其實我真係習慣左有人同我一齊放學番屋企。 

以前日日都會同呀雪一齊走,因為佢就住係我附近。 

日日有人同自己吹下水講下笑果種感覺真係好正。 

「呀冬~」係呀汶把聲。 

係喎差D唔記得左我女神而家係住係我屋企! 



「呀汶妳咁遲都仲未走既?」 

「我等你呀。係呢果個係你地班新生黎架?」 

「下,唔係呀,佢叫呀雪呀,李曉雪囉。」 

「李曉雪?但係我明明記得……」 

「係呀佢為左溝仔變靚女呀!」 



「溝仔?」 

「咪就係溝仔囉!」我發覺我而家既情緒管理真係有少少問題。 

「……」 

「我地行啦,呀汶。呀但係,妳唔係話唔可以比人地知道,我地…」 

「呀冬你睇下而家幾點鐘先啦。」 



如果要我起一個外號比呀汶,我會叫佢做微笑天使。 

果種笑容真係睇見都如沐春風,心情一秒變好! 

「係喎原來就快五點半,咁我地行啦!」d人一早就走曬喇。 

天色好柔和,雖然仲有少少熱,但係行係條街度都幾舒服。 

估唔到我係中五呢一年,會有機會同自己鍾意仲咁耐既女仔並肩而行。 

話就係咁話喇,其實氣氛係有少少怪怪既。 

呀汶對我黎講真係又熟悉又陌生,以前中小學咁多年我都對住佢,有時見佢仲多過見我果個成日出去公幹既老豆。 

但係偏偏我一d都唔了解呀汶,除左知道佢份人又靚又溫柔之外,我真係咩都唔知。 



可能就係因為小學果陣覺得同女仔玩會比人笑,去到中二既時候又怕羞。 

所以同佢傾計既時間可以話少到無人有。 

「呀冬。」 

「嗯?做咩呀?」 

「多謝你呀。」短短相處左幾日,都唔知聽佢講左幾多次多謝。 

「做咩要多謝呀?」 

「多謝你,你又要讓間房比我,又要訓地下,我知道我係你地屋企會造成好多唔方便。」 



傻啦,妳住得愈耐愈好呀! 

「唔洗再講多謝喇呀汶,UNCLE同我老豆係最好既兄弟,咁我同妳都係最好既兄弟!」 

癡左線喇我一定係,同女神稱兄道弟。 

「嘻~咁以後多多指教喇,呀冬」估唔到呀汶都有咁既一面。 

但係我成日都感覺到,佢既笑唔係真係有好多開心既成分。

我平日番到屋企,一定會沖個涼就開始上高登睇小說同埋打下機咁。 

雖然女神住左入黎我屋企,但係我肥冬唔會咁無原則放棄高登同打機! 

於是我一番到去就拎部平板開個高登APP追故。 



當我睇得興起既時候,呀汶沖完涼出左黎。 

半濕既一把長髮令到呀汶睇落好似同平時唔同左咁。 

可能岩岩沖完涼啦,佢塊面左係紅紅地咁。 

果條短褲真係幾短下,定因為佢對腳太長?我個人黎講就鍾意果種有少少肉同有線條既。 

即係大腿到小腿係粗至幼果種,唔係講廢話呀。 

你睇下糖妹對腳就知我點解咁講,唔講我以為佢係踢甲組。 

真係有女仔可以大小腿係一樣粗幼度。 



望住白雪雪既一對腳我真係分曬心。 

呢個時候呀汶呀左過黎坐我旁邊,我唔明點解我同佢用同一種洗頭水,我個頭會咁柒囉? 

一陣芳香傳入鼻再上腦,我真係一個神級既癡漢呀。

「呀冬你係度睇緊咩呀?」 

「無呀上高登睇故姐。」 

「高登?即係好多搞笑野既討論區呀?」我不敢相信,有人未上過高登架咩? 

女神真係又PURE又TURE。 

我絕對唔會教佢上高登,更加唔會話佢知用isp email同sms都開到ac。 

因為前車可鑑,見到孔明大哥自創軍隊再入伍,真係慘不忍睹。 

「係呀,不過D人成日講粗口同咸野架。」 

「咁呀冬你又上?」仆街係喎,咁點解我又上? 

「無呀無呀,我睇下果度d故仔姐,好好笑架佢地打得。」 

「咩故仔呀?」 

呀汶居然靠近左我,伸個頭埋黎睇。若隱若現既bra同完全顯現既腿,就係我眼前。 

真係好想伸隻手去摸下。

「食飯喇呀仔,汶汶。」 

呀媽算唔算救左我?
已有 0 人追稿