係呢個私服玩左咁耐,第一次見到光頭當住咁多自己人面前受到咁樣既屈辱。

光頭既火爆性格,戰神唔係唔知。

同預計一樣,光頭訓係地下,丁點兒都唔理企係佢頭上既戰神,更莫論投降。光頭直接命令在場既日殺成員:

「靠,同我殺!」

廿幾個人,一人一箭,完全冇任何反擊餘地。殺字一出,戰神立即訓低同光頭重壘係地板上。





光頭:「我忍你忍得耐,今日開始GM都冇面俾!我同你誓不兩立!!」

戰神:「悉隨尊便,垃圾。」

明眼人都睇得出,戰神係特登激嬲光頭。戰神,以至佢成個血盟,一向都係不問世事,但今次卻一反常態,先係主動宣戰,而後殺完仲要羞辱光頭,根本係全心挑釁。同佢開戰,戰神有乜著數?完全諗唔明白。

我決定直接密戰神,問佢:「點解你要同日殺開戰?」

戰神既答案簡單直接:「佢忍得我耐,我何嘗唔係忍得佢耐!」





皇族同日殺開戰呢件事,盟內討論異常熱烈。

紅問:「咁仲罰唔罰韓修修寫千字文,佢拖怪殺soso喎?」

基本上冇人理會呢個問題,因為soso問既問題更加深入重點:

「我地係咪應該要幫戰神手?講到尾成件事係因我而起。」

戰、不戰?幫、唔幫?





幫戰神手,意味住和約全毀,等同於全面開戰,即係回復以前既狀態,唔係,係更什,因為壬生一族已經係我地同盟,紫幽一定會被擺上台。結果,一係世界大戰,一係解除同盟。

唔幫戰神手,道理上根本講唔過去。無論戰神心入面開戰既真正原因係點,「因為日殺無理殺害紅樹葉」而幫手開戰,就係台面既原因,我地唔可以唔出聲。

我真係唔識揀。

我忽然明白,點解當時咪嚕,即係紫幽,會選擇第三個答案--另開新盟。

當日咪嚕面對既問題,終於都黎到我身上,做盟主,避得一時,避唔到一世。

薰:「無論點我都會幫戰神,我最多用番我自己盟,唔掛紅樹葉名!」

薰本身就係魔界分裂後其中一個小盟盟主,而家不過係嫁樹隨樹,跟埋入黎紅樹葉,佢自己本來個盟依然運作緊。而且,薰不嬲都對靜心冇乜好感,又同戰神相熟,幫手係可以理解。

薰繼續:「樹,幫我。」





樹冇say no,佢一向係主戰派,同理想世界個蒼日有仇咁款,有得打當然打。

soso:「唔幫手我心入面都過唔去!」

暗殺:「我都想幫戰神。」

……

睇黎,根本就冇揀既餘地。

答案擺在眼前,打就打硬,但我始終唔想小事化大。

「打,我地幫手。薰你用你個盟宣戰日殺,我地用分身打,全部分身加入薰個盟,分身account我派俾你地,乜職業都有。你地一邊打,我用紅樹葉名義同日殺傾叫佢地同戰神和解,我唔想累紫幽。」





用紅樹葉個名宣戰既話,藤能瓜瓜能藤,壬生一族做得我地同盟實走唔甩。我唔想擺紫幽上台,既然薰提出用自己盟開戰,正好將計就計,用薰個盟宣戰,仲好。因為而家日殺已經淪為理想世界既pk盟,以前仲係韓信做盟主果陣,日殺只係一個小盟,邊有可能隨時班廿幾個人出黎開打?根本呢廿個人大部份都係理想世界盟員既分身,佢地想開戰又唔想做臭自己個大名,就用日殺黎打代理戰爭。

既然「理想世界」呢個名完全置於戰爭外,我地又何必將「紅樹葉」呢個名插入去?佢地要將戰爭規模局限於日殺,我地亦將戰爭規模局限於薰既小盟。

薰係行動派,一聽完我既說話,就開番佢果隻盟主分身"晴紫",用佢個盟"星空物語",向日殺宣戰。

又係世界頻道大叫:「靜心,我擺明幫戰神,怕就唔好接戰!」

韓修修接戰,順便回炮:「分左手都咁恩愛,好羨慕你地。」

薰當然唔會收口:「你夫婦感情破裂咩?不如我幫你介紹男人?」

兩個元老級八婆鬧交,根本就唔理咩秘密唔秘密,講野少少情面都唔留,所有野都直接訴諸世界頻道,真係唔知佢地到底積落幾多怨。

我同樹無暇理會,只係默默地分發分身account,樹就用係星空物語既分身不停收其他分身入盟,霎時間,呢個小盟多左十幾個盟員。





星空物語入面另一個骨灰級玩家"云淡風清",早已經收到薰同樹既命令,係血盟入面問:「總之見日殺就殺?好似以前咁?」

樹答:「係。」

我又千叮萬囑同樹講:「麻煩叫你老婆,唔好好似以前咁,明明用分身又用白頻叫自己人名呀。就算全世界都知係,總之紅樹葉個名唔出得!」

然後,大概凌晨時份,我開始搵亞格斯。

亞格斯雖然只係一個木偶,韓修修既扯線公仔,但係好歹都係名義上既理想世界盟主,又係盟入面既元老,佢既說話始終有份量,只要拉攏到亞格斯,就乜都有計傾。更何況,整個理想世界入面,我剩係同亞格斯算有熟。

我密亞格斯:「好耐冇打過,不同去古魯丁玩下?」

呢個時間,咁樣既邀約,傻既都知所謂玩下唔係真係玩下咁簡單。





但亞格斯爽快地答我:「好呀。」

就如口講既目的,我同亞格斯係古魯丁pk場大戰左三百個回合,唔知打左幾耐,直到大家都身心疲累,就坐係旁邊,抖下。

就係白頻,我都未出聲,亞格斯倒直接了當:「做完運動,有咩事不妨直接講。」

我都唔隱瞞:「老老實實,你地理想世界打算一直保持中立?」

亞格斯反問:「你地紅樹葉係咪又想一直保持中立?」

我老實回答:「我唔想佢地因為紅樹葉開戰。」

亞格斯既回應卻略帶玩味:「傻啦,佢地三個唔妥對方好耐,紅樹葉係借口黎既姐。」

我就係鐘意亞格斯份人夠真。

「唔妥好耐?我唔知喎?可唔可以講我聽俾我了解下。」

「魔界你應該聽過?魔界年代既事喇……」

然後亞格斯就同我上左一堂個幾鐘既歷史課。

成件事其實好小事,基本上,五句就可以總結:戰神一向乜都唔理我行我素,靜心就一向霸道乜都要管,魔界盟主冇玩後傳位靜心,戰神唔受靜心管,嘈交、分裂。

我卻有小小好奇:「魔界盟主我有冇見過?」

突如奇來,白頻彈出一句--戰神:「魔界盟主咪係我細佬。」

真係嚇一嚇!望一望四周,根本只得我同亞格斯係到,何來個戰神!?

又係突然間,我身中一箭,戰神就係我旁邊出現!

「頂你幾時係到隱左身!!?」

「盟主原來係gm!」亞格斯反而係驚訝呢點,又問:「點解gm傳位俾靜心唔係俾你!?」

戰神剩係答左一句:「商業機密。」都唔知係答緊我定答緊亞格斯,然後就轉話題:「葉,你想我地停戰?」

我唔直接答戰神:「你地咁搞法,咪剩係搞著d新手,個server又冇人黎玩…」

戰神打斷我:「得,我都想停戰。我都唔想成日走黎呢到避難,佢地一日嘈到黑好煩。」

我笑左,問亞格斯點睇,亞格斯就話會幫我同韓修修講。

我答應戰神:「okok,我叫樹幫你地傾停戰。」