【真人真事】當年中七AL，我打左成年天堂二，但我無悔！: 78-封城
一傳到奇岩，我立即係自己面前施放"約束陷阱"及"緩速陷阱"，然後不問半句，一記"死之螯針"就向光頭射出！
企係教堂門前既光頭和尚中左箭先知咩時，立時狂叫一聲，向我直線衝埋黎。
完全如我所料。
直衝，意味住佢唔係用滑鼠點地下自行控制人物移動，而係向我發出攻擊指令後系統自動郁，所以無論我點跑，光頭都只會用最短距離，直線衝埋黎。換言之，根本等同於我控制佢點郁！
我向後直跑，光頭就向前直衝，衝呀衝，一腳就踩中我預先佈設既陷阱！陷阱發動係純講機率，無視魔防，哪怕光頭幾十萬魔防都好，只要踩中，就有機會中招。結果約束陷阱雖然毫無效果，但係緩速陷阱就食正機率立時發動，光頭本來行路已經龜速，中完緩速陷阱仲慢過隻龜。
先發制人，一開始就中我陷阱，面對遊戲入面跑速最快既暗天使，光頭只能任我魚肉。我隨即怒放亂箭！每放兩箭就向後跑開一小步，然後再放、再跑，不斷打帶跑，光頭根本埋唔到我身！
雖然每一箭只係扣光頭百幾二百，要殺佢起碼要射百幾箭，但係只要有傷害，就算只係得果丁點，一樣可以磨死佢。
射完一輪，光頭又突然跑快番，"緩速陷阱"既效果已經冇左，但係佢仲未學乖，依舊一味向我直衝。冇行者用"尋找陷阱"幫佢睇路，光頭根本就唔知我既陷阱放係邊到，向我直衝無疑係自殺。一番誘導兼打帶跑，光頭又再次踩中陷阱，我地又再loop一次兩箭一跑……
如是這，無論光頭中唔中陷阱都好，中陷阱就兩箭一跑，唔中就一箭一跑，一直打帶跑，打左都唔知幾耐，光頭連一刀都冇揮過，卻平平白白食左我六七十支箭，成身插到好似隻箭豬咁。我望一望箭筒，計一計數，似乎差唔多夠鐘……
果然，跑跑下，光頭突然大叫三聲！
我趕緊射多一箭，傷害反而高左，說明佢已經開左扣防暴升攻既三狂！唔理咁多，一招"極限逃脫"使出，二十秒內大幅提升自己既迴避同跑速，係光頭換出+1500黃光弓既同時，一下子我已經跑離光頭既射程範圍！
三狂之一既"狂信者"雖然可以增加破壞者既移動速度及命中率，但面對暗天使依然只能食塵，再加上極限逃脫呢招應急技能加持，光頭連車尾燈都見唔到。就算光頭換出神弓，但破壞者用弓既有效射程，又點同我呢隻尊業弓箭手比？爆晒三狂既光頭，拎住把弓，追左兩步，自知追唔上打唔到，只好企係原地大喊：
「打咁耐就跑咁耐，你係打交定賽跑！？」
我當然唔會示弱，光頭一講完呢句說話，我就跑番去佢面前，企係破壞者用弓既最大射程之外，召出一個魔法陣。
Σα左背上純白色既單邊羽翼揮動一下，整個人就隨著魔法陣浮起，右背瞬時幻化出紫色閃光－－第二片羽翼出現－－不消一秒，Σα就變成"最終形態"，全能力暴昇！緊接就係一發"死光"畢直地轟向光頭，光頭硬食一擊，頭不回氣不喘，又再向我直衝，衝前兩步就立即拉起神弓向我發箭。
但係最終形態加上極限逃脫，迴避力已經達到極限，破壞者用弓又點可能打得中我！光頭連環數箭，全miss；我就企係原地連環死光，全中！
暗天使最終型態既專屬技能"死光"絕對唔惹少，攻擊範圍大、傷害大，屬神級技能，何況光頭開得狂，就表明佢hp已經見底，再中多幾跑佢就玩完。光頭深知不妙，見自己硬死數炮卻完全打我唔中，又再換出神刀向我直衝！
我又豈會俾佢接近？敵進我退，繼續打帶跑，破壞者既弱點明顯之至，面對弓手就算開晒狂都要食塵。一路後退一路放死光，又展開追逐戰。
極限逃脫既二十秒效果消失後，光頭憑藉"狂信"既跑速加持一度向我逼近，但又立刻被我用"展翼強襲"瞬移閃開，閃完又放死光，再跑，完全食住光頭。
追左分幾鐘，光頭怒火中燒，忽然回頭跑番去廣場。我以為光頭想趁我回頭追佢時候又立即調頭，意圖縮短我地之間既距離，就企係原地觀察一陣。點知，光頭真係直接跑番去廣場，完全無視我。
我立即飛番去看過究竟，只見光頭朝廣場中間，向係戰事中途入黎睇戲既紅樹葉成員直衝。不知就裡既小愛，點估到一打一途中既光頭會突然跑番黎？一跑到小愛身邊，小愛都未趕及反應，光頭手起刀落，一刀就係一個人頭！
佢殺唔到我，就打算將在場紅樹葉既人全部清光泄憤！
「屌，又話隻抽，冇口恥！」我心裡默念。
爆狂秒殺，呢種狀況其實我地紅樹葉眾人都見怪不怪。就係大家無所事事，毫無防備既時候，我就會用葉失驚無神瞬間開狂，幾刀一件斬自己盟員，成班就自然起鬨當我係boss黎打。大家訓練良多，對呢d突發情況處變不驚，一早有晒對應方法。
soso、艾爾、相思等幾個跑得慢，自知走唔開既巫師，幾乎係光頭揮刀既同時就立即向之開火。光頭連食數炮，飲幾啖橙汁，正打算衝向最近既艾爾之際，突然間，清脆響亮既四聲爆破，鵬鵬鵬鵬，四個行者、四把匕首就係光頭後面同時現身，一人一刀插入光頭和尚既會陰穴，光頭就咁一命嗚呼。
光頭雖死，戰事並冇告一段落，反而直接引發另一場戰事。在場幾個理想世界人員，包括同樣睇緊戲既蒼日，見到光頭慘死，就立即一箭射向四小刀之一暗殺，旁旁soso艾爾立即回炮反擊，結果又變成另一場奇岩戰。
一開戰，日殺就立即吹雞。吸收左琴日紅樹遊擊戰教訓，佢地成班人索性龜係奇岩，任我地點拉都唔走，被打就立即用牧師主教補血，總之霸晒奇岩所有買野既位置，封住交易區，封住傳送點及門口，將紅樹葉全員鎖死係奇岩入面。
紅樹葉在場俾到盡只有十幾人，連紅同樹二人都唔係到，莫講話打遊擊，連走都成問題！佢地咁樣屈人數死守，我真係吹佢唔漲！
連續被殺幾次，形勢實在對我地不利，我下令撤退：「重生番亞丁盟屋。」
十幾人，死晒番去盟屋，坐定定開會。
soso：「咁樣落去唔係辦法。」
我當然明白。如果佢地日日同派人守住奇岩亞丁，我地係蝕底一方。
暗殺：「有冇辦法講和？搵咪嚕幫我地講下？」
艾爾：「理得佢丫，封咪封囉，最多以後用分身買野，我唔會講和！」
我突然聽到門反面有聲，就企起身，打開門。
一開門，影入眼廉既就係光頭、蒼日、華雄等等等理想世界贊助大軍……
慶幸當初gm set既安全區都仲有少少sense，盟屋係屬於安全範圍，冇人可以打到我地，只不過一踏出門口，就係戰場…
我同佢地講：「盟屋係有私家傳送師，你咪企係到慢慢捕囉。」
然後就無視佢地，關上大門，繼續開會。
會議既結論，係冇結論。
我都毫無頭緒。佢地贊助武器咁多，仲要長期捕係到扎晒營，有咩辦法打？除非真係好似艾爾咁講，以後用分身買野。
最終最終既結論係：「搵gm。」
我check一check論壇pm，gm仲未回我，於是我又send多一封俾佢：
「我知道你無意干涉玩家沖突，但係你好理下遊戲平衡？而家理想世界封左奇岩亞丁，我地想買野都買唔到。再係咁落去，我同紫幽都唔會再玩。你睇晒我地既對話，我地係咩關係你心知肚明，我走左紫幽走左紅樹葉同壬生一族亦都唔會再存在，你最信得過最安全既潛在既客戶全部都走晒。然後，理想就一盟獨大，就好似以前你既魔界一樣，黎黎去去都係你圍內幾把贊助，我諗你唔會想見到。」
但呢封pm，亦如我所料，一樣冇回覆。