『假人真事』我的宅男脫毒日記: 25.十一月十六日

十一月十六日        晴
 
過左兩日，我又哀又篩，群組入面都冇人話去，我搵返阿田，點知佢竟然話：
 
「唉，唔好咁煩啦，我哋兩個去睇啦。」
 
咦，咁係咪姐係得米？我即刻追問幾時睇，佢話只有今晚得。我當然好興奮，走堂出去買飛。
 
阿田上堂上到6點半，我晏晝就鼠左出去買飛，行商場行左幾粒鐘，先等到8點鐘開場。
 


我襯空閒時間買定一堆零食，阿田Whatsapp 我話佢都會買，唔駛帶咁多。阿田真係一個好女仔黎，唔駛我一個人出哂零食錢，高登幾多巴打投訴佢地女朋友一個仙都唔肯出。
 
終於等到阿田黎到，我好細心，又問佢食左飯未，又問佢凍唔凍有冇帶衫咁。入場前仲陪佢行左陣街。
 
入到戲院，我當然拎啲零食出嚟分享。佢就拎左桶爆谷出嚟，係桶裝超市賣果隻。開個封條果陣，啪啪聲成間戲院都聽到。我好尷尬，阿田就完全當冇嘢。
 
套戲做到一半，我想拎啲爆谷過下口癮，不過原來放係佢大脾個桶嘢就唔見左，仲摸到佢大脾。我即下撒哂冧啦。
 
「你想食呀?我收埋咗啦，留返屋企食。」
 


好好彩佢唔係覺得我咸濕佢姐。到最後完場，我啲零食全部食哂，佢自己就帶返一半返屋企。
 
當然，有女仔同我睇戲我已經執到，為左表現我嘅紳士風度，我開口想送佢返歸。
 
「唔駛啦，你聽日返早。」
「但你一個人危險喎。
「冇嘢嘅。」
 
佢堅決拒絕，我唯有放棄。我目送佢間車離開，睇完戲後佢全程都冇乜表情，我諗我都係失敗咗。