粒的係deadline前最後一分鐘先登記攻城,並且正式同紅樹葉結成同盟,兩軍終於可以用粉綠色既「同盟頻道」互相溝通。

第一條粉綠色頻道出現既說話,係由葉發出:「我地黎商討作戰會議吧!」



時間係7點30分,仲有半個鐘,就係攻城時間。

攻方:紅樹葉、三聯幫
守方:寶寶龍





呼……一支銀白色既箭插入巫師soso既腰間,緊接既係一連串箭聲,以及一聲哀咽,soso已成箭豬倒地。

係狄恩城鎮同城堡中間既山野間,冒出十幾個弓手衝入狄恩城鎮南門。npc守衛?一早被殺。弓手佔領左狄恩既傳送點,只要一有人出現就立即射殺,幾個不知就裡既聯軍成員連畫面都未見到就被射死!托私服規則,城內係可以任意殺人。

soso立即向同盟報告:「寶寶龍屠城呀!唔好傳送去狄恩!」

粒的手下猛將"奔馳"驚訝:「仲有半個鐘喎咁快開戰?」

soso:「佢地圍住左狄恩傳送點,我一傳過去就死左喇。」





寶寶龍果然唔係善男信女,似乎佢心裡面都對我地有保留,未至於咁蠢信晒我。

我立即係同盟頻下令:「soso番盟屋傳奇岩,紅樹葉奇岩集合!」好彩紅樹葉係亞丁城買左間盟屋,盟員死亡後可以選擇係盟屋復活而唔洗逗留係狄恩。

粒的亦都立時下旨,命眾人於奇岩集合。

但係寶寶龍亦都有準備,奇岩城裡一早佈左寶寶龍既線眼。

「奇岩三個門都有弓手係到!」





「洗唔洗咁快?」

……

樹:「佢想封死我地,等我地到攻城既時候傳唔到去狄恩。」

我和議:「我估都係。到左搭正開打,就唔可以再用npc守門人傳送去狄恩。到時佢地應該會重兵封死奇岩門口,同我地打野戰。」

粒的聽罷,立即向所有人問:「呢到有幾多人唔怕開紅?」

開紅,亦即係pk,player killing。係非戰場開打,對方冇還手已被殺既話自己就會變紅名,所以叫開紅。紅名死左係一定會跌裝備,所以係高風險活動,但係我地兩盟當然冇人會怕,係一個都冇!

粒的:「既然冇人怕,到59分全世界就同時傳送去狄恩,見人就殺!」





眾人和議,但係我有點兒不安。

我密暗殺:「暗殺,你帶埋隻龍去,用"隱藏",傳去狄恩四圍探一探路先。」

暗殺作狀道:「末將聽領!」

然後我又密另一個紅樹葉既高級行者"煌":「煌,用"隱藏"探下奇岩城外有幾多弓手。」

煌探完回報:「總共有13隻弓手。仲有幾隻娃娃放左係pk場附近。」

大概七分鐘後,暗殺傳來軍情:

「軍情速遞:狄恩傳送點約10弓手,3劍鬥,5娃娃。重生點4劍鬥。南門草原、城堡附近有弓手分散,唔知幾多。城堡外部暫時無人。」

我:「你穿牆入城堡入面睇下。」





然後又大概兩分鐘左右,暗殺回話:「報告將軍:我死左喇。佢隊巫師同其他近戰係內廳,應該有十幾人,一穿入去就被人射死左再被佢踢出城,唔知有幾多隻,不過內廳插左npc牌。」

我:「哈哈,唔緊要,你穿左入去應該嚇死佢地,快d傳番黎啦。」

我立即上私服網search"寶寶龍",打算查探佢血盟有幾人on緊line,但係……頂,寶寶龍個盟名係乜話?成個同盟竟然冇人答得出,早知就唔"WFC"佢。

而家手頭上既情報:總共係23弓,7劍。仲有城堡附近弓手,我當都係12隻咁上下,加埋係42人。佢城堡內既人唔多,斷估最多都係兩隊18個。即係話,寶寶龍全軍大概係60人,有一半係弓手……

葉把握時間同粒的商議。

最後既結論:「大家有三轉騎士既話就轉用騎士參戰!」

好快到左59分,紅樹葉三聯幫既所有人同時傳送到狄恩城鎮--除左兩隊預留既小隊,由葉、粒的分別帶領共14人傳送左去亞丁,一個唔關事既城鎮。





手持靈魂弓,身穿一套紅龍皮甲既奔馳,一傳到狄恩,立即高舉大弓擺出進擊姿態吼叫:「殺呀!!」