樓下有喪屍: Act 8 命運的徵兆
「不如．．．我地將部份嘢食放落袋，in case我地要放棄架車仔，都不至於無晒嘢食。」勤力德說
「都啱喎，咁每人都袋啲啦．．．」我拿走了數個罐頭和數支水
「唔．．．我．．．我無袋．．．點算．．．」呂晨尷尬說
「唔怕啦，我地可以經過袋舖先去酒店，到時拎定幾個。」阿立說
「咁好啦，我地出發！」我說
可幸商場還有電力供應，我們乘坐昇降機到六樓。來到了一所運動用品店，果然，一如預期，這裡的喪屍為數不少，不過幸好密度不高，不難應付。
「阿強同呂晨入去拎袋，順便換埋波鞋，阿立保護佢地，我同求撚奇守住門口！」我說
喪屍們開始慢慢靠近，呂晨和阿強也立即更換運動鞋方便逃跑，並拿走了數個背包。
「搞掂！走走走！！」阿強跑出來說
我們邊戰邊回到昇降機，呂晨立即把一些食物放進背包。這次我們來到了四樓，即是通往朗豪酒店的一層，我們離開昇降機，從轉角探頭看過去通往酒店的天橋．．．先不說另一邊美食廣場那迫得滿滿的喪屍群．．．我們和通往酒店的天橋之間的廣場位置都已經迫滿數百隻喪屍．．．情況看來並不樂觀．．．
「咁樣無可能過到去．．．」阿強說
「唔．．．或者我地搭lift上頂樓避一避先，上面我地一樣可以望返落嚟，同時上面一定無咁多喪屍，我地上去再諗辦法。」我說
我們再次乘坐昇降機來到十三樓，亦是商場的最高層。這裡是一個酒吧，絕對不會有大量喪屍。我們離開昇降機，意料之外的不只是沒有喪屍，反而是地上躺著數具屍體！
「成地都係屍體嘅．．．」呂晨不敢前行
「．．．唔係喎．．．依啲係喪屍嘅屍體嚟喎．．．好似係．．．」勤力德說
此時，一個男人從酒吧走出來用槍指著我們！！
「全部咪郁！跪喺地下！如果唔係我就開槍！！」男人大喝
我們立即跪在地上！只有求撚奇沒有．．．
「你邊撚度架！！大鳩我呀！！！」求撚奇大聲說
「．．．識講嘢即係人啦．．．咁就好啦．．．」那男子放下槍
我們慢慢站起來．．．
「你係咩人．．．？」我說
「唔好意思呀嚇親你地．．．我怕你地都係嗰啲怪物，所以先用槍指住你地．．．我係便裝嚟嘅，你地可以叫我軒哥。」男子說
「得你一個？」我說
「唔係呀．．．入面仲有幾個人．．．我都係為左保護佢地先咁緊張．．．你地可以出嚟啦，佢地係人嚟架。」軒哥說
隨著軒哥示意，數個男女從酒吧裡走出來．．．
「咁．．．你地都係上嚟避難？」軒哥說
「算係啦．．．我地本身諗住過去朗豪酒店，但係你望落去都見到．．．我地根本無辦法過去．．．所以諗住上嚟依度會少啲喪屍，可以抖下再諗辦法。」我說
「做咩要去酒店嗰邊？係咪有救援？」其中一個穿名牌西裝的女子說
「唔係．．．我地係諗住嗰邊起碼有床瞓有涼沖．．．所以．．．」我說
「．．．係呢，我見你地推住啲嘢食．．．你地食左嘢未？依度幾間酒吧有好多嘢食，橫掂你地宜家都無咩辦法，不如一齊食啲嘢先？啱啱好我地都準備開餐。」軒哥說
「好呀好呀好呀！！」呂晨反應很大
我們把桌子放在一起，大伙一起用餐。
「好好味呀！！！邊個整架？？」呂晨邊吃邊說
「係我整嘅，我本身就係依間嘢嘅大廚。」一個肥胖的男子說
「我地白食你地嘅嘢真係唔好意思．．．我先自我介紹，我係阿強。」阿強說
「我係流主。掛住食嘢嗰位係呂晨。」我說
「我叫Brandy。」穿著名牌西裝的中年女子說
「我係阿立。」阿立說
「人人都叫我財神嘅，你地都咁叫啦。」肥胖的大廚說
「哇，我好得你個朵喎，點嚟架？」求撚奇反應大得把口水也噴出來了
「哈哈哈，因為我全名叫吳才申，所以個個都叫我財神。」財神說
「屌你正呀喂，我叫求撚奇。」求撚奇拍拍心口自豪說
「噗．．．你個名又點嚟？」軒哥也笑得把飯也噴了出來問
「求撚其啦。」求撚奇說
「邊有人用粗口做自己個名架，低俗。」Brandy說
「妳好撚好呀，拔甩地？」求撚奇說
「唔識英文出少句聲啦，死爛仔！」Brandy不肖地說
「我係Mike，佢係我女朋友Natalie。」衣著新潮的男子說
「你衣著好新潮喎，做邊行呀？」阿強說
「我做設計嘅，不過宜家開始失業囉。」Mike開玩笑說
「你呢，你唔講嘢嘅？」Natalie問勤力德
「吓．．．唔．．．我叫勤力德．．．」勤力德說
「好，大家都認識左大家．．．咁你地宜家計劃去朗豪酒店，我覺得依個諗法好好，不如我地都加入佢地。」軒哥問他的成員
「你痴線架？依度好地地，我地做咩要去冒險？」Brandy喝著紅酒說
「屌！香港人幾撚時有好地地過．．．」求撚奇說
「我同你講嘢咩？」Brandy說
「咁妳諗住喺度等死呀？」阿立說
「咁你地諗住落去送死呀？」Brandy說
「冷靜．．．咁如果我地過到去酒店，的確可以有更好更安全嘅環境．．．流主你地本身有咩計劃？」軒哥問
「其實我地都未諗到．．．所以先上嚟．．．」我說
「喂，你地靠唔靠得住架？」Brandy有點看不起說
「咁妳有咩高見？」阿立反問
Brandy沒有回答，只是喝著她的紅酒。
「其實就咁望落去睇，應該都有過百隻喪屍，我諗避開佢地耳目會係最好嘅方法。」阿強說
「喪屍？我真係無諗過會咁樣叫佢地．．．」軒哥說
「都係一句啦．．．Anyway，如果有一個方法唔引起佢地注意咁行動就最好，就算只係引嚟十零隻都已經好好。」阿強說
「但係佢地數量咁多．．．而且都喺晒廣場正中間．．．點避呀．．．」我問
「我又有辦法。」呂晨邊吃邊說
「請講．．．」阿強說
「扮！喪！屍！」呂晨說
我們都靜了一下．．．
「如果引開佢地呢？有無辦法？」阿立說
「室內好難引喎．．．」阿強說
「喂！你地無人理我！！」呂晨不忿說
「你地話引，其實係點引？搵人做餌？」財神問
「唔係，佢地對聲音好敏感，就算咩聲都好，佢地聽到，就會走晒過去。」我說
「不如咁啦，我地搭Lift去到三樓，三樓比起四樓實少好多喪屍，我地喺三樓穿過去，行電梯上返四樓；嗱，你地望下，我地會去左廣場嘅另一邊，之後再穿過間Café個露台就可以去到酒店。當然我地要手腳快啦，所以啲車仔我地唔要，嘢食嘢飲大家一人揹啲，其實唔難．．．」勤力德再次獻計