『假人真事』我的宅男脫毒日記: 16. 九月十八日

九月十八日    雨
 
「我終於成功拎到佢電話啦！」
 
我好興奮咁同文西講。
 
「相呢？」
 
文西問我，我唯有打開Whatsapp 搵蘊妏張相比佢睇。佢睇完話好掂，叫我加油。
 


「加咩油呢，我依家岩岩識佢，就係想問你點攪好。」
「人地有冇男朋友先？」
 
作為一個毒男，我假設左所有人都係單身，當然事實唔係咁。
 
「你望下人地Facebook 有冇男仔親密合照先啦。」
 
我係扶老會面書搵到蘊妏，但係佢鎖住哂啲相，我唯有加佢朋友。
 
「咁快就Accept 你，睇黎對你印像唔錯喎。」


 
蘊妏差唔多秒速確認我交友要求。文西搶左我部機，係咁係蘊妏個面書狂掃。
 
「恭喜你，睇Facebook 唔見有男朋友。」
「即係代表佢冇？」
 
我心中大喜，原來我形勢大好，第一次拍拖個女朋友就咁可愛，上天待我不薄。
 
「或者佢唔中意親密照咁揚姐。」
 


旁邊拍拖經驗豐富嘅石他好冷淡咁講。
 
「咁我應該點做？」
「直接問佢最好。」
「點問呀？直接Whatsapp 佢問呀？」
 
文西同石他異口同聲咁鬧我痴線，然後一邊搖頭一邊笑。
 
「你平時傾計，借機問下嘛。」
「姐係點呀？有冇例子呀？」
「例如你問佢今日去邊，佢話約左男朋友，咁你咪知佢囉。」
「如果佢冇男朋友，咁樣咪傾成世都唔知？」
「咁你嘅問題可以進取啲。」
「姐係點？」
「你見佢一個人係到等人，咁咪問佢係咪等緊佢男朋友囉。」


「好橋喎，咁我咪要扮撞到佢先得。」
「妖，你真係好鬼蠢。」
 
石他好唔耐煩，搶左我部手機睇。
 
「喂，你一句野都未同佢講過，點問呀。」
「咁點算？」
「頂！」
 
石他係我部手機同蘊妏對話。
 
「Hi」
「？­」
「上緊堂呀？」
「係呀。」


「我想問你，覺得依件野點？」
 
石他隨手影左文西啲懶可愛女性化公仔比佢睇。
 
「幾好呀？但你想要黎做乜？」
「諗住送比人姐。」
 
石他扔返部機比我。
 
「嗱，頭就開左，你自己繼續啦。唔係我就溝埋你條女嫁啦。」
 
我點頭示意感謝。我接手自己部手機，大腦開始閉塞，對住對話框呆左係到。
 
「快啲覆啦，熱情冷卻左就冇。」
 


我唯有覆佢係想買比個妹做生日禮物，事實我個妹仲有六個月先生日。
「哈哈~如果佢中意依隻卡通人物咪ok 囉。」
「如果係你收到呢？」
「我呀？我對依隻野嘛嘛哋，唔講啦，上堂！」
 
我似乎終結左個對話，文西係一邊笑過不停。我只好再請教石他。
 
「咁快就完左啦？睇過？你心急咗喎，好似想送比人咁。咁冇辨法啦，隔一日再Whatsapp 佢啦。」
 
石他話，對方主動完左個對話，就唔好煩住人，最好隔一排先搵返佢。我問石他，點解我一接手就終結左話題，石他只係叫我慢慢嚟，囡囡一開始有戒心好正常。
 
我好失望，我第一次主動Whatsapp 囡囡嘅對話一句之內就完左。