DSE點令我由一個毒撚變做player: 10.

[9:22]
距離10點仲有大約半個鐘。
 
我坐左係公園既長椅上面，猶疑梗仲好唔好同佢講好，因為seven佢其實唔同我，seven雖然得170，但勝在性格外向，唔係怕醜仔，已經係a6，老實講，你地應該諗17歲仔呢個數好平常姐，但好可惜我冇，仲係a0，呀唔係，係eu0。
 
我講出黎seven未必明我，佢可能心諗呢d咁簡單既問題，條女都俾哂暗示你，仲唔去馬真係傻的嗎。
 
唉，真係好煩，我呢d性格就係咁，呢樣驚個樣驚，成日都有妄想被害症，做咩事都要諗好耐先肯做，呢樣係我既致命傷。
 
我又諗起f.4個時seven拉我做學生會內閣，當時既學生會內閣入選要求要全科pass，conduct要有a，如果有主科有全級頭30名更會有優先考慮。


 
我記得當時我操行有a，all pass之外中文更有全級17名，完全係符合佢既條件，但到最尾我放棄左呢個機會，點解？
 
因為我怕學生會d活動，我地學校搞好多joint sch，年年有ball都算，一個月起碼有一次joint school camp，老實講，做得內閣即係搞手，你有冇見過d活動搞手唔出席？所以到最尾，我因為怕見到女仔，自願放棄左呢個機會。
 
係，我係d冇女主動送上門，都唔會主動識女既人。
 
我望住地下，又開始跌入濃濃既自卑入面，sad撚到。
 
/


 
都唔知過左幾耐，我俾Seven既一句喚醒左，佢終於都到左：峰，你做咩又頭dup dup呀。。無端端又咁頹既。
 
我望住seven，有種千言萬語在心頭既感覺，但我又唔想講太多，畢竟我期望seven會明白我，有時有d事，兄弟之間無須講得太清楚。
 
我只係應左毫無關係既一句：要你收工咁攰仲要陪我真係唔好意思。
 
Seven望住我，攞左我隔離罐啤酒，「咔」一聲，啤酒應聲而開，佢一啖飲左落肚：你記唔記得我地上次諗住轉口味，買左支果汁酒，哇屌，難飲到呢，所以我幾時都話，無論點都好，原來個隻都係最好。
 
我笑一笑，呢種暗示係我同seven之間既溝通方法，於是我開始入正題：我好似俾人收左做兵。


 
Seven點一點頭，示意我繼續。
 
Seven把玩著手中既酒杯，低頭沉思左已經有10分鐘。
 
我終於忍唔住問佢：點呀，你點睇姐，我仲理唔理佢好。
 
Seven卒之張目光望翻落我度：聽你咁講，你真係好難做。而家又見左，又知道左對方d名，你想走都走唔甩。但繼續做frd落去，佢又不懷好意，我覺得佢係想玩你囉老實講。
 
我點點頭，好認同佢既說法。
 
佢繼續講落去：而家你真係冇得選擇，你唯有被動d，你咪當俾你累積經驗囉，反正你又冇乜點同女仔接觸過，我怕你blk佢，佢又唔知會點諗你。始終有你全名，年齡，起底一d都唔難，你要知道，mk妹起人底既能力分分鐘高過高登仔，到時搵翻你，咪一樣咁煩，分分鐘仲煩過而家。
 
突然間，沉寂已久既電話又響起上黎，上面顯示住：mk淇呢三隻字，我望住seven：點呀聽唔聽好？
 


Seven一把搶左我部電話：呢d奪命追魂call，我幫你聽啦。
 
Seven：峰佢去左廁所。
 
我聽唔到電話另一邊廂講既野，只見Seven皺眉：嗯嗯，好。
之後佢就俾翻部電話我。
 
我焦急咁問佢：點呀佢講咩呀。
 
Seven答我：佢話叫你唔好嬲喎。。其實我聽佢語氣都知衰，不如你原諒佢啦。
 
我聽住seven咁講，都算落左啖氣，始終我當Seven係兄弟，我好信仼佢，佢話點就點。不過Seven你明唔明呀，我都係唔想俾人收做兵姐。
 
我拎起罐啤酒，一飲而盡。
 


Seven望一望錶：我聽日仲要補習呀，1點又要番工，我唔坐咁耐啦，走先啦。
 
我點一點頭，其實Seven真係好辛苦，佢呀爸又死左，靠呀媽做野邊夠咁多支出，所以佢考dse期間都仲要番工幫補家計，邊會有時間溫書，我都無謂強人所難。
於是我揮一揮手：好啦，加油，多謝你陪我呀今日。
 
Seven笑一笑就走左。
 
行左冇幾步佢又折返，拍一拍我膊頭：有咩事記得搵我呀。永遠都聽你電話架。
 
我望住佢，感動到唔知講咩好。