【渠底奇兵】《我，就係踩單車跌落渠果個肥仔》（已爛尾）: 05

一打開門就係呀汶同佢老豆。 

咁我就開門啦。 

「uncle你好呀。」 

「你就係冬仔呀？～咁多年無見大隻左好多喎！」 

肥就肥啦，大咩野隻姐？ 



「哈…哈哈…係呀，入黎ㄚ～」 

我今次唔失禮得，只好對住呀汶點一點頭打招呼。 

我第一次見佢著便服，頭髮放左落黎顯得更有氣質！一條純白色長裙真係睇到我眼甘甘。 

今次都真係三年幾以來我第一次咁近距離觀察佢，當然啦尋日唔計。 

咁叔叔帶左呀汶黎之後傾左一陣就走左，好似話大陸有野趕住做。 



唉自己個女岩岩先失去左至親，好心你就陪佢多Ｄ啦。 

工作既野點會夠家人咁重要呀。 

「呀仔，今日汶汶黎左～我去斬料加?，你招呼好汶汶，幫佢手放好Ｄ野。」 

喂媽媽係咪咁唔講義氣呀？要我一個人對住個咁靚既女仔？！ 

我會死架。 



好啦佢已經出左門口喇。 

「呀…呀汶，妳飲唔飲野呀？」我都唔知仲可以點呀。 

「唔洗喇呀冬，我唔口渴。」 

於是我地兩個就咁沉默左三分幾鍾。 

佢好安靜咁坐左係度，見到佢個樣真係好落寞，短短一個月相信一定未可以從傷痛中完全走出黎… 

身為主人家既我只能夠努力令氣氛活躍Ｄ！ 

「呀汶，不如我幫妳手搬野入妳間房？」 

「好呀，唔該你呀冬。」雖然佢係度微笑，但係我感覺到佢根本就無笑既心情… 



於是我就帶呀汶去佢間房，唉我奴性真係強，明明今朝仲係叫左我間房。 

呀汶一入去見到入面既擺設就問我。 

「呀冬，呢間係你間房，我住左係度，咁你訓去邊度呀？」 

「哈…哈哈，我訓係廳果度得架喇！」 

「唔得…點可以為左我而要你地主人家訓廳架？！」 

「唔…唔緊要呀！咁妳黎左咪即係我地屋企人囉！況且我訓廳仲正呀，可以偷偷地開部電視打機！」 

「多…多謝你呀，呀冬。你同你媽咪都好好人。」 



對我黎講，呀汶真係好似一個天使咁！ 

我一定要佢係我屋企既呢段期間，令到佢可以開心番，可以真真正正咁笑。

講真其實我同呀汶唔係話真係咁熟，只不過以前日日都對住咁解。 

但而家仲離譜，要朝見口晚見面。你都未咪話唔正。 

唔知佢仲記唔記得中二果年有個型棍同佢表白呢… 

「喂ＶＥＮＵＳ，偶遇功能過左之後，呀汶會唔會搬走架？」 

如果會的話，我一定會狂做任務拎積分，日日都用偶遇功能！ 

「肥撚，今次功能無效，因為今次既事並唔係手機既功效。」 



「即係點呀？」 

「即係無論你有無用偶遇功能，鍾智汶都會住入黎。積分仲有４點。」 

唔係掛，咁正？都好！至少唔洗再係呀汶身上再用偶遇。 

好快已經入夜，而我都好好地咁訓左係我既地下度，講真我都好少訓地下，真係唔多慣。 

「粗口VENUS，你估阿雪點解會變到咁靚既？唔知呀汶有無鍾意人呢？」 

「喂撚頭呀，我唔係萬能架，阿雪點解會變靚係因為佢本身靚！」 

忽然間同粗口妹好似朋友咁傾計真係幾舒服。 



「其實妳突然間出現係我身邊出現係咪有Ｄ咩野目的？即係可能妳係外星人，要靠我征服地球咁？」 

「要靠都唔會靠你啦下話肥哥哥。」 

「呃…咁又係。」 

「唔講住！」 

呢個時候忽然間有人係我間房行出黎，呀唔係。應該係話呀汶係佢間房行左出黎。 

嗚啊，女神著睡衣真係好可愛呀！ 

佢行左去廚房度，原來諗住飲水。但我見佢搵極都搵唔到水杯。 

於是我就起身行過去幫佢。 

「水杯就放左係呢個櫃度喇～～」 

「呀冬？對唔住呀…係咪我嘈醒左你呀？」女神講野真係好鬼溫柔。 

「唔係呀，我都未訓著～～妳呢？訓唔著呀？可能係唔熟悉環境。」 

「嗯…少少啦。」 

「不如我沖杯熱華田比妳飲啦，飲完好好訓架！」 

「唔洗啦…」 

「咁岩我都想飲，順手姐！」哇我就係開左口已經後悔，呢獲真係肥撚死喇。 

「唔該你呀，識左你咁耐，原來你咁好人架，呀冬。」女神嫣然一笑。 

「哈哈…多謝。」 

「係呢……呀冬……」 

「做咩？」 

「我係你地屋企住呢件事…你可唔可以唔好同人講…」 

都係既…比人知女神同肥毒撚一齊住，真係幾影響聲譽既。 

「嗯，放心啦我會保密。」