『假人真事』我的宅男脫毒日記: 7.九月九日

九月九日        陰
 
經過尋日一役，我已經信心全失，摺埋一角上高登。
 
「你唔識唱歌姐，你可以跟我去打網球。」
 
湯米為左補救尋日嘅事，話今日帶我去網球學會注冊入會。古人話「拼死無大害」，更何況我尋日已經死左一次，我考慮左一陣，就應承左跟湯米去注冊。
 
「放心啦，佢地注冊唔駛測試，你唔識打網球都得嫁，佢地會有人教你打嫁啦。」
 


湯米一路笑笑口咁講。今日經過動漫學會，個Cosplay 女唔見左，得返啲毒男坐係到。一路上有好多人同我地招手，但我心情極低落，冇理過佢地。
 
去到網球學會嘅攤位，有囡囡立即埋嚟同湯米打招呼。網球學會個攤位冇合唱團果個咁大，佈置好簡單，只有一個展板，上面掛左塊網球拍，黐左兩個網球。
或者依種規模嘅學會更適合我。
 
湯米一嚟到，就鼠左去攤位後面密密針，留返我自己戇居居咁罰企。
 
「靚仔，嚟唔嚟打網球呀？好好玩嫁。」
 
攤位裡面一個女仔同我講。我仔細咁打量佢，佢上身著住紅色嘅網球學會T恤，下身著住牛仔熱褲，加一對粉紅色Nike 波鞋。身材用三個字形容「高瘦平」。雖然佢把長髮亂到好似稻草咁又唔扎起佢，但配上小麥色嘅健康長腿搭救，都不失為一個索女。


 
「打網球？我想打呀，但係我未打過喎。」
 
作為一個宅男嘅壞習慣又出哂黎，我冇理由話自己乜鬼都唔識。我應該咁講：
 
「打網球？好似幾正喎，我打開乒乓波，拎拍打波應該難唔到我。」
 
可惜，上面果句我已經講左出口，收唔返。
 
索女冇介意過我未打過，佢同湯米講一樣嘅說話。


 
「我地到時有專人教新人打波嫁，你著運動衫同波鞋嚟就得。」
 
我聽到之後好開心，尋日出醜嘅心情一掃而空。我即刻叫索女幫我注冊，佢比左張A5 表格我，叫我坐低慢慢填。我拎張學生證出嚟比佢地做登記，期間索女一路搭住我膀頭一路教我張表格點寫，令我感受到佢地新人無比嘅關心。依次亦都係我一生中同女仔最近距離嘅一次。
 
我借機問索女叫咩名：
 
「我叫阿田呀。係網Soc 嘅文書。」
 
阿田，佢就係我第一個係大學入面第一個識嘅女仔。
 
我填完張表格，阿田用右手搭住我左邊膀頭，問：
 
「嗱，如果你買Soc Tee 呢，就四十蚊。加埋會費就係六十。」
 


嘩！六十蚊咁貴？唔好去搶！唔怪得頭先對我咁鬼好啦。此刻我諗起前年暑假比人昆左上傳銷公司，果個阿姐都係咁鬼死窩心。
 
「如果你冇帶錢，可以叫Tommy 幫你比住先喎。」
「真係可以？」
「更係得，信得過你嘛。咁你買唔買Soc Tee 姐？」
 
原來都仲有啲人性。我盤算下，如果到時新人見面，個個著Tee 但我冇，咁好似好生外。我如果要打入佢地，少少投資係必需，四十蚊，好過買咩四九九九啦！
 
「好呀，但我真係冇帶錢，唔啱我而家去撳錢比你吖！」
「唔駛咁麻煩啦！到時你比阿Tommy 就得，我會同佢收啦。」
 
我望一望湯米，佢同啲朋友傾到興高彩烈，一眼都冇望過我。
 
「咁好啦，麻煩Tommy 啦。」
「你真係好有禮貌，我比張卡片你。」


 
張卡片背面印左好多人嘅電話，包括阿田。正面就係設計得好核突嘅網球，唔留心睇，你以為佢係足球。
 
「O night 之前會打比你啦。」
阿田話，過冇耐會有個叫O-Night 嘅迎新活動。我同佢道別後，望一望湯米，佢仲未捨得走。所以我好滿意的自己返去上堂。我總結今日嘅結果，拎到第一個女仔電話，我一路行一路笑。返到課室，文西以為我撞到個腦，因為我一直傻笑。