『假人真事』我的宅男脫毒日記: 14.九月十六日

九月十六日    晴
 
今日放學，我照約定跟文西去買衫脫毒。我認為文西冇石他咁瘋狂，會叫我去買四九九九。阿魚同湯米聽到又跟住黎，應該都係嚟八卦食花生。
 
「我哋去睇下啲好嘢先啦！」
 
文西一開始帶我去睇「火冰」同「資訊工程」。文西話，睇下人啲靚嘢，未必要買嘅，我深表認同。據聞石他平時多數係依兩間買衫，我望住尋晚石他著過嘅外套款色，索價一千一百。
 
「唔通溝女要一擲千金先得？」
 


我心裡不禁咁問。以往我嘅衣服都係老母幫我包辦，大多數都係「拔難勞」同「薄仙尼」出品，一件衫絕少過一百。除左隆重嘅衣著，例如西裝。原來石他佢一件普通衫嘅價錢已經係我兩年買衫嘅總和。
 
我哋最後全部人都冇幫襯，兩手空空咁離開依啲貴價鋪。
 
「頂，好鬼貴呀，去U記睇啦。」
 
我估唔到平時著得奇形怪狀嘅湯米會咁講。我以為佢係因為買得太貴又缺乏品味，先會攪出奇怪嘅造型，我突然好想知佢果晚係網球學會果件綠色西裝外套再加埋紅色煲呔，買左幾錢。
 
「湯米，你果日係網soc 果套戰衣係邊買嫁？」
「吓，你想執我果套？果套唔係比你脫毒嫁喎！我出show 先咁著姐。」


 
湯米話比我知，佢套戰衣不過係係深水埗啲批發店到執返黎，成套買唔過三舊水。原來湯米都知自己造型奇怪，我忽然對依次「執Look」作戰有返少許信心。
 
話說文西嘅打扮近日越黎越誇張，好似今日咁，佢整個爆炸頭，再加上白下藍嘅裝扮，佢個人又肥肥哋，遠睇極似叮噹。唯一打扮正常嘅應該係阿魚，雖然佢打扮一啲都唔潮，但佢係運動健將，身型成個模特兒咁，買褲唔駛改長修短，著乜都咁好睇。
 
就係咁，我哋一行人，兩個奇怪打扮，一個毒，一個模特兒身型行入毒脫聖地U記睇衫。
 
「揀衫奇實好簡單，你睇啲Sales 點著，照Copy 一份實冇衰。」
 
湯米細細聲咁同我講。


 
「照Copy 女裝？」
 
我問。唔知點解搵勻坐場一個男售貨員都冇，成場都係後生女售貨員。果然師兄冇講錯，工程真係害人不淺，即使女多男少嘅香港，毒男工程系大學生都係搵唔到女朋友。
 
我唯有對住啲公仔做參考，湯米話買之前一定要試身，因為我身材差，唔似阿魚，著左未必好睇。
 
文西就好似發左狂咁，件件都話岩叫我試下，係佢兩個夾攻下，轉眼間我已經試左廿幾件，更衣室個女售貨員見到成班佬係咁窒我試衫都係到偷笑，但係我好樂意，因為個售貨員幾可愛。
 
「幫你執左三個Look 啦，你以後自己識買啦。」
 
文西得意洋洋咁講，埋單唔駛一千蚊，已經用左成年買衫嘅預算，不過我好高興，因為我錢真係有限，雖然著起黎都係唔夠石他型，但我唔需要好似石他咁多女朋友，我有一個已經足夠。