九月十七日    陰
 
今日下晝,有把女聲打嚟我依個毒男嘅電話。
 
阿飛,我哋今日O Night,你記得嚟呀。」
 
把女聲好似同我注冊果個女仔,唔係佢提我,我差啲唔記我左今日係扶老會嘅O Night,由於扶老會係我自己一個膽粗粗去參加,所以冇任何熟人同我一齊去。
 
由於我尋晚買左堆新衫,已經自感脫毒嘅我信心滿滿,一個人就行去到集合嘅地點,上星期幫我注冊果個女仔坐左係門口,佢同果日一樣,淺黃色嘅恤衫加上深藍色九個骨牛仔褲同波鞋,感覺青春可愛。
 


「阿飛,咁準時呀。」
 
佢微微則起個頭向我打招呼,我果該好興奮,佢竟然仲會記得我個名,正當我急忙想向佢打返招呼,我先醒起我唔知佢叫咩名。
 
「係呀。」
 
我口窒窒咁回應,打招呼過後,我開始自責,冇辨法係見面留下好印象。仲開始有少少情緒低落。
 
扶老會啲人感覺比網球學會啲人友善好多,周圍嘅人都會向你微笑,可能做開善事嘅人冇咁功利,亦可能我衣著上脫左毒,大家先敬羅衣後敬人。
 


但係房坐下坐下,我果組又越黎越多毒男。
 
「唔通佢地又編我去毒男組?明明我買過哂啲衫啦喎。」
 
我撩下對面個毒男吹水。吹下吹下,我先知道原來佢地將工程系學生分埋一組,唔怪得全組都毒男啦!諗出黎果個唔係天才就係狗厹,驚死人溝哂佢啲女!
 
雖然又係同啲毒男一組,不過扶老會嘅遊戲唔係乜野咸濕遊戲,感覺好似去左領袖訓練營咁,好多係增加自我認識嘅遊戲。我同同組毒男好快就熟左,傾左好多動漫遊戲,到迎新夜結束,我感覺自己圈子擴闊左,不過同時又毒多左幾分。
 
「我要鼓起勇氣,問果個靚女電話。」
 


我覺得自己實在太失敗,我竟然唔知佢叫咩名,我行去佢面前撩佢傾計。
 
「其實係邊個諗出用學系分組?」
「咪我囉,你覺得點?」
 
聽到條屎橋係我面前依位可愛女孩諗出黎,本來諗住開口大鬧嘅我,轉呔漂移比某某香港特首仲要快。
 
「掂啦,我即刻同我同組果個男仔一計傾,我上次去網Soc 悶到死,全晚都講唔過十句野。」
「咁就好囉,我幾驚大家唔中意咁分組。」
「係喎,我都未知你叫咩名。」
 
佢好驚訝,仲為注冊冇介紹到自己道歉。佢嘅態度卻令我感到更加羞恥。
 
「唔緊要,你比你電話號碼我,我入落自己電話簿,以後就一定記得你。」
 


我竟然講出好似狗厹一樣嘅說話,佢聽到亦到好錯愕。大家沉默左一陣,佢開口尷尷尬尬咁樣講左電話號碼比我聽。
 
「68755xx,何蘊妏。」
「唔,你有咩特別事可以打比我。」
 
扶老會嘅迎新夜玩得好開心,好舒服。唔知係咪依種環境助長左我嘅勇氣,定因為洗左一堆錢買左一堆衫,我竟然係咁突兀問女仔囉電話。點都好,有電話總好過冇電話,今晚都算係成功嘅一晚。
 
 
已有 0 人追稿