【真人真事】當年中七AL，我打左成年天堂二，但我無悔！: 12-觀戰

封印城堡需時約五分鐘。

只要粒的封印完，就會"攻守互換"，封印方及其同盟變成守城方，而原本既守城方就會變成攻方，直到攻城戰時間結束，最後封印果個就奪得城堡。

而重點係，係攻守互換既一刻，守城方會自動被踢去第二近既城鎮，即係古魯丁！

而家既問題只差在，係封印完成之前，點樣先可以係五分鐘內去到古魯丁呢？

好簡單，自殺。全員自殺，之後就可以選擇到底死番番去陣地定係去村莊，只要揀村莊，我地就直接傳送去古魯丁！於是就係粒的封印其間，我地集體自殺，直接傳到古魯丁，留番粒的一個人係城堡。





好快，系統就宣佈《三聯幫佔領狄恩城堡》。霎時間，又係一陣停頓，冇計，私服server係咁。

然後寶寶龍60人就全數現身於古魯丁！！！！

聯軍立即大開殺介，"波動劍震"、"炎旋爆破"、"水之爆裂"、"斷魂箭"等等等等此起彼落。葉換上一套"末日重甲"，又立即換成"聖威重甲"，來來回回換幾套裝備，竟然可以立即使出頻死時先出得既"狂信者"、"狂暴加護"、"狂暴戰士"，俗稱「開三狂」，攻擊力激增，幾刀就殺一人，連斬幾個弓手。暗殺、煌等幾個行者，利用小刀連續施出"亡命一擊"、"背刺"、"致命之息"等不停插插插，插幾下又死一個。而奔馳既箭隊更加係一箭一件，真正意義上既秒殺！

整個古魯丁仿如修羅場一樣，聯軍單方面屠殺，寶寶龍毫無還擊之力。一方面佢地人數較少，另一方面被殺完根本冇buff加成，同加滿buff既聯軍能力差極遠。再加上狄恩城堡既戰況一面倒，整個寶寶龍根本毫無戰意，相反我軍戰意高昂，大勢已經係我地聯軍手中。最終古魯丁被殺至屍橫遍野，寶寶龍大軍停止復活，聯軍先被逼停手。

距離攻城時間完結仲有大約半個鐘，但係寶寶龍已經係敗軍之犬，整個血盟潰不成軍，連點一下復活既心情都冇，就算我地整個狄恩空城放係佢面前又如何？佢已經無面目見江東父老。呢一刻，我完全明白點解當年項羽會選擇自殺。





紅樹葉、三聯幫兩盟係古魯丁，面對住一大群屍體，企左五分鐘。

而寶寶龍一句說話都冇講過，只係沈默地扮演佢既屍體角式。

葉：「番狄恩罷。」

就係呢個時候，我先發現古魯丁城鎮門口企左兩個理想世界既人，一個係盟主靜心，另一個人叫"蒼日"！

同時間，自己一個係狄恩城堡既粒的大叫：





「亞格斯同平頭和尚黎打爆左城門，唔知想點，佢地明明冇登記攻城。」

天堂二中只要攻方佔領城堡後，被破既城門會自動重生，不過血量唔多，靠普通玩家亦可推爆，更加唔會難到呢兩位+500同+700既神級玩家。

樹小心翼翼走上前打招呼：「hi，你黎幫我地守城？」

靜心：「我地只係黎觀戰，順便黎恭喜你地攻佔狄恩。你知啦，呢到好耐都冇打過攻城戰。」