樓下有喪屍: Act 12 曙光的終點
「嗰度係．．．長沙灣警署．．．點解啲喪屍迫晒喺嗰度．．．？連個露天車場都迫滿晒．．．」財神問
「唔．．．唔通係．．．槍聲？會唔會係啲差佬喺嗰度開槍射喪屍．．．啲喪屍聽到槍聲就愈聚愈多．．．你知啦，啲議員話差佬學歷低，有槍喺手好危險呀嘛．．．」我猜說
「好有機會係咁．．．不過佢地離我地都幾遠下．．．應該唔怕嘅．．．我地只要靜靜咁行，佢地唔會理我地嘅．．．」財神說
「咁多喪屍落車行？？喂，你地唔好咁樣得唔得呀？一早聽我講留喺朗豪坊咪好囉！！」Brandy激動說
「．．．咁妳宜家行唔行呀？」我不耐煩說
我們下車，急步沿著馬路向前行，走過數十輛車後，我們看到一輛大型警車！
「警車上面可能有槍嗰啲嘢我地可以用，過去睇下！！」我說著並走到警車前
但是車門都上鎖了．．．而車內卻空無一人．．．我只好用鐵撬把後門強行打開。可惜裡面卻空空如也．．．
「搞撚錯呀．．．」求撚奇抱怨說
「唉．．．又會咁黑嘅．．．算啦．．．就算有我地都唔識用啦．．．呂晨，前坐有無咩發現？」我問搜查前坐的呂晨
「．．．無呀．．．咩都無．．．」呂晨說
「咁算啦．．．我地走啦．．．」我失望地下車
此時，警車的警號突然響起了！！！！
「咩事？？？」我和財神看過去呂晨那邊
「對．．．對唔住．．．我唔小心撳到個制．．．點算．．．」呂晨十分著急
同時，遠處的喪屍都被警車聲所吸引，全部都開始走過來！
「撳返熄佢啦！！」財神說
「點撳呀？？？唔得嘅？？？」呂晨不斷按下被她碰到的按鈕
「算吧啦！！走啦！！」我立即下車
然而，身邊的車輛都突然湧出喪屍！！一些從車裡爬出來、一些從車輛後面來、更有一些從車底來！！我們一下子被完全包圍了！！莫說警署那邊的喪屍群也愈來愈接近！！！
「仆街！！依舖真係奶撚晒西！！」求撚奇邊殺邊說
「點算呀？？？？」Brandy十分著急
「流主．．．點好呀？？」財神邊殺邊問
「唔．．．唔好理啦，我地一路殺一路走啦，沿馬路繼續走！！」我邊殺邊說
我們不斷斬殺從車裡撲出的喪屍，一邊前進。雖然後方的喪屍並沒有追得很急，但就算已經超越了警車都仍然追著我們．．．而前方則不斷有喪屍湧出．．．我們都快沒氣力了．．．
「前面有個地盤！入去避下先啦！！」我指著路邊的地盤
「我著高踭鞋點爬呀？？喂！！！」Brandy說
我們沒有回應，都全速跑過去，爬過圍欄躲進地盤，Brandy也只有無奈地跟著我們，勉強爬過圍欄．．．幸好地盤裡，只有數隻喪屍，我們把它們清理掉，便立即躲進一個貨櫃寫字樓．．．
「啲喪屍應該搵我地唔到嘅．．．宜家唯有等架警車收聲．．．我地先可以出返去．．．」我說
「但係等到幾時．．．」呂晨問
「應該唔會好耐掛．．．始終架車唔係行緊．．．應該好快無電．．．」財神說
「唯有就係等嘅者．．．」我說
「最麻煩都係妳呀！！咁鬼論盡就咪學人走上車啦！！！都唔知妳係咪有心架！！」Brandy對呂晨惡言相向
「妳好囉喎！我地一直都保護妳，妳就依樣嗰樣！呂晨都唔係有心啫！妳使唔使咁嘅態度呀！！」我看不過眼說
「啊，你地保護我？咁我使唔使多謝你地呀？？係你地夾硬話要去乜鬼嘢酒店先搞成咁架！好心流主你就成熟啲啦，宜家唔係玩遊戲打機呀，挑戰高難度呀？你啲朋友死晒，你都有責任架！．．．你地啲後生就係咁，有問題、有差錯就淨係埋怨外界，唔識好好自己反省下。人地好心提你啦，你就覺得人地事事針對你，唔肯聽下人意見，唔會話．．．」Brandy連珠爆發
「妳好撚嘈。」求撚奇突然輕輕用手指按住Brandy的嘴巴，低聲地說
「．．．咩．．．咩喎．．．」Brandy竟然突然滿面通紅手足無措起來．．．
「唉．．．大家都唔好嘈啦，宜家咩環境？最緊要係大家團結．．．」財神說
於是我們都靜下來聽著警車聲．．．由緊張的氣氛變成鬆懈，再變成無聊．．．我們一邊吃一邊等．．．
「唔．．．」呂晨欲言又止
「做咩呀？」我問
「我．．．想去廁所．．．」呂晨小聲說
「忍下先啦．．．最好等警車聲無左先．．．」我說
此時，警車的警號聲真的停止了！！
「係咪我聽錯．．．定我已經聾左？」財神說
「好似堅係停撚左喎。」求撚奇說
我們慢慢離開貨櫃式寫字樓，呂晨和Brandy立即走到不遠處的流動廁所解決．．．我們男的則隨便找個地方解決．．．
「好啦．．．應該安全架啦，我地上返天橋行葵涌道去青衣啦。」我說
我們小心翼翼地避過遠處喪屍的耳目，沿著路走，終於看到車龍的盡頭了！我們走到最前面的一輛車，可惜依然是開動不了．．．我們搜查了數輛車，全都是沒油或是沒電．．．我們只有繼續步行．．．所有沿路看到的車都續一嘗試．．．但是結果都一樣．．．看來除非車輛是已經完全停止並關掉了引擎．．．否則這麼過了兩天．．．沒油沒電並不出奇．．．受著這些打擊．．．我們累得什麼也沒有說．．．不經不覺，天色已經昏暗了．．．
「依度係邊度．．．」呂晨沒力氣問
「葵青路．．．」我說
「前面巴士站有架車．．．我過去試下．．．」財神說
我們沒有回應他，只是不斷前進．．．就在我們都不抱期望的時候，這次竟然成功了！！！我們都立即跑上車！
「好嘢！！！」呂晨十分歡喜
我們也都鬆了一口氣，求撚奇喝了一口水，立即便開車前往碼頭。
「仆你個街，我求撚奇命大！我同你地講，如果再塞車呢我就切柒！」求撚奇自信滿滿
不過好景不常，很快我們真的又遇到堵塞的車輛了．．．
「屌咩．．．」求撚奇說
「已經好好架啦，我地已經入左青衣島，依邊沿路行落去，半個鍾左右就去到碼頭！」我說
「你好熟路喎。」財神問
「當然啦，我住青衣架嘛。」我說
「原來係你環頭．．．失撚敬！」求撚奇說笑
半小時後，我們終於走到碼頭所在的工廠街，遠處已經可以看到有燈光和不少人聚集。