《妳做咩將成碗譚仔倒落我個頭上面！？》: 最終章

最終章
 
「咁我走先喇！」我向Hani揮著手。「好多謝你今日對我既啟蒙！」
 
「傻啦，今次既對話本來就係天注定既，所以都唔關我事！」Hani笑說。
 
「咁……多謝你既努力！」我亦笑住咁講。
 
「快d走啦，門就係前面咋！」Hani講。
 


「嗯！」我點一點頭。「再見喇！」
 
「聽日我會送你機架喇，byebye！」Hani莞爾一笑。
 
我望一望個天空，原來太陽已經快要下山。
 
於是乎我轉過頭來，直接向著西貢市中心狂奔。
 
點知一行到出去馬路口，就發現依家嚴重塞車，出番去將軍澳既公路簡直係水泄不通。
 


我沒有半點猶疑，舉步就往將軍澳方向跑去！
 
一路跑一路跑，我與芷翹既回憶就不斷咁泛起，令我落淚。
 
        呢個時候，我腦海中響起左一首歌。 
        唔知道跑左幾耐之後，我終於跑過左塞車既車龍尾，走到去一條暢通無阻既馬路上。
 
        我截左一架的士，然後身水身汗咁跳上車向司機大叫 : 「唔該司機，我要見芷翹！」
 
        「咁即係去觀塘XX苑啦下話？」司機一野砰埋左道門，然後就開始搖頭又尾擺咁向住目的地前進。
 
        哈哈，依家D司機真係「一理通馬國明」喇，竟然連我講到咁1999佢都明白！
 
        咦唔係喎咪住先......有乜理由一個普通既的士司機會知道芷翹住邊！


 
        「點解你會知道芷翹住邊架......哎？！」正當我覺得有d奇怪，所以打算質問呢個司機既時候，我突然發現！
 
「的...的...的士佬？！」
 
        無錯！係我眼前既的士佬正正就係當日完左ball之後車我同芷翹番屋企個個！
 
        屌，唔掛得之佢知道芷翹住邊啦！
 
        之但係點解佢會無啦啦係到出現夸！
 
        「點…點…點解你會係到架！？」我口都窒埋咁講。
 
        「身為一個稱職既的士佬，我既職責就係要協助有需要既市民以光速既速度去到目的地！」的士佬一路俾油一路講。「所以我出現係呢到，其實係一件非常合理既事情！」
 
        屌！講野玄到咁你不如去做和尚啦！
 
        突然間，的士佬從倒後鏡望一望我，然後講 : 「小朋友，你同女朋友分左手呀？」
 
        ……呢個死人的士佬，永遠都係咁料事如神架喎……
 
        「嗯。」我輕輕點下頭。
 
        「你有無聽我講咁做，去令佢每一日都開心咁笑？」的士司機講。
 
        「好對唔住，我無……」我慚愧咁低下頭。「我做唔到……」
 
        「小朋友，」的士佬笑左一笑。「有好多野，其實唔係自己做唔到，只係以為自己做唔到姐。」
 
        「相信我啦，你女朋友一定會原諒你既幼稚架。」的士佬好肯定咁講。「因為我睇得出，你擁有想改變未來既決心。」
 
        「嗯……」我被的士佬突然既鼓勵搞到好想流眼淚。「多謝你……」
 
        「咁快就講多謝？」的士佬沒好氣道。「等你追番你女朋友之後先再一齊黎搵我，然後同我講多謝啦！」
 
        就係咁，的士佬就開始專心全速行駛，希望協助我爭取到幸福。
 
        「到喇細路！」的士佬喚醒左個個正在閉目養神既我。
 
        我打開雙眼一睇，發現已經到左芷翹家樓下。
 
        「唔該晒司機！」我俾完錢之後就走到車外面。
 
        「細路！」的士佬拎轉身望住企係車門外既我講。「無論結果係點都好，都要記住一樣野呀！」
 
        「奇蹟之門的鑰匙，永遠也是存在於自己的手心之中！」
 
        係我未反應過黎既時候，的士佬就已經一野閂左道門然後走左。
 
        究竟……佢係何方神聖？
 
        不過都係算啦唔深究喇！
 
因為，我仲有d更重要既事情等緊我去做。
 
我一定要係聽日去法國之前搵到芷翹，然後同佢表明自己既心意！
 
我暗自下定決心，然後朝芷翹家進發。
 
轉眼間我就到左芷翹家門前。
 
望住呢道曾經熟悉但現在卻變得陌生既木門，我先至赫然發現原來自己已經成3個月無黎過呢到。
 
換言之亦都即係話，芷翹已經等待左我成3個月……
 
究竟，我同芷翹之間既感情，會唔會就同木門既命運一樣，已經由熟悉變為陌生呢？
 
不過無論結果點都好啦，我都要嘗試去挽救！
 
我按下門鈴。
 
「叮噹~~~叮噹~~~」只有一段清脆既電子聲回應著我。
 
睇黎芷翹屋人無人喎……
 
唔好喇，保險d，都係直接爆門啦！
 
於是乎我一腳就踢開左道門！
 
講笑姐，我有鎖匙架麻。
 
「咔察。」我扭開左芷翹既家門，發現裡面黑漆漆咁，空無一人。
 
我快速係裡面走左一轉，然後再入埋芷翹既房check下，不過都係無發現。
 
「唉……芷翹，你到底係邊……」我坐左落芷翹將床到。
 
呢個時候，芷翹久違既體味再次由床單之中傳入我既鼻子。
 
呢種嗅覺既刺激，令我不自覺咁勾起左一d回憶。
 
「仲記得個陣，我同芷翹係呢到一齊攬住訓覺……」我輕撫著芷翹既枕頭。
 
我徐徐企番係身，然後四處張望芷翹既房間。
 
呢到仲係同以前一樣，咩都無變過。
 
無論係一枱一凳，一角一物，都令我產生著無比既懷念。
 
咦咪住，點解衣櫃隔離會多左舊咁大件既野既？
 
我走到去個舊野面前，先發現原來係一個畫架。
 
畫架既上面釘住左一幅畫布，而畫架既後面則挨住了一支結他。
 
我愣住咁望著眼前既景物，完全不能置信。
 
「點解……會係到架……」我既眼淚又再次不能控制地落下。
 
他媽的……究竟我今日仲要喊多幾多次？
 
我望多左一陣幅畫之後，就決定要落街繼續搵芷翹。
 
「一定要等我番黎呀！」我對著幅畫說，然後就關上芷翹房間既門。
 
我出番去客廳穿好鞋，然後就離開了這個家，重回到茫茫人海既街道上。
 
你問我點解唔選擇留係屋企到等芷翹番黎？答案好簡單。
 
試問一個已經浪費左3個月時間既人，又點會願意再浪費多一分一秒黎望天打掛等運氣到？
 
落到街之後，我參照聖誕節個晚搵芷翹既路線去行，希望能夠找尋到芷翹既蹤影。
 
當然啦我無上次咁笨，一早就去左譚仔搵！
 
可惜，芷翹並唔係個到。
 
從譚仔開始起步，走到芷翹家樓下的韆鞦，再到學校對出既公園+球場，再到apm，再到各個大街小巷，幾乎整個觀塘區我都已經行均晒。
 
可惜，仍然係搵唔到芷翹。
 
呢個時候，我諗起Hani既一番說話 :
 
「縱使幾有緣份都好，但如果唔好好努力維繫、了解既話，緣份終會用完。」
 
唔通……我同芷翹之間既緣份……已經用完？
 
唔會架……唔會架……
 
我打開手機既屏幕之後望一望，先至發現原來依家已經勁夜喇，成9點。
 
除此之外，我仲見到阿娜同Hani都有send wtsapp俾我。
 
*******************************************************************
 
阿娜既訊息 :
 
珞，我今日終於能夠鼓起勇氣打俾芷翹，同佢講清楚晒喇！
 
我明白到自己唔可以再咁自私，因為一己私慾而傷害三方，最後仲要拆散一對咁美好既姻緣。   
 
所以我向芷翹講左對唔住，共且希望佢能夠重新挽救你地呢段感情。
 
芷翹並無直接回應我，只係同我講左句 : 「雖然我一向都唔相信天意呢樣野，但係事到如今，我已經再無力氣行落去。」
 
「所以我惟有選擇相信緣份。」
 
「呢段感情，隨緣啦。」
 
「或者，如果我同珞仔之間仲有緣份既話，就算我地相隔幾咁遠，都總能夠係番埋一齊。」
 
「但又或者，我同珞仔之間，早已緣盡。」
 
「緣圓還是緣完，看天意吧。」       
 
哥哥，求下你，你一定要努力追番芷翹呀！！！
 
我知你一定得架！
 
因為，你係芷翹心中最愛既人黎架。
 
妹妹上。
 
*******************************************************************
 
Hani既訊息 :
 
        珞仔，搵到芷翹未？
 
        如果未既話，千其唔好放棄住！
 
        請你每當係想放棄既時候，就閉上雙眼諗一諗，自己同芷翹係經歷左幾多野之後，先能夠走到今日呢步！
 
        然後你就再諗下自己內心個股熾熱既暖流，諗下自己係幾咁想同芷翹表明清楚內心既想法！
 
        當你識咁諗既時候，你就唔會咁輕易搵藉口放棄架喇！
 
        最後，希望你能夠快d搵到芷翹啦！
 
        另一個巧瑩上。
 
***********************************************************************
 
「多謝你地兩個……」我緊握住手機。
 
無錯喇，我點可以咁輕易就認輸架！
 
學阿娜咁講，我一定得架！
 
學Hani咁講，我一定唔會放棄架！
 
我既唔可以令呢兩個女人失望，更加唔可以令我心愛既芷翹失望！
 
我合上雙眼，靜心下來咁思考自己依家應該要點做先可以搵到芷翹。
 
突然間，一個天方夜譚既想法從我腦海中掠過。
 
「哼哼……我究竟係咪傻左呢……？」我無奈咁笑一笑。
 
不過唔知點解，我卻深信著這個想法必定能夠讓我再次遇上芷翹。
 
於是乎我拔足而步，重新向著譚仔走去。
 
***
 
來到譚仔既門前，我抬起頭來觀看譚仔既招牌。
 
想當初，呢間譚仔就係我同芷翹相遇見面既地方。
 
而我地既故事，亦係由個一晚佢將成碗譚仔倒落我個頭上面開始再次譜寫。
 
所以為左能夠再次遇見妳，我決定……
 
重演一次。 
我一步步慢慢走進譚仔，然後坐回當初既位置。
 
「呀姨唔該，要碗雞肉牛丸清湯！」我舉手。
 
「okay，好快黎！」姨姨笑說。「今日唔見你隔離個靚女女朋友既？」
 
「嗯，今日得我一個。」我苦笑。
 
呀姨落完單行開左之後，我環觀整間舖頭……嗯，芷翹果然唔係到。
 
不過唔緊要，我知道妳一定會出現。
 
「呀仔，你既譚仔！」姨姨遞左一碗冒著白煙既湯面到我面前。「慢慢食啦！」
 
哈哈，對唔住啊姨姨，要辜負你一番苦心喇。
 
因為，我唔係諗住食。
 
我一手攞起呢碗麵，然後向著自己既頭頂倒落去。
 
一碗冒著白煙既譚仔湯麵，就好似罰球咁以時速三百幾公里既速度飛向我臉上！而伴隨住既，係一把可愛動人、但同說話內容格格不入既女性聲線。
 
芷翹……我好想再次見到你！！！
 
「噠！」一攤味精湯伴隨著麵和配料降落到我既頭上。
 
我放開手上既碗並垂下雙手，於是乎碗就徐徐跌到地上，發出「的咚的咚」既聲音。
 
「喂，佢係咪痴線架，咁樣倒自己都有既？」
        「依家d香港人大壓力呀，所以咪多左d痴線佬囉！」
        「哈哈，佢好撚on9！」
 
        係我身旁既mk仔、師奶、學生，都不停竊竊私語咁討論我。
 
        啊唔係，正確d黎講，係明講我，明笑鳩我。
 
        我抬起頭來周圍望……
 
點解，都係唔見你架，芷翹……
 
        聽著身邊既嘈音，我眼前的畫面仿佛變到天旋地轉，令我抖不過氣來。
 
        我頭上既熱湯從我臉上緩緩落下，滾燙得令我強合雙眼，渾身顫抖。
 
        咦，原來我並唔係因為燙所以震，而係因為……
 
        我又哭了。
 
        「男人老狗係到喊，係咪on9架！」一個mk仔道。
 
        「咪臭係！」旁邊一個師奶和議。
 
        「哈哈~~~！」遠處一個像是剛進來不久既食客竟然企左係身恥笑我道。「其實我真係好想知道，點解你會自己倒自己咁蠢架？」
 
        面對呢一個嘲諷，我既身體漸漸停止了顫抖。
 
        「我咁做真係好蠢啊可？」我靦腆一笑。「但係我一d都無後悔過。」
 
        「仲記得我同一個女仔既相遇，就係由呢到被佢扔麵開始。」
 
        「我地經歷左重重波折之後，最後終於能夠係埋一齊。」
 
        「但直到有一日，女仔突然話要離開我。」
 
        「可惜因為我既幼稚，我無努力去抓緊佢。」
 
        「結果，我地消失左係彼此既生命之中。」
 
        「直到依家，我終於識後悔、識珍惜。」
 
「所以，我希望用同樣既相遇方法，讓我能夠重遇番呢一個……」
 
        「呢一個，我曾經輕易放左佢走既女仔。」
 
        「呢一個，我一直以來都深愛著既女仔。」
 
        「呢一個，我以後都唔想佢再離開我既女仔。」
 
        我緩緩抬起頭黎同個個企左起身既食客對望著。
 
        「如果俾你見番個女仔之後，你又會點做？」食客哽咽咁一路講一路行埋黎。
 
        「如果我能夠見番佢既話，」我亦緩緩向前行。「我會一手攬住佢，然後同佢講，」
 
        「永遠留係我身邊啦，好無啊，芷翹？」我踏前一步，然後將眼前呢個同我一樣淚流滿面既芷翹擁進懷內。
 
        「咦，衰人，你好臭呀！」芷翹破涕為笑。
 
        「好心你唔好破壞呢個咁溫馨既氣氛啦！」我裝作沒好氣咁講。
 
        「咁真係好臭麻！」芷翹伸左隻手去我個頭到抽左條雞肉絲出黎。「你依家咁樣真係好好笑……哈哈哈！」
 
        「為左你咋，仲笑！」我擁得芷翹更緊。「我好掛住你啊，芷翹。」
 
        「我都係呀，珞仔。」芷翹笑中有淚咁講。
 
        我地攬多左一陣之後先發現，依家個場面好尷尬，勁多人望住……
 
        「芷翹……好多人望住我地……」
 
        「所以呢？」芷翹絲毫沒有想鬆開我既意思。「我都無嫌你臭啦，所以你唔準鬆手先架！」
 
        「不如……上你屋企俾我沖完涼之後先再攬過？」
 
        「嗯……又好姐，嘻嘻！」
 
        「仲有呀，不如呢……」
 
        「嗯？」
 
        「不如……一齊沖？」
 
        「痴線架咩你！」芷翹吱左我條腰一下，然後莞爾一笑。
 
        「嗯…… はい <3 。」