係亞格斯既穿針引線下,韓修修、戰神兩人就企左係海音城鎮上,由樹主持大局,傾停戰。

其實亞格斯只不過係我地俾佢既下台階。日殺一邊受緊小冷帶隊打遊擊,另一邊又受緊薰既星空物語,亦即係實際上既紅樹葉成員狙擊,兩班人都係唔洗練功,食飽飯冇屎痾,日日專門打打殺殺既。相反日殺入面新手比較多,長期落去日殺先係蝕底果個,而我地根本冇野輸,所以日殺冇得唔同戰神傾停戰。

………

樹:「……戰神既條件係,靜心完全退出理想世界,包括任何分身。」

「我可以開其他人既account係咪?」韓修修問:「例如亞格斯?」





我心諗當然唔可以,咁同冇開條件有乜分別?

但戰神係戰神,佢根本懶理:「可以,佢地既人物,我唔干涉。」

韓修修:「咁我都有要求,我要戰神你所有人物,唔可以入紅樹葉同壬生。」

戰神係隊頻同我地講:「我係到偷笑,哈哈。」

點解要偷笑?因為韓修修呢個條件,亦等同於無條件。





其實兩邊開出既停戰條件,都一樣唔係條件,亦都冇任何約束力。呢兩個所謂條件,講到尾根本就係雙方要比對方既訊息,或者換一個說法:威脅。

上面既對話,係我既角度,應該係咁樣解讀:

戰神:「想停戰?你話日殺還日殺丫麻,咁理想世界而家係亞格斯話事,你唔再插手管理想世界內務我就唔打你。」

韓修修:「你要我唔理理想世界,ok,冇問題呀,但係你都唔好插手管紅樹葉既事。」

韓修修之所以會開咁既條件,只有一個原因,就係佢認為戰神加入左紅樹葉,仲係紅樹葉管理層。所以戰神先會偷笑,因為戰神由頭到尾都只係一個外判打手,攻城、開戰等等佢根本半個idea都冇出過。韓修修將理想世界同日殺既關係套用係我地紅樹葉同皇族身上,想分開我地同戰神,卻唔明白,紅樹葉同皇族由頭到尾都係兩個集團,而戰神幫手亦不過係用個人名義!





anyway,唔理交涉雙方實際上係點諗,樹無視隊頻內戰神既閒語,繼續佢主持人既職責:「靜心既條件,戰神你同唔同意?」

戰神:「同意。」

一句同意,事就這樣成了。

戰神同韓修修隨即辦理停戰手續,唔洗一陣間,日殺同皇族兩盟正式解除戰爭狀態。

樹盡埋佢主持人既最後責任,print screen,將對話內容存檔留底,兩隊就咁散band。

同我一齊列席談判既soso有點疑慮,係隊伍頻問:「皇族日殺停左戰,我地仲打唔打?」

樹諗都唔洗諗,即答:「打,想打咪打,皇族停戰之麻,又唔係星空物語停戰。」






當時既談判存檔照。 註: 人物名同故事內係有小小出入,因為實際上分身眾多,一個人有好多名,係故事內為免混淆而統一名字。

………

我地攻破亞丁城既一刻,私服既黑暗時期就開始。

皇族、日殺既血盟戰,只係打左兩三日。但係紅樹葉既代理戰爭--星空物語、日殺之間既血盟戰卻一直持續。就好似中東戰爭咁,由朝到晚,由晚到朝,得閒就射兩炮,永冇完結既一日。但係因為一直名義上開戰既係"星空物語","紅樹葉"本盟係呢段期間一直都冇受任何炮火威脅。反而憑藉亞丁城主既威名,我地重新開始招人,透過亞丁城既稅收,亦開始重新建立盟內既福利制度。於是星空物語既打手愈黎愈多,什至連大綠等等壬生一族既好戰份子,偶爾都會用係星空物語入面既分身抽下水。

呢批分身本來就係以前為左補刀而練,專門用黎抽水、打野戰,又全部都有好武器,就連新手都可以好好控制。

但係同時間,日殺既盟員愈殺就愈多。日殺唔同我地,韓修修冇咁多分身係手,佢地既盟員,全部都係黎自理想世界--退出理想世界後,加入日殺。原來唔管理想世界既意思,就係反過來,將成個理想世界既人俾晒日殺!

不過韓修修將日殺同理想世界兩個盟既盟徽統一,兩盟用同一張圖做佢地既徽章,唔仔細睇根本察覺唔到邊個換左盟。係呢段時間,理想世界既高級人員不停過檔日殺,而新手就留番係理想世界。同時間,理想世界坐為奇岩城主不斷招人,而日殺就一個新人都唔收,剩係吸納打手,名符其實日日殺人。

韓修修知唔知星空物語既打手大部份係我地盟既人?知,就算冇証據佢都一定係咁諗。早係靜心尚在果陣佢已經估呢批分身係我地既人,而家當然係同樣想法;更何況星空物語既盟主"晴紫",個正身,薰,就係我地盟入面。





「又如何?吹我地唔漲。」樹一邊用分身"打獵",一邊係密頻同我講。

「有冇睇過論壇既報告區?韓修修拉左一大堆人,不斷要求gm重新開放自由pk,gm話考慮下。」我左邊睇緊論壇,右邊係密頻答樹:「唔知佢想點,係咪想開放pk直接同我地開戰?」

樹卻悠然非常:「唔記得左仲有三盟和約?除非佢地唔想食龍。更何況,打咪打囉,有紅係到,怕咩。」

樹一向都係主戰派,佢覺得開戰根本冇問題。

我唔同。

我係利益派,冇利益既野我唔會做,開戰係雙輸,兩敗俱傷。

韓修修呢?唔知咩派,但絕對唔係死忍派。樹有風駛盡利,恰得就恰,韓修修一定會有動作,聳容gm開放pk,背後絕對有其打算。





結果,四五日後,唔知gm食錯咩藥,真係開放番任意自由pk。

gm什至冇做任何宣佈。開放pk呢件事,係由紅,係亞丁城堡入面,冇啦啦一招"七箭"秒殺我話俾我知--

「阿葉哥,咁屎架,仲話自己全天二最厚血,一下就死。」

「!!!?點解你殺到我!!!」

「你屎咪殺到你囉。」

「我套防加廿幾咋!你把野+2000呀!差100倍,係一百呀!」我冇紅咁好氣:「仲有,我係問緊點解唔係城戰你都對我開到弓,唔係話你殺到我咁叻叻呀!」

我地意識到係gm偷偷地改左規則後,第一時間就係問戰神。

戰神既回答卻令我失望:「開左咩?我都唔知喎。」





我實在不安。連戰神都唔知?真唔知定假唔知?

好奇怪好怪異。就好似空城計一樣,韓修修可能實際上咩都冇搞,但係,萬一有呢?如果真係有計劃呢?冇準備唔通等死?但係眼下,最緊要係唔好自亂陣腳。

我決定搞一次聯合屠龍,希望係屠龍戰上可以測試一下,睇下韓修修到底搞乜鬼,同時亦正好履行三盟和約既義務。

「紅,打到人呢件事唔好公開。」

紅大感不解:「遲早都會知架啦個ser咁多人。」

我答:「冇幾多人會好似你咁明知唔打得都手痕打人。gm冇公開,就配合佢由得d人自己發現。」

另一方面,我密亞格斯,商量再戰上次我地三盟聯合都殺唔到既王--巴列斯!