【真人真事】當年中七AL，我打左成年天堂二，但我無悔！: 70-情報網
巴列斯呢隻王同火龍地龍好唔同。
佢唔係多血，回血唔係快，防禦力都唔係特別高。就算冇霸主既生命封印，我相信單憑我地同壬生既火力都可以將之攻下。
問題係，gm設定到佢極高攻。一個火球打埋黎，莫講話我，就連紅都被佢扣幾千血。最恐怖既係，巴列斯既火球除左係範圍魔法，佢本人仲識分身！每個分身都識得放火球，一行埋去，十幾二十個火球就轟埋黎，咩人都死！而且gm仲將佢放係最細既pk場－－奇岩pk場入面，搞到全部分身都聚埋一齊，想拉走都拉唔到。
所以我地三盟聯手打過一次後，大家都怕怕，由得佢雄霸奇岩pk場。
但係逆天既強度，正好俾我用黎測試。
亞丁城戰入面，韓信一把黃光刀差d破壞我整個計謀。再加上韓修修近來既反常，而且係佢強烈意願下gm重開pk區，呢幾件事實在令我好在意。我深信，韓修修一定係背後策劃緊d乜野。
我同亞格斯約星期四再戰巴列斯，佢過左半日之後，覆我話ok。
離星期四仲有三四日，仲有時間俾我做準備功夫－－戰神係理想世界既分身"輸贏"已經被人踢左，但係as係壬生一族既分身，我地仲未知係乜水。
不過既然已經知道臥底既正身係as，咁就好辦事。因為係私服既官網上面，只要輸入玩家個名，假如玩家在線，咁我click入去呢個玩家既profile，就會睇到呢個人既ip。當日壬生同狼來了既上線名單我已經mark低左，只要等到佢地online，我就可以mark低ip，再同as個ip對，咁我就知道邊隻係as既分身。雖然要逐個人mark低，但比起以前唔知臥底正身既時候，要用到trust level，搞一大輪睇下過個信得過，已經方便好多。
但萬一as唔用分身online呢？冇計，唯有再起用trust level，但最起碼，透過對ip，我可以縮細個範圍。
事實上，由攻完亞丁到今日足足成個星期，我每日都係到對ip，範圍已經縮到剩番3個。
亦即係話，就只有3個人係由攻城果日到今日都冇on過line。
我問紫幽：「火雲呂布、超級小刀、相良宗介，可唔可以逐個介紹下？」
「相良宗介係小明分身。」紫幽首先幫我排除一個：「呂布同小刀平時都好少上線，但兩個都入左好耐，學院畢業上黎。」
學院，即係用黎收新手既機構，只要血盟夠大就可以開。新手夠40level就會自動脫離學院，俗稱"畢業"，而每當有人畢業血盟就會有分數，可以學習唔同既"血盟技能"，加強盟員能力。由於加入學院對血盟本身有幫助，所以大盟基本上都係來者不拒，更什會有利誘，例如理想世界會送裝備，壬生一族會送錢等等。
至於我地紅樹葉，根本就唔需要新手。我地有咩多？分身囉。剩係堆teleport都已經有兩打。果堆血盟技能晨早就俾我地自己既分身入學院畢業學到爆晒。所以，我地根本冇呢個需要，亦避免左今日要清老鼠屎呢d不必要既麻煩。
我：「暫時鎖定係呢兩個，我再查下。」
紫幽：「麻煩晒你喇葉。」
正常會參加攻城既玩家係唔可能係冇通知下，成個星期都唔online，所以呢兩個人，如果本身唔係分身，就係日日日都玩緊分身。
我開住佢地兩板既網頁，一路等果個紅色既"離線"變成綠色"在線"……一路等……等……等……
實在太無聊。
然而，偉大既念頭，總係係百無聊賴之間誕生。
我腦裡萌生一個瘋狂念頭。
我按下上一頁，番去私服在線名單。
拎起紙筆，遂個click入去，我要抄低晒全server人既ip！
唔好問我點解係咁傻咁天真，會用紙筆抄俎而唔係用excel mark低，我唔知！我剩係知，所有偉大事業，都起源指於一個天真諗法！我果陣心諗，只要我抄低晒全服人既ip，到時邊個係邊個分身，邊個用邊個account仲唔無所遁形？反正等人online都係浪費時間，不如花呢個時間建立一個情報網，絕對化算！然後就冇諗咁多，一股傻勁，起勢咁抄！
一路抄，我就一路對。果然俾我發現左極大量唔同人既分身。例如大綠，原來仲有個分身叫stranger，人類巫師，80level，係小盟"小小盟"既盟主。(盟名就係叫小小盟)
一路對，我亦都一路驚訝。原來as唔止係我地同盟入面有針，佢仲有隻分身，而家就用緊，叫做"輕飄飄"，係小盟"可愛家族"入面。雖然只係一個小盟，不過佢兩個同盟："夢幻無限"、"風之谷"，分別佔領左"古魯丁"同"狄恩"兩個城堡。縱然呢個同盟實力上對我地三盟冇任何威脅，但亦都算係割據一方既勢力。
令我驚訝既係，理想世界居然呢咁既同盟都有插針！而且，仆你個街又係as！
我開始懷疑，係as呢個人有鋪無間道癮，定係理想世界咁信任as？
唔理咁多，我繼續抄。
再抄抄下，就見到一隻叫"火雲聖月"，一隻叫"貂嬋"既角式。兩隻係同ip，即係呢個人雙開緊。憑呢兩個名，我肯定就係"火雲呂布"既分身，重點係，佢同as既ip唔一樣。
BINGO！
運用排除法，終於確定到邊個係as支針！
即刻密紫幽：「我搵到邊個係as喇！」
紫幽卻一盤冷水倒頭林：「超級小刀？」
「你點知架！」
紫幽懶醒地答：「女人既直覺囉。」
「唔好踢佢住，留番係到有用。」我都唔係第一次聽"直覺"呢個答案，但我決定挑戰多一次：「佢係可愛家族都有支針，估唔到喇掛？」
紫幽都有點驚訝：「可愛家族都有？」
直覺戰敗。
"輕飄飄"呢個情報，我決定免費送俾"可愛家族"。佢地既同盟"風之谷"係紅樹葉既友好幫派之一，亦係敵視理想世界既血盟之一，可以估計，整個同盟應該都對靜心冇好感。我免費送個情報俾佢地，既幫佢地除害，又可以借機拉攏佢地整個同盟，百利而無一害。
我向風之谷盟主"美國風"打聽一下，確定左佢地同盟三個盟都對理想世界冇乜好感後，透露左兩個情報俾佢地。
一：「靜心根本冇走過，韓修修就係靜心。」
美國風：「我一早知啦，果日戰神同佢係全頻鬧交乜都爆晒喇。」
二：「靜心放左支針係你地同盟可愛家族到，叫輕飄飄。佢係理想世界分身叫as，唔信可以上官網對ip。」
美國風：「你講真？唔係呀麻咁戲重我地？」
我又邀請美國風：「星期四晚我地同理想世界聯手打巴列斯，有冇興趣黎玩下？」
…………
然後，就到左星期四。
四個血盟：理想世界、日殺、壬生一族、紅樹葉聚集奇岩pk場，準備迎戰巴列斯。
事前冇傾過任何對策。
大家係pk場外，你眼望我眼，冇人敢行前。
我大叫：「韓信你開王啦，咁多個人入面係你最好擋。」
韓信反指：「你盟個紅仲高防啦，佢擋王最好。」
大家係巴列斯面前你推我讓，好不禮貌。
紅見狀，卻一言不發，直接行前，一箭射向巴列斯，宣告戰事正式開始！
附圖: 我都估唔到當年幾張ip list，原來夾左係file到，保存良好！