【渠底奇兵】《我，就係踩單車跌落渠果個肥仔》（已爛尾）: 11

咁話咁快就食飯時間啦，平時我、呀洪、呀晨、呀樂同呀雪就會一齊食既。 

不過今日當然得番我地４個啦 

「喂肥冬，唔見呀雪既？」呀洪果然係一個靚女既狂熱者。 

「哦，佢約左人食飯。」 

「ＯＨ肥冬慘慘喇，你既肥雪唔肥喇～～人地溝仔仔喇～～」真係唔明呀樂身為三大，呀唔係，四大女神之一，講野都可以咁仆街。 



「肥冬，睇開Ｄ。」呀晨條仆街仲要成個神父咁既語氣。 

「咩料姐你地，講到我同肥雪係一pair咁，人地鍾意靚仔成績好架！」 

「嗚啊～～肥冬你好酸呀～～」咁你地都起哄。 

今日我地去左平時成日去既food court食飯～～貪果度坐幾耐都得。 

「喂～肥冬比舊茄子黎！」呀洪手速真係快！ 



「咪住，你自己而家無咩。」我都秒速擋住佢對筷子。 

「喂喂喂肥冬，你唔係唔食茹子架咩？」 

「邊個話我唔食呀？邊個？！」你地都癡撚線既，身為一個肥仔緊係咩都鍾意食架啦。 

「唔係播，我記得你次次都話茄子Ｄ質感好差，跟住全部比曬呀雪食………哦哦哦，肥冬鬼馬喇你。」估唔到呀晨嫂咁撚聰明。

無錯我其實都好撚鍾意食茄子，魚香茄子係我最愛！之但係呀雪又好鍾意食茄子喎，見個肥妹食住自己果碟既時候又望住我果幾條茄子，咁我咪………囉，唉無啦啦又多個把柄。 



「你唔比我而家開始鍾意食？！？！」我就緊係唔會認啦。 

「喂肥冬呀～～估唔到你對以前唔靚既肥雪一樣係真愛喎～～wow~~~~」呀洪真係仆街仔。 

「你地真係～old news is so exfoiejogehg呀～肥冬不嬲都係注重內在美既真男人黎架啦，可肥冬？」呀晨無啦啦讚我。 

「嗯嗯！」我下意識又好認同佢講既野。 

「哦咁即係肥冬你暗戀肥雪啦，呀唔係，而家要叫正美雪！」呀洪真係專業抽濕機。 

「收皮啦你地！！你呀媽個波罩你呀！！！」除左咁，我都唔知應該點答喇。 

一餐飯大家講下笑吹下水真係好快過，可惜今日呀雪唔係到。 

唔知佢同呀俊食野食得飽唔飽呢…開唔開心呢？ 



「行喇肥冬唔好思春喇！」呀樂隻手係我眼前揮下揮下。 

佢真係除左粗口妹以外最口衰既靚女，同呀晨真係一對絕配！