【真人真事】當年中七AL，我打左成年天堂二，但我無悔！: 71-矛與盾
一枝穿雲箭，千軍萬馬來相見！
呢句說話果然冇錯，紅一箭發出，迎面就係巴列斯一個火球轟向紅，唔係…係兩個…四個…八個………一時間，巴列斯幻化出無窮量咁多個分身，部份重壘埋一齊，都數唔到有幾多隻，千萬個火球同時轟向紅！莫講話反擊，紅根本連擋都擋唔住，一箭發出就被瞬殺！
「韓信你做騎士既，拎住個盾就同我去擋王啦，我弓手擋條毛咩。」望住巴列斯，訓係地上既紅喝道。
巴列斯眾多分身入面，就只有一隻係正身，打人最痛、打佢就唔痛果隻就係正身。而攻略巴列斯既要點就係盡快搵出呢一隻正身，分開佢同班分身s，圍嘔。
韓信見到紅既慘狀，卻大聲號令：「一齊衝入去吧！」
此話一出韓信就一馬當先，衝入巴列斯群當中，瞬間就被無數火球掩埋，但係火團當中，卻約隱約閃出橙圈－－韓信不停飲橙汁，居然成功保住條命！
大伙見到韓信咁勇猛，精神為之一振，士氣都番幾番，就隨著韓信衝前，攻向巴列師群。
樹亦都立時發令：「分身死完會再分，唔好戀戰，快快手搵隻正身出黎拉佢出pk場，特別硬果隻就係正身！」
同時間，我同紅通緊電話：「巴仔一下打你幾多？」
紅：「平均一下二千六。」
二千六，紅作為弓手得果七八千血，即係頂三四個波就玩完。騎士俾到盡都只不過係萬四萬五血，如果照番二千六計，韓信最多都係頂到六個波，但現場分身數目又何止六個？閒閒地每一下都有十幾個火球射埋黎，按道理韓信應該同紅同一下場，連橙汁都飲唔徹就已經死左。
但偏偏呢一刻，韓信就係我面前，硬生生頂住左巴列斯群既火球，唔算好興鬆，但仍然遊刃有餘。
我愈望呢個伺服器入面第三把+1500既擁有者，就愈覺得奇怪：
「+1500武器，應該得+375防，就算騎士對防有加成都應該頂唔到。」
1500/4 = 375。至今出現過既贊助武防全部都係按照4:1呢個比例分配，紅+2000武就+500防、戰神+1000武就+250防、亞格斯+500武得+125防，就連普通玩家既上限都唔例外，+100武+25防。
紅卻答我：「其實買武器果陣，gm冇比+1500連個option比我。」
我而家先知：「有options既咩？」
「得+200、+500、+700、+1000四個套餐。」紅唔俾機會我發問，接埋落去講：「唔使問，我係特別offer，全ser最高攻，所以佢先俾把+2000我。」
「啊，即係+1500都係特別offer？唔怪得之佢地係買+1500而唔買同你同級，原來你係"最高攻"……」
一講到"最高攻"呢三個字，一個念頭就係腦海閃出：
「咪先，你既特別offer就係"全ser最高攻"？」
「冇錯，全ser最高攻，冇人可以高過我。」
「咁防呢！？」
「um…er…ah…」紅似乎意識到問題所在，我諗應該係紅買左呢把"全ser最高攻"兩個月之後，第一次思考呢個問題，佢er完之後答我：「防呢，應該就，er，唔包最高既。」
突破盲點！
既然有全ser最高攻，又有次高攻+1500呢兩個特別offer，整多個"全ser最高防"又有乜出奇？係韓信果把黃光+1500單手劍下面既，根本就唔係咩+375防，佢係"全ser最高防"！仲高過紅既+500防！
「唔怪得之佢咁擋得，食完炮雷歐波爾德都仲頂到咁耐。」
攻亞丁果陣，理想世界最有威脅既一次進攻就係最初一次韓信既單兵衝鋒。先係衝破紅把守既封印室門，食一炮秒殺亞格斯既最強魔法雷歐波爾德，再食埋足以秒殺韓修修幾次既瞬閃+爪攻擊連環combo，都仲死唔去，仲可以向我隻火星人不停盾擊！直到最後受葉同戰神狂斬先圍死佢。如果唔係紅果隻+500地龍介指既抗暈效果，攻亞丁早就失敗。
「以後呢個人真係要小心提防。」我心裡默念。
呢一刻，樹等人既炮兵隊已經搵到巴列斯既正身，正準備拉出分身所在既pk場範圍。
而我，就企係場外，美其名係等炮兵隊拉隻正身出黎，實際上係一邊觀察，一邊思考。
我諗緊韓修修既小動作，同韓信呢套防有咩關係。
亳無疑問，韓信呢套野一定係最近先買，因為呢把黃光劍，第一次亮相就係亞丁戰。係攻亞丁之前，我地合作屠火龍、地龍果陣，從未見過佢用呢把黃光伊克魯斯劍，用黎用去都只不過係紫光雙刀，或者普通既+100單手劍配盾。
gm答應韓修修秘密開放pk，韓信買全ser最高防。
係咪應該調轉？
因為韓信買左"全ser最高防"，所以gm答應韓修修開放pk？即係見你地熟客仔，買菜搭條蔥俾你？
想開放pk，意味住韓修修想同我地正面開戰。但係開放左幾日，韓修修都只係不停換人入日殺，繼續同我地打代理戰爭，一直都只係打緊薰既盟，冇開過紅樹葉波，又係點解？
我本以為透過呢次一齊打王，可以睇出少少端兒，點知到而家樹已經拉左隻巴列斯正身出黎，除左韓信好擋得之外，我乜都睇唔到。韓修修、光頭、蒼日等等人依然只係專心打王，根本冇異樣。
我決定做下反應測試。
斬斬下巴列斯，我按實ctrl進行強制攻擊，一刀"壞滅衝擊"斬向巴列斯，之餘，前方所有人都同時受我劍氣所傷！仲一刀秒殺左暗殺、煌、as等幾個皮簿既行者，我亦都瞬間變成紅人！
「咦，點解會咁既，呢到唔係pk場範圍都斬到！？」我扮無辜。
韓修修都假扮驚訝：「開放左pk？」
但大部份人都係真驚訝：「點解會斬到玩家！？」
我唔知日殺入面有幾多係扮野。但我呢一下範圍攻擊係突如其來，事前從無徵兆，冇人會預知到我打打下巴列斯會按實ctrl打人。除左韓修修一直防住我之外，我相信大部份有份出聲既人都係真驚訝，佢地真係唔知情。
而問題就係，呢班真驚訝既人，得一兩個係屬於理想世界。
as既反應係：「邊有人打打下王會按ctrl強制攻擊！」
打人同打npc唔同。係非戰場要對玩家作出攻擊，一定要按實ctrl打，所以正常情況下係冇玩家可以"誤傷"其他玩家。
「我手指抽筋唔小心掂到，點估到會打到人姐！」我侃侃而談，又邊觀察眾人反應。從as既說話，表明呢條友肯定一早就知。
理想世界同日殺既人，根本一早就知道開放左pk。
而呢一刀之後，冇人再可以扮唔知。
我好期待接住落黎佢地既行動。
成功隔離巴列斯既正身同分身，意味住今次將會係我地第一次擊敗巴列斯。全靠呢個好擋得既韓信，係pk場入面吸住果幾十隻分身，我地先可以拖到隻正身出黎。
冇左分身係四周不停放火球護體，巴列斯就有如脫殼蝸牛，一攻即破，奉獻出佢既boss飾物－－巴列斯介指。
巴列斯介指係死靈法師既神物。但就算唔計佢加既魔攻，比普通人用，佢都有一個神力，就係魔防+12%。12%好似好少咁，但問題係，呢個只係基本數字。12%既魔防，透過buff放大後，加出黎既數字係好驚人，尤其是係韓信呢種本身魔防就高，加完更加唔洗打。
「bid唔bid好？」紅問。
攻佔亞丁城至今已經有十靚日，收入有百幾億，但係睇怕都唔會夠錢bid。
「喇你唔好亂叫亂台價，今次bid咩等樹話事。」說罷我就擺係到掛機，換左另一隻分身，係"風之谷"入面既分身。
當然唔係偷懶，我有客人要招呼。
「風，見唔見到？」風，即係美國風，風之谷盟主。
風之谷及其餘兩個同盟幾個幹部，一直係奇岩山上觀看整場打王戰，係我邀請佢地睇戲既。
「見到晒。我都用騎士hi過下巴列斯，有乜可能擋到咁鬼耐…」