『假人真事』我的宅男脫毒日記: 8.九月十日

九月十日        雨
 
「你條仆街，快啲囉返六十蚊嚟。」
 
湯米追住我拎返果六十蚊，佢尋日係唔知情嘅情況做咗我擔保人。我打開銀包，得果廿蚊，我只好落去地下圖書館到撳機。
 
行去撳機，又要經過學會擺攤位嘅地方，通常都冇咁早開，原因可能係要上堂或者起唔到身。但係有一檔，有一個女仔坐。我出於好奇行埋去望，係扶老會嘅攤位。正當我思索緊扶老會到底點解係到出現嘅時候……
 
「先生，有冇興趣加入我哋呀？」
 


剛才坐係嘅女仔，企左起身。佢衣著好吸引，淺粉紅色連帽外套再加上一條黑色及膝波點裙。頭戴一個黑色閃石頭箍，兩邊卷曲頭髮垂下，剛好遮蓋胸部。係香港少見嘅日系風格打扮。
 
經過尋日一役，我現在自信心爆棚。我當然唔會放過依個絕佳嘅機會。特別日系風格打扮對我依種毒男嚟講簡直正中紅心。
 
「扶老會？係做啲乜野嫁？」
 
雖則我個心中左箭滴緊血，但突然有份奇怪嘅矜持阻止我立即叫好。
 
「哦，我地係以社會服務為主導嘅國際組織，我哋活動包括探訪老人院啦，參觀政府機構啦，體驗貧窮啦，文化交流……」
「聽落好似好有意思，點報名嫁？」


「你填左張Form，再交廿蚊比我就入到會嫁啦。」
 
我好似尋日咁，坐係到乖乖地填表。佢並冇好似阿田咁搭住我膀頭，只係企係我旁邊，雙手緊扣。我擰轉頭望一望佢，佢就對我微笑一下。
 
「攪掂！」
 
我遞返張表格比佢，佢對我笑一笑，雙手伸出，接實表格。
 
「歡迎加入扶老會。」
 


佢微微咁向我躹躬。由比左張卡片，同一張A5傳單比我。佢叫我記低傳單上面嘅日子，到時準時到，會有迎新會。跟住就同我講拜拜。依一刻，空氣中好似充滿左粉紅色咁。
 
我離開扶老會攤位，一邊暈浪邊返課室。
 
「錢呢？」
 
湯米打開我個銀包，本來果廿蚊都唔見埋。
 
「你到底去左邊？攪咁耐連本來果廿蚊都冇埋！」
「哈哈，得啦，食飯果陣撳比你！」
 
我一路傻笑，一路用力咁拍湯米，示意佢放心。