『假人真事』我的宅男脫毒日記: 20.十月六日

十月六日        陰
 
石他竟然成個禮拜先返一日學，我把握機會，將我嘅情況同佢陳述。
 
「你嘅情況都幾好，Keep 住應該有機會，不過前題係人哋未有男朋友。」
「但我仲未問到喎。」
「你入左扶老會做Core 好快就會知，網Soc 果個你要觀察多啲。」
「點觀察？」
「你打完波，都成十點十一點，睇下佢有冇男朋友接囉，或者睇下佢有冇一直傾電話到去火車站。」
「咁如果冇呢，咁係咪可以約出黎？」


「約？你指約會？你依家咁生疏，九成食檸檬。」
「咁我依家點做好？」
「主動啲同佢哋混熟先，同時保持形象。一個圈子只有中上嘅人拍到拖，女人係重視評價嘅生物，你要爭取圈子裡面嘅形象，等每個人都覺得同你拍拖唔錯，你先會溝到入面嘅女。」
 
石他叫我慢慢嚟，唔好心急，嚇親人。我覺得石他經驗真係好豐富，冇左佢，我會撞好多板。
 
夜晚我就去網球學會嘅例行練習，好似又比上次少人。
 
我先去新人練習場同個毒男新仔搓左陣波，之後就去排雙打場。
 


「你今日可唔可以再同我夾返場？」
 
我諗起石他成日鼓勵我主動啲，我冒住食檸檬嘅風險邀請阿田，如果係扶老會我唔會咁驚，因為依邊對毒男真係苛刻好多。
 
「吓，你唔介意我佔左你哋新人打波嘅時間我冇問題呀。」
 
雖然阿田好似我搵返新人打，不過囡囡全部有人夾，既然要溝女，更係搵返阿田。
 
阿田擺出唔在乎嘅樣，但佢啲朋友對我咁唐突嘅邀請有少少驚訝。
 


「不如今次我哋輪流打後面？」
 
我為左爭取表現，向阿田提出要求。
 
「你確定？後面走動大好多，技術要求都大好多。」
 
阿田有啲唔係好情願，但可能因為我堅決嘅態度，迫不得而應承。
 
後面真係比前面難打好多，對手接連係我手上得分。好彩對方都係新人，有時打左去阿田到，阿田立即殺波，搶返啲分。
 
最後都係輸左.。
 
「點呀，後面係咪難打好多呢？」
 
阿田用帶有輕蔑嘅語氣同我講，我只好笑笑口點頭。


 
「係嘅師姐，請日後多多指教。」
「哈哈，點解你講野成個阿叔咁？」
 
阿田聽完之後大笑起嚟，我當然跟住佢笑，因為我毒到跟本唔知比咩反應好。
 
我跟住石他咁講，散場果陣唔見佢有男仔接，都唔見佢拎住電話猛講。相反，臨走果陣仲專登同回頭同我講拜拜。我諗佢應該未有男朋友。