『假人真事』我的宅男脫毒日記: 17. 九月二十九日

九月二十九日 晴
 
工程系實在太忙，我連寫日記既時間都冇。
 
網球學會例行練習已經去到第二次，人數比第一次少左。但係網球場上嘅網球仲係比煙花既火舌更密。
 
網球場共有四個，一邊比新人練習，人仲多過波，好多人亂揮拍打中旁人，非常恐怖。另一邊就比較熟練嘅人打正式嘅雙打。
 
我之前從未打過網球，好彩中學時玩開球類運動，好快上手，可同對面搓到兩下。佢哋比我排正式嘅雙打。
 


輪到我嘅時候，對面企左一男一女，應該都係新人。我排隊嘅果陣冇專登揾定隊友，所以我一個行出場中間。
 
「喂，你冇partner 呀？」
 
場外面嘅Cherry 大叫。我表示係。
 
「阿田，你同佢打啦。」
 
阿田睇落唔係咁願意，可能怕我打得差，攪到佢浪費一個打波嘅機會，基於佢係莊員之一，帶新仔打係佢職責之一。
 


「我打後面，你企去前面啦，冇信心嘅波唔好接，留比我打就得。」
「冇問題。」
 
我背對住阿田擺出OK嘅手勢擺出。打果時我好聽話，有波先接，發揮得唔錯，有時仲拎到分。
 
「阿飛，你打得幾好喎，加油呀。」
 
阿田好開心咁讚我，可能佢冇諗過我可以打到依種程度。臨離場，佢舉起白淨嘅手掌，手心向我，我諗手掌應該係佢全身可見最白嘅部位。
 
不過，我攪唔清左佢嘅用意，咁樣係同我講拜拜定網球術語。


 
「Give me five 呀。」
 
佢碌大隻眼望住我，我慢一拍伸手擊掌，佢之後怕怕羞咁笑。我好難為情，亦都跟住佢嘅笑聲傻笑。