「sorry,我唔應該懷疑你。對唔住。」我向戰神道歉。

道一個歉對我呢個面皮厚過沙包既葉黎講唔係咩一回事。係未判斷到戰神係咪信得過之前,平息對話既溫度,大事化小小事化無先係最重要,畢竟佢手上果三把+1000,係我地紅樹葉重要戰力。

「冇事,人之常情。」戰神回答。

「我有少少擔心。你細佬賣咁多,光頭又咁揚,俾人查既話點算?」

戰神答:「早就話靜兩公婆都係白痴。不過我細佬既事你過慮,唔洗擔心咁多。」





過慮?早幾個月果個xx天堂就係因為咁樣gm被人封鋪拉埋,咁都叫過慮?到底佢係有心迴避呢個話題,抑或一早就有晒計劃?無從判斷。

美國風試完戰神把+1000弓之後,心癢難耐,決定左要租把贊助魔杖玩下,戰神同佢講有興趣就直接係論壇pm gm。就係咁,由美國風開始,贊助武器開始散播去中下層玩家。

呢一刻,我回頭諗一諗,比起戰神,我似乎更加似一個sell屎--唔係我拉佢地入黎守城,贊助武器點會滲透落去?唔係我,理想世界都未必會買呢批軍火……

我、美國風、戰神既對話就此完結,但係我地同理想世界既世界大戰只不過剛剛揭開序幕。

奇岩戰況異常慘烈,死傷無數、血流成河--唔係我地,係光頭等人!空有一批神裝,理想世界既人野戰上無論技巧定經驗都遠遠比唔上我軍,居然俾樹佢地玩到死死下。樹、紅兩隊弓手係奇岩打遊擊,同理想世界既人玩捉迷藏。你追樹咩?樹隊就起勢走佬遊花園,紅就帶人係旁邊插入黎抽水。你追紅?又係係咁走,倒番轉由樹過黎抽水。分批同時追--紅樹兩隊十幾個人立即化整為零,分散、全員逃走,你追得邊個?





打野戰同打城戰好唔同。城戰一攻一守,戰場局限係城堡範圍,所以重點在於火力。但係野戰通山跑,戰場無限大,機動力先係重點。理想世界唔係冇弓手唔係冇行者,但係佢地最多既係黑妖、人類,天生跑得慢,主要專注於火力。我地卻咩種族咩分身都有,打城戰就換重火力職業,打野戰就立即換番精靈同暗天使出黎同佢地鬥跑,正如某句名言一樣,「再強大既力量,係絕對既速度面前,都一樣毫無作用!」

我同美國風傾完計後就打左個電話比紅。而以上內容,就係紅一邊打野戰一邊係電話講,再由我加以潤色所得。

見紅講到眉飛色舞,話我軍大獲全勝咁濟,我就飛去奇岩鎮湊下熱鬧。點知去到一望,奇岩鎮只係一個空鎮,除左路邊攤,乜人都冇。

「由話打到班人一仆一碌?奇岩咩都冇喎?」

「哈哈,光頭就黎俾我地拉到去刑場。by the way,佢用緊破壞者,+1500大刀喎。」





我當堂打左兩個突:「破壞者!?仲要加千五刀!?」

我自己就係破壞者,最清楚破壞者既實力。當初用+100大刀,開完三狂就已經有九萬幾攻,剩係靠攻擊力吸血,唔洗防具都可以同戰神+1000雙刀劍鬥士打個平手,仲逼到佢要飲橙汁吊命。而家光頭換把+1500大刀,未開狂都有幾萬攻,開完可能有幾十萬,根本已經無敵,我深信就算1v1打韓信都只不過係三四刀之間既事,其他人不在話下。

但同樣地我自己就係破壞者,亦最清楚破壞者既缺點。比你加到十萬又點?行路仲慢過隻龜,我真係測試過,一隻加滿buff既精靈行路,係行路,都快過我跑步呀!你有幾何見我攻城戰斬過人?一黎我係盟主唔可以咁易出去送死,二黎唔係我唔想斬,係除左法師之外根本就追唔到任何人,而我未埋法師身前一係就已經被魔法轟死,一係班法師已經比弓手殺左。連攻城戰都發揮唔到,何況打野戰?

所以話理想世界野戰既經驗技巧遠遠比唔上我軍真係冇錯。

我問紅:「佢地冇弓手咩?」

紅回答:「蒼日果幾個囉。冇用啦得幾隻,邊敢離隊。大隊行得慢,追又追唔到,唔追又俾我射,岩岩我地仲開分身拉左幾隻狩獵王去佢地到,一開拖佢地成班人石化晒,真係笑死朕!」

狩獵王即係企係野外既小王,數目眾多,好大眾化,通常一team人就可以攻下。呢類王有level限制,太高level會俾佢石化幾十分鐘,而奇岩附近既王都係三十幾四十級,基本上唔埋得身。

「拉王石化都俾你地諗到…」





我換上火星人Σα,係奇岩補一補給,補充彈藥及回復藥水,又shop左陣ping,留意最新物價,就起程過去刑場同奇岩中間既山上。出門口跑一陣,離遠就見到幾支石像棟係山上,正正包括蒼日同光頭兩人。

「做望妻石呀光頭?」難得機會,我當然潤一潤光頭。

光頭卻立即回話:「你地紅樹葉以後唔洗旨意係亞丁同奇岩立足!咁鐘意跑,以後都唔洗入城,係山邊跑飽去!」

「你咁鐘意買野,不如買起晒成個server,我咪唔入城囉。」說罷由得光頭自己生悶氣,我問紅:「其他人呢?拉左去邊?」

紅:「愈來愈少人,散開晒,係刑場玩緊捉衣因。」

……

呢場臨時爆發既戰事,打到接近凌晨三點,隨著理想世界愈打愈少人不了了之。雖然我地只不過打遊擊,一值保持距離作戰,但戰事的確轟烈,平均每人都殺到跌左一level。





第二日,gm只係del左可愛家族post上論壇上既守城戰圖片,一句說話都冇回應,我地視之為--默認。

我send左個pm比gm,問:「你咁搞法真係少少都唔擔心被人捉?光頭直頭show埋把野出黎喎,del圖就算?你唔做下野,光頭遲下一定會再爆。」

之後我就online。大概係下午時間,紅樹都未出現,我一online小愛等幾個就同我講:

「葉!你終於都上線喇。今日光頭痴左線,企左係奇岩成日,見到紅樹葉就殺,想買野都買唔到。」

其實唔洗小愛講我聽我都知。因為一上線,緊接住系統既歡迎上線呢句說話後面,就係光頭和尚係世界頻道上面叫:

「你地紅樹葉唔係好勁既咩?冇人夠膽黎奇岩同我隻抽呀?我一個人係奇岩等你地!」

我第一個念頭係:「咁亞丁呢?」

暗殺答:「亞丁有華雄係到監視,我隱緊身係佢隔離。」





華雄?我有印象,日殺既盟員之一。前日,佢仲係一個不入流,屬亞格斯近戰隊入面既一個二打六。但係由琴晚亞丁守城戰開始,佢已經係一個手執+1500黃光雙刀,勁過戰神勁過亞格斯既神級劍鬥士。

「佢話以後唔洗入城係認真架?乜班人咁得閒…」

人人都話「唔怕神一樣既對手,最怕豬一樣既隊友」,我一d都唔認同。神一樣既對手係一場挑戰,豬一樣既隊友可以調較,兩樣都唔可怕。我心中最怕既,就係光頭呢種又唔係神,又唔係豬,但係為左搞掂你肯花無限時間既人,呢種人先係最麻煩最難對付既人。因為佢地不可理喻,好勝心超越所有,不停累鬥累,無限鬥志,贏一百輸九十都好,總之贏左你,佢就覺得化算。


「暗殺,幫我去奇岩睇下光頭用緊咩武器,我去會一會佢。」

暗殺幾乎已經係紅樹葉既專用斥候,專責隱身探路。一睇完,光頭用緊既正正就係佢既新寵,+1500大刀。

心底暗笑。輸左比戰神隻破壞者就即刻買把大刀?戰神果然冇評價錯,你真係一個白痴呀光頭。

我係世界頻道回應光頭和尚:「我黎同你打。」





立時換出火星人Σα,職業係魔彈射手,手持+100弩,防只有+25。

面對破壞者光頭+1500武器、+375防具,牌面似乎好輸蝕。

但係一打一,裝備並唔等於一切,經驗與技巧先係致勝之道!