十月十日        雨
 
今日係民主中國嘅國慶,不過依家香港偏地紅旗同藍絲,自然冇人記得。所以溝女行動都可以繼續。
 
早幾日我短訊左蘊妏我答應成為扶老會新計劃嘅核心成員,今日就係第一次開會嘅日子。
 
我準時去到會議地點,上次周會嘅人有幾個唔係度,我諗佢哋拒絕咗邀請。計埋蘊妏,有八個人係會議室。三男四女。
 
「我遲咗?」
「唔係,你好準時。」


 
蘊妏笑笑口咁答我。佢跟住比左張紙我,係會議議程。
 
「大家都知我哋係一個新成立嘅小組,其實我哋目的係關心交流或者留學生。」
 
蘊妏一臉正經咁講開場白。大家都好留心聽。
 
 「咁樣,點先為之關心?同佢哋傾電話?揾佢哋食飯?」
 
我好疑惑,因為從來冇人關心毒男,要我去關心人,真係缺乏經驗。


 
「你唔駛急住先,我哋議程就有依一項。大家可以輪住比題議。」
 
大家傾咩係關心,點先算關心到人,既然傾左粒幾鐘,唔怪之得成日聽人講開會開通宵囉。
 
最後大家達成既共識,就係留學生大時大節最寂寞,所以陪佢哋一齊過就最好嘅關心。
 
「最近嘅節日就係聖誕節,姐係攪聖誕聯歡會。」
 
蘊妏聽完我哋共識就講。依個提議唔錯,可以比我哋識到孤獨嘅單身女留學生。


 
「不過日子呢?」
「十二月廿四號?」
 
我搶住回答Amy 嘅問題,點知佢成為左我第一個得罪嘅女人。
 
「廿四號唔實際。」
「點解?」
「可能好多人出現唔到。」
「唔出現咪仲好,姐係話佢哋都有人約啦。」
「我唔係話佢哋,我話我哋。」
「咁你話,過節冇人陪好慘,咁依家又唔陪,姐係點呀?」
「提早幾日啦。」
「咁正日咪孤獨囉?」
 


我同Amy 爭論,佢塊面越嚟越紅,我當時唔知咩事。
 
「咁你不如問下廿四有幾多人嚟到?」
 
有一半人舉手,包括蘊妏,當然Amy 係嚟唔到。
 
「咁冇辦法啦,得一半人唔夠人手,22號呢?」
 
22號只有Amy唔得。
 
「咁我哋暫定22號啦。」
 
Amy 直到會議結束,只要我提意見,佢一定揾嘢反駁。
 
「咁我哋分工啦。」


 
分工後,我係做聯絡。負責打電話叫人嚟,預訂場地等等。姐係話我有哂全部人嘅電話。
 
「你舐嘢啦,你得罪左Amy。」
 
毒男卡勞同我講。Amy 出名小氣,任何人只要得罪佢,都會一直比佢盯住。佢話Amy平時唔會咁易嬲,可能我天生夠毒,一下就攪掂。
 
已有 0 人追稿