『假人真事』我的宅男脫毒日記: 10.九月十二日(上)

九月十二日「上」        晴
 
今日係星期五，天晴，更加係網球學會嘅迎新夜。我一再重覆睇卡片上嘅日子，冇錯，係今日。為左隆重其事，我專登著件Soc-Tee 返去，但我搵極都搵唔到衣櫃都搵唔到條似樣嘅運動褲。我諗起我以前中學條運動褲係黑色，搭埋其他衫著，應該冇人知係校服。再搭埋我用暑假實習人工買嘅空氣力量一號波鞋，應該唔會太核突。我臨出門口仲照一照鏡，確保每部分都冇出錯先去返學。
 
返到學校，我見湯米著到成個70年代英國佬咁，綠色西裝外套再加埋紅色煲呔，坐係課室對住教授食早餐。
 
「阿飛，今日著得潮左喎。」
 
湯米一見到我身打扮就咁讚我，梗係啦，我花左幾多腦汁去諗今日個造型呀。
 


「你都好型姐，打哂呔喎。不過今日唔係要打波咩？」
「吓？打咩波？我哋今日場都未Book 到，今日係O Night 呀，唔打波嫁。」
 
唔打波，咁我著到咁做咩？好彩湯米話我潮左，唔係我今次真係柒左。我一路追問湯米今晚玩咩，佢唔肯答，剩係話佢今晚做主持。我又再追問，最後佢直頭坐開唔睬我。
 
※
 
我跟住卡片上寫嘅房號去到房門口。課室門口擺左張檯，坐咗條女，個樣串過馬撚。
 
「Freshmen 呀？叫咩名呀？」


「冼鳳飛。」
「冇你名喎。登記果陣有冇寫錯名呀？」
「唔會嫁。你再Check 多次啦。」
「真係冇喎，邊個打電話比你嫁？」
「吓，冇呀。」
「咁你點知要你依度？」
「我跟住卡片寫嘅房號嚟嫁。」
 
串女一回頭對住班房大嗌：
 


「邊個仆街比左卡片人又唔打電話呀。」
 
房入面冇人認，串女又問我邊個同我登記，我話阿田。串女就比左張黃色貼紙我，然後叫我入去坐。
 
果張黃紙係分組紙嚟，除左我個組一共有六組。我問坐對面個毒男：
 
「今日唔係打波咩？」
「迎新打咩波？」
 
從佢嘅語氣，我聽得出佢唔係第一次參加迎新晚會，估唔到迎新會都有老手。我諗極都唔明點解佢要參加咁多迎新會。
 
其他組嘅人慢慢咁嚟齊坐低，唯獨我果組少緊啲野。少緊的咩？當然係囡，其他組有男有女坐底嘻嘻哈哈，唔知點解我果組坐極都係同我一樣嘅毒男。
 
「冇咁岩嘅，一定會有靚女坐埋嚟。」
 


我不停咁同自己講。過左冇耐，有個黑黑實實，靚仔高大嘅男仔坐左埋我果組。
 
「嗱！有靚仔肯定有靚女啦。」
 
果然比我貼中，之後有個細細粒，白白淨，著住藍色Soc-Tee，黑色短褲嘅女仔坐埋嚟。我內心立即感到無比雀躍，希望可以快啲開始，同靚女玩遊戲。
 
靚女一坐低，個靚仔就講：
 
「歡迎大家，我係你哋嘅組爸組媽，我哋組齊人啦，可以介紹下自己先。」
 
姐係話，我果組全組毒撚，一個女仔都冇……