『假人真事』我的宅男脫毒日記: 24.十一月十四日

十一月十四日 晴

恐怖嘅中期考試終於結束，學校嘅活動開始恢復。不過，文西有女朋友一事一直纏繞住我，一係我唔相信有一個女仔可以容忍到佢可以沉迷AKB。二係佢一直係我面前親熱。

我見文西都有女，開始焦急。開學到而家，我最熟嘅係阿田同蘊妏。當中蘊妏同我大多係公事上交流。相反阿田係網球學會係同我好熟，我決定先由阿田開始。

「你最後果次Training 好似心情嘛嘛喎。」

十二碼一係入，一係唔入。同我冒險Whatsapp 阿田嘅情況一樣。



「果日我就比賽，但係發揮麻麻。有啲躁姐。」

阿田附上一個笑臉公仔表情。我諗我應該冇得罪到佢。

「咁，最後輸定嬴呀？」
「唔好提啦。」
「最近有套迪迪尼動畫上，啲人話好好睇，你會唔會去睇？」
「會呀，套戲上集已經好好睇啦。」
「咁不如約埋一齊去睇啦。」



我單刀直入，文西嘅拍拖的確攪到我好心急。

「呀Cherry 同佢男朋友都好似想去喎，仲有幾個，你不如問埋佢地一齊去睇啦。」

我判斷阿田係拒絕我，但被拒絕都要顯得大方啲，所以我扮到我真係好想睇套戲。

「咁好啦，我問埋佢哋睇唔睇啦。」
「好呀，再講啦。」

然後我就係個Whatsapp群組裡面問有冇人想睇依套戲，不過冇咩人回覆。