中學!」芷翹好開心咁講。
 
        「嘩,呢d唔通就係愛既魔力?」我又再次取笑芷翹。
 
        「咦~~~家姐正衰人黎架!」芷翹紅都面晒咁打我。
 
        好可惜,就係芷翹升中個年,我地爸爸媽媽離左婚。
 
        由於我地家庭退出左保良局資助計劃既關係,芷翹就再唔能夠用「巧瑩」呢個名寄信俾阿珞,免得俾媽咪發現呢單「偷龍轉鳳」既事情。
 
        就係咁,芷翹就再無同阿珞書信。
 
        「其實你都已經入左阿珞間中學啦,點解你唔直接去搵佢既?」係芷翹升左中一無耐之後我問。
 
        「一黎啦我都唔知道用咩身份去見阿珞,因為我係芷翹,唔係巧瑩。」芷翹嘆氣道。「二黎就係我覺得自己好對佢唔住,因為自己當初好似粒聲唔出咁就放棄左呢段感情,搞到我依家都唔知仲可以點樣面對阿珞。」
 
        芷翹繼續補充 : 「不過係我入左黎短短三個月咋,我已經成日聽到司徒珞呢個名喇!」
 
        「佢成日幫學校攞獎,成日上台領獎架!」
 
        「咁你咪見過佢個樣囉!」我好興奮咁講。「佢咩樣架,靚唔靚仔?」
 
        「其實……」芷翹有d尷尬咁講。「因為我想保留番自己腦海中對阿珞既幻想,所以每一次我都拎轉面無望到……」
 
        「哈哈,細妹你仲話自己唔睇人地個樣!」我取笑道。
 
        「咁……係人都中意靚仔架啦!」芷翹係到撒嬌。
 
        ***
 
        時日飛快,我好快就讀中五喇。
 
        有一日既晚上,芷翹打俾我。
 
        「家姐……今日真係好特別……」芷翹既語氣用詞都有d難以理解,就好似係又開心又唔開心咁。
 
        「做咩事呀傻妹?」我溫柔咁問。
 
        「今日……阿修佢……」芷翹將佢地係譚仔既事講左俾我聽。
 
        「點解會發展成咁……」我既心,既係為阿修而痛,亦係為芷翹而痛。
 
        一個係我愛人,一個係我細妹,你要我幫邊邊?
 
        不過算啦,呢樣野我遲下先再自己解決,依家最緊要就係安撫芷翹。
 
        「咁仲有呢,聽你把聲你唔似淨係經歷左呢d野喎!」我極速轉移話題。「發生左d咩事!」
 
        「嘻嘻!」芷翹笑得好甜,甜得像食左成打糖咁。「我咪話我扔中左個男仔既……原來佢就係司徒珞!」
 
        「佢……好靚仔!」
 
        於是乎我又聽晒芷翹講關於譚仔之後既事。
 
        「咁咪好囉!」我講。「塞翁失馬,焉知非福呀!」
 
        「哈哈,家姐你同我同一個諗法!」芷翹笑道。
 
        「所以呀,你唔好再咁記住阿修個件事喇,呢件事我會處理架喇!」我安慰芷翹。
 
        「嗯!」
 
        係之後既時間我都為左搵阿修出黎而操勞,可惜既就係最後都係搵佢唔到,結果惟有放棄。
 
        不過值得高興既就係,芷翹同阿珞既感情係呢段時間裡面漸漸咁培養左出黎,最後仲要開始拍拖。
 
        ***
 
        「你仲未打算同阿珞講書信單野呀?」係芷翹同阿珞拍拖之後我問。
 
        「嗯……我唔打算講住。」芷翹諗左一諗之後講。「因為……我希望呢件事可以成為一個秘密,等到適當既時候先公開。」
 
        「適當既時候?」我問。
 
        「係呀!」芷翹笑住答。「可能係我地結婚個陣可以用黎做驚喜掛!」
 
        「又或者……可能係我地分手既時候,用黎做箍煲用既回憶掛。」
 
        「你呢個究竟係d咩跳脫既思維黎架?」我沒好氣咁講。
 
        「總之家姐你一定要幫我保守秘密!」芷翹勁認真咁講。
 
        「好~~~好~~~」我答。
 
        ***
 
        「家姐,芷翹琴晚好似係因為淋雨黎所以今日發高燒呀,好彩珞仔及時送左佢去醫院打針,依家先無事咋!」媽咪係某一個週末既下晝突然打俾我。「你得唔得閑上黎探下細妹呀?」
 
        「好,我即刻黎!」我勁快換好衫,然後由西貢搭車趕去觀塘。
 
        去到之後我就入左芷翹房睇佢,發現佢仲係昏暈咁熟睡緊。
 
        「做咩好地地去淋雨架……」我輕撫住芷翹既前額。
 
        突然間,芷翹口中唸唸有詞咁不斷係到講 : 「珞仔……珞仔……唔好走……」
 
        究竟……細妹同珞仔之間發生左d咩事?
 
        等到芷翹醒左之後,我終於搵到個機會問佢。
 
        「其實……你同珞仔之間發生左d咩事?你岩先訓覺個陣係咁講珞仔個名……」我有d不安咁講。
 
        只見芷翹愣了一愣,然後好似好想喊咁望住我講 : 「我同珞仔……分左手……」
 
        「點解會咁架?!」我驚訝咁問。「乜前幾日唔係仲好地地咁話遲下一齊去法國架咩?」
 
        「家姐,我唔想講……」芷翹似乎有難言之隱。「總之……我同珞仔一定要分手……」
 
        「係你既問題,定係珞仔既問題?」我問。
 
        芷翹搖一搖頭,然後講 : 「唔關任何一個人事架……我地既分手,只不過係一個簡單既『需求』問題……」
 
        望住芷翹一臉難色,我都免得追問落去。
 
        我諗,呢個或者正正就係芷翹當初所講既「適當時機」。
 
        探完芷翹之後,我就直接走到保良局社區服務中心。
 
        「唔該,我係檔案xxxx既細路仔,歐陽巧瑩。」我搵左一個服務大使對話。「我想你地幫我轉交呢個新地址俾呢個家庭。」
 
        假如珞仔同芷翹「巧瑩」真係有緣既話,我相信佢地彼此間總會有續緣既一日。
 
***********************************************************************
 
        我聽完Hani所講既故事之後,身體只有伴著內心既激動不斷咁係到顫抖、再顫抖。
 
        原來我同芷翹之間既緣份,早就已經被上天所注定。
 
「當初芷翹同我講分手個時,佢係同我講話因為佢feel到自己其實係無愛過我,所以先選擇分手,以免拖得越長、傷害得我越深……」我喊住咁向Hani講述當初分手既原因。「去到後來我又聽到d消息,話芷翹當初其實係因為想成全別人先至忍痛割愛,同我分手……」
 
「但因為我應承左芷翹要消失係佢生命之中,所以無可能直接問佢……」我繼續講。「所以直到依家我都唔知道邊個先係真……」
 
「珞仔,」Hani好認真咁望住我講。「我諗我可以好肯定咁同你講一件事。」
 
「如果當初芷翹係譚仔認識到既人唔係你既話,或者我都會相信第一個分手版本。」
 
「但正正因為芷翹係譚仔認識到既係唔係邊個陌生人,而係你司徒珞,所以我可以百分百肯定,第一個分手版本係芷翹作出黎既藉口。」
 
「因為係芷翹心目中,你係最特別架,司徒珞。」
 
「你既係佢曾經既遺憾,亦係佢永遠既至愛。」
 
「Hani……」我內心有股暖流不斷湧上黎。「芷翹原來一直都等緊我架?……點解我會咁蠢架……」
 
「但我仲可以點做……」我低著頭。「我應承左佢……」
 
「珞仔!」Hani突然叫左出黎。「個個所謂既承諾算得係咩呀?你唔好再用個個承諾黎做藉口黎掩飾自己既懦弱,去美化自己既懶偉大!」
 
「我……」一時之間我說不出話來。
 
「想要改變對未來的意志先係最重要架!你唔覺得即使係依家,都仲黎得切架咩?」Hani笑一笑。「我諗,你都唔想自己成為芷翹永遠既遺憾掛?」
 
Hani緩緩走過黎搭住我膊頭講 : 「其實,愛情係好特別架。」
 
「愛情既需要緣份,亦需要努力,缺一不可。」
 
「縱使幾咁努力都好,但如果彼此無緣份既話,感情最後都只會落空。」
 
這,就是我和阿娜嗎?
 
「縱使幾有緣份都好,但如果唔好好努力維繫、了解既話,緣份終會用完。」
 
這,就是我和芷翹嗎?
 
「所以,請你好好咁珍惜你同芷翹之間既緣份,努力咁做番d野去挽救啦!」
 
「說出你的願望吧!否則不會讓你如願。」
 
「去尋找吧!否則不會發現。」
 
「去敲門吧!否則門不會為你而開。」
 
「記住呀!」Hani輕輕咁攬住我。「奇蹟之門,係由自己打開架。」
 
心中既暖流,係一瞬間化成無比既動力,直貫全身。
 
「多謝你呀,Hani!」我輕輕咁推番開佢。「我知道應該點做喇!」
 
「我,依家就要去搵芷翹!」
 
 



『不去試試看的話,就不會知道那裏是否有答案。』
『即使那裏沒有答案,再找其他的問題就好了。』
 
***********************************************************************