【真人真事】當年中七AL，我打左成年天堂二，但我無悔！: 11-狄恩之戰 (二)

寶寶龍人力本來已經唔及聯盟軍多，而家分散兵力佈於四周，狄恩全城只有約30人，主要為弓手。

反而一下子逼爆傳送點既聯盟軍，人數達80人，有20多隻騎士。

伴隨住80人同時傳送，係一場lag機，然後就係一場腥風血雨！地獄等人既騎士隊開啟"禦箭術"，再不停施展"衝擊盾"擊暈四周弓手，弓手天生"體質"低，根本抵抗唔到騎士暈擊。開左"禦箭術"後既騎士更加橫行穿梭於弓手之間，弓手既箭完全構成唔到傷害。騎士擊暈寶寶龍既弓手後，奔馳既帶領既弓手隊立即射擊，弓手隊活用"跟隨攻擊"，只要奔馳發一箭，隨後立即有十幾箭飛埋去，唔洗五分鐘就制霸狄恩。

樹：「死者脫隊組小愛，復活後自行歸隊！」小愛本職係紅樹葉既巫師，但係佢有練最冷門既娃娃－主教，有強大既回血、復回技能，所以係呢場戰爭入面佢主要控制主教。

確保狄恩安全後，兩個戰狂開始施出"門扉頌歌"，畫面一黑，係亞丁既葉同粒的等14人立即被召喚到狄恩。同時間，狄恩既部隊四周圍檢查寶寶龍既紅人屍體，靈魂弓、聖威皮甲、手套、靈魂蛋等等周圍都係。





粒的：「執完野未？gogogo！」

葉、粒的帶領人馬直衝狄恩城堡山腳，一路平安無事，城外既弓手似乎已經番左入城堡。係山腳下，離遠隱約見到幾個弓手企係城牆上面恭候我地大駕，寶寶龍似乎意識到打野戰佢地冇勝算。

眾人上山，咪嚕就第一時間召喚"野豬加農炮"準備炮轟城門。兩位盟主亦都開始召喚"攻城陣地"，俗稱"插旗"，因為所謂陣地實際上就係一支飄揚既血盟旗幟。

但係寶寶龍見狀卻立即派出大軍，從城堡後門衝出黎突襲！寶寶龍既戰略似乎就係想令我地召喚唔到陣地。插旗需時分幾鐘，但係呢支旗可以話係攻城必須，因為攻城陣地係一個復活點，係攻城戰既戰場入面死亡後，可以直接係陣地重生。陣地只可以召喚一次，如果陣地被破壞，咁死後我地就要復活到去第二近既城鎮"古魯丁"，唔可以即時番去戰場，對戰況極度不利。

葉：「騎士衝出去吸弓手！唔洗保護我！」





寶寶龍既軍隊主力幾乎全部都係弓手巫師。巫師係重炮手型，攻擊力極強但係機動力低防禦力低，要突襲陣地只會俾奔馳既弓手隊殺死。而弓手，雖然機動力高，但我地亦有弓手既剋星：騎士。唯一對陣地有真正威脅既係正面衝埋黎既幾個近攻既劍鬥士，不過我地聯軍既劍鬥士都唔少，加上企後排有soso、艾爾等既巫師隊，要阻止我地召喚陣地，談何容易？

我暗笑之際，突然間，霍霍霍霍！四刀分別插入粒的同葉既背部，竟然係隱身既行者！葉作為半獸人，皮多肉厚，四刀唔算大礙，葉以"戰鬥咆哮"回血，再開出"狂暴戰士"增強攻擊力，單手舉起"屠龍刀"，以投球姿勢由天打向地斬出一下"破滅爆碎"，一擊就秒殺一個行者。但係粒的只係一個弓手，召喚陣地途中受行者同時插四刀根本頂唔順，瞬間就倒地。soso等人見狀立即以魔法轟向行者將之轟殺，補師亦即刻原地復活粒的。

陣地戰有驚無險，雖然粒的被插死，但寶寶龍只有一波攻勢，復活後繼續召喚。陣地召出後，死亡人員係攻城陣地直接復活，只要等咪嚕工匠既野豬加農炮召出就可以展開攻勢。

然後，狄恩城既戰況幾乎一面倒，由第一下突襲陣地戰開始，憑職業既分配以及人數差距，已經注定左寶寶龍既失敗。

咪嚕既工匠用野豬加農炮攻破正門，之後又分別攻破左右城牆，然後大軍跟隨加農炮慢慢進入內城，剩低暗殺、煌等幾個行者以及幾個弓手留守陣地。進入城內，我軍同時破門及破壞水晶塔。寶寶龍多次想突圍，但係單憑弓手及巫師跟本突破唔到騎士陣式。水晶塔不停被破，意味著寶寶龍成員每死一次，要等接近八分鐘先可以復活。





勝卷在握。

聯軍援慢推進，最後大概花左一小時。係封印室擋下寶寶龍既最後一波攻勢後，粒的開始封印城堡水晶，準備宣佈攻下狄恩。

但係比起攻城，我地有更重要既事做。我地要以牙還牙以眼還眼，封鎖古魯丁！