【渠底奇兵】《我，就係踩單車跌落渠果個肥仔》（已爛尾）: 14

要開始跑喇…肥仔黎講真係行同跑無咩分別，不過最近我都好似瘦左少少，希望一陣唔好包尾。 

「留在彼此的身邊，牽著手再繼續飛～」呀洪領唱。 

「期望擁抱到最終，所有幸福都抱起～～」呀晨接力。 

「做永遠知己，追蹤我快樂，奔跑也一起～～～」我再接落去。 

「來日願緊緊記住，FANTASY TALE！！！！！」我地一齊大聲唱！ 



無錯我地係一路散緊步，講真五個圈點跑？ 

而我地次次都會一邊唱歌一邊走完全程，完美展現我地既體育精神。 

屌咪住，我好似有任務要做喎！？ 

「期盼，你聽到……」當呀洪想繼續既時候我叫停左佢。 

「喂不如今日我地認真跑一次。」 



忽然間我感覺到佢地既目光十分之怪異同驚訝，好似見到草泥馬識上高登咁。 

「好！輸左請飲可樂。」我真係好開心有兩個咁既兄弟。 

於是我地三個拔腿就跑！ 

其實我地因為太沉醉於stephy隻歌入面，一早已經落後左一個圈。 

追上去係好易，但係第三個圈一定會因為體力不足也落後得更嚴重。 



「喂呀晨你估我地可唔可以跑過曬佢地？」 

「如果你好似玩跑online咁，著對靚鞋就可以強化同爆氣，實得架。」估唔到中五佢仲玩跑！

強化……？強化！？ 

係喎能力強化！ 

本肥冬而家已經擁有左粗口VENUS，係有異能架播。 

二話不說即搵VENUS！ 

「粗口妹，能力強化，跑步。」 

「完成。」 



係呢個時候我感覺到有一股唔弱於樣子巴打既氣從我身上聚集起來，再源源不絕咁傳落去對腳度。 

今次有機！ 

我望一望最前，果然係呀俊。佢從容不迫咁穩居第一，仲要領先其他人半個圈。 

左右既呀洪同呀晨已經進入左跑online既爆氣模式。 

其實年年運動會佢兩個都係入到決賽，而我就年年都係鉛球家！ 

今次我要一洗以往柒氣！ 

「兄弟，我要衝上去拎第一。」



望住前面一個又一個既同學比我地超過。 

佢地都好驚訝！ 

驚訝在呢三條粉腸做咩連熱身都跑到好似世界賽咁。 

同埋個死肥仔點解會跑得咁快。 

「上呀上呀！」 

連一直住中游位置既家銘班長都大聲叫：「做咩野呀跑咁快？打撚死你地呀！」 

一旁做緊伸展既女仔都紛紛望向我地既柒跑三人組。 

「追到我既話，我比你打撚死又點話。」呀洪呢個時候仲有力氣轉過頭同佢講野。 



反觀雖然我用左強化，係耐力同呼吸上都好左好多，但係對腳其實已經一路痛緊。 

我地三個距離呀俊都仲有大半個圈，而大家而家跑緊第三圈。 

其實呀俊唔係話好快，大約實力係同呀晨呀洪差唔多，或者更慢。 

但係我兩個兄弟為左同我保持相同步伐，都調整左佢地既速度。 

「肥冬你食左禁藥定係開左八門呀？」 

「係囉，我咁大個仔都未見過跑得咁快既肥仔。」 

果然佢地兩個係輕鬆跑。 



「跑…跑快Ｄ啦仲咁多野講！！！！」我就已經扯曬大氣。 

其他同班既男仔都不約而同為我地打氣。 

「肥冬！上呀！過佢呀！」 

前方既呀俊都不時回望我地柒跑三人組，加快左佢既步伐。 

仲有一個半圈，而我地都只係相差呀俊細半個圈。 

但係我係呢個時候居然發覺自己對腳抽筋！ 

平時唔做運動既後果……成個人差Ｄ跌低，但係兩個兄弟即刻扶住我。 

「有無事？！唔得唔好死頂！」 

望住兩個兄弟一人一手扶住我，拖慢曬佢地既速度，我忽然間覺得自己好無用！ 

望住前面既呀俊，我覺得好唔甘心。 

就好似我輸左呢一場跑步的話，我就會輸曬所有野，無左呀雪，無左呀汶… 

最重要既係我令到兩位兄弟陪我一齊柒。 

唔可以輸！絕對唔可以輸。 

我為既唔係咩野積分，唔係咩野溝女，而係我唔可以要我兩個兄弟陪住我輸！ 

話跑既係我，如果最後放棄既都係我，我就對唔住我自己同呀晨呀洪。 

所以，我傾注曬我所有既力落去對腳度，唔理劇痛，唔理任何野！ 

「無事！」我大聲咁回應我兩個兄弟。 

慢慢我對腳就好似無左痛覺咁，回復番之前既速度，然後跑得更快！ 

三個人一條心。 

要跑完最後呢一個圈。 

「上呀！！！！！！！！！！」 

我地以前所未有既速度追上左呀俊，同佢平排跑過左終點線－－－操場門口既飲水機。 

而我全身既力，都係呢一刻完全消失。 

「喂肥冬！」 

「肥冬你有無事呀？！」 

「任務完成：比陳俊逸更快的速度完成熱身跑步，積分加二。總分八分。」 

我最後聽到既，係粗口venus同埋我兩個兄弟把聲。