九月十二日「下」        晴
 
「我係Cherry 呀,係網Soc 嘅副會長。」
 
正當大家介紹緊自己,突然眼前一黑,湯米係燈光下跳出嚟介紹自己。
 
「大家好,我係湯米,我宣佈,網Soc O-Night 正式開始!」
 
湯米好核突咁介紹完自己,我哋開始玩啲破冰遊戲,不過我哋組除左組爸媽全部都係毒男,除左Cherry 外,我一個名都冇記到。
 


好快我因為冇記到人名,輸左破冰遊戲已比人推左出去罰。出到去湯米竟然話轉頭有時間罰我哋,又踢返我哋返去個組到。
 
「咁我哋玩下一個遊戲,叫盲俠一條龍。」
 
我覺得個遊戲名好咸濕,應該幾好玩。但我果組得毒男,遊戲性大打折扣,好彩仲有Cherry 組媽係到。
個遊戲好簡單,只係綁住對眼,雙手搭住前面個膀頭跟住指示出去行過圈就得。
 
「大家聽我指示。」
 
Cherry 組媽大嗌。咦?唯一一個女去左做指示員,咁咪姐係條隊都係毒男?


 
「該煨囉。」
 
我聞到一陣味,唔係煨番薯味,係一陣男人臭汗味。我一路跟住指示行出課室,, 路上鬼死咁多指令同任務。我唔記得做過乜,只記得路人嘅笑聲一路伴隨住我哋。
 
返到去課室,我除低眼罩,發現對面個毒男塊面比人畫到花哂,我立即恥笑佢。
對面個毒男即刻拎相機影我。
 
「大佬,對唔住呀,唔好放我上Facebook。」
 


我即刻央求對方唔好因為我嘅恥笑而報復,點知對面比張相我睇,頂,我塊面乜鬼狗屎垃圾都有,唔打只係畫畫咁簡單,最令我在意係有一督屎狀物係面上。
 
「唔係屎嚟,你放心啦,哈哈。」
 
Cherry 同其他人係旁邊喪笑。我只好跟住佢哋以笑遮醜。
 
「好啦,大家而家應該好High,但跟住落嚟會玩毛毛蟲,會重High!」
 
毛毛蟲號稱咸濕遊戲之首,玩法係用雙腳蹺纏坐底左嘅前方,然後前進,期間可以用雙腳接觸到對方嘅重要部位。不過唔係O-camp 限定咩?你哋都好猴禽下喎。
 
依個時候,阿田Cherry 一齊拉入嚟玩。發達啦,可以同兩位靚女有親密接觸!
 
「頭先Ice-Breaking 輸左嘅人出嚟。」
 
我立即比人推左出去,湯米話輸左嘅人要做掌上壓,咁好易姐。我諗住快啲做完返去玩毛毛蟲,趴低準備起動。


 
「話明係罰,點會咁簡單呢?你哋要做嘅係四人掌上壓。」
 
所謂四人掌上壓,同普通掌上壓姿勢係一樣,只係雙腳放係隊友身上,姐係話雙手要支持埋隊友嘅重量。
 
「係佢哋玩緊毛毛蟲期間,你哋要一直支撐住。」
 
嘩!今次仆街了,咁咪姐係冇得玩毛毛蟲?我一路撐住,一路望住班友玩毛毛蟲玩到鬼咁開心,鬼咁淫殘。我只能輕嘆「這些機會不是屬於我的」。
 
到佢哋玩完毛毛蟲,我已經筋疲力盡,連湯米問我好唔好玩,我都冇力氣再理佢,而且,佢今日個造型好黑人憎。
 
已有 0 人追稿