樓下有喪屍: Act 13 殘酷的命運

「太好啦．．．終於都得救啦．．．」財神說

「哈哈．．．」求撚奇也鬆了口氣

「唉．．．總算無事啦．．．」Brandy說

「太好啦．．．」呂晨說

歷盡艱辛，終於找到救援了．．．真是百感交集．．．失去了父親．．．朋友．．．不過也得到了一個很好的人生經驗．．．也交到了很值得信賴的朋友．．．還有一個女朋友．．．





「依度都有幾十人．．．估唔到都仲有咁多人生存．．．」財神說

我們坐在一旁休息，等待上船離開。同時間，聚集的人也愈來愈多，在場有數個警察在維持秩序，並要求大家保持安靜．．．也有一些工作人員派發糧食和飲料．．．

「唔好意思，我想同你地登記一下，你地叫咩名？」工作人員說

「我叫流主。」我說

「我叫呂晨。」呂晨說





「我叫吳才申。」財神說

「我叫求．．．梁文奇。」求撚奇說

我們都偷偷笑了一下．．．梁文奇．．．良民奇．．．求撚奇哪裡是良民了．．．

「小姐呢？」工作人員問Brandy

「．．．Brandy。」Brandy說





「呃．．．唔好意思呀，我地要中文全名．．．」工作人員說

「．．．．．．朱曦．．．」Brandy說

「噗．．．．．．哈哈哈哈！！」我們都大笑起來，連工作人員都忍不住笑了

「點啫！！有咩好笑啫！！！」Brandy惱羞成怒

這時有一個應該是發起人的消防員站出來，沒有使用任何擴音系統說。

「我好欣慰見到仲有咁多生還嘅人，我地唔知今次究竟發生左咩事，亦唔知有咩解決嘅方法，我地可以做嘅，就係用我地嘅船，送大家去安全嘅地方。雖然我地每次只可以接載二十人，唔包括船上既工作人員，而經過我同事點名，依度有一百三十四人。但係放心，我地會來回接送，直至將所有人送走，警察亦會喺度保護大家，所以大家唔使緊張，大家已經安全架啦！．．．咁宜家請根據工作人員指示排隊。」

大家也依照工作人員指示排隊並慢慢上船，不過，進度比想像中慢，因為每個人都要接受醫護人員的嚴格檢查．．．

「我諗我地要搭下一架。」財神仔細數著





此時，後方突然傳來了一下尖叫聲！全部人都嚇得向後望，工作人員也立刻過去查看．．．但是，後方的人逐漸開始緊張，更開始有人迫向前！！

「咩．．．咩事．．．」Brandy問

人群愈來愈混亂，即使工作人員嘗試把人群控制，都依然徒勞無功．．．突然，後方再傳來數下槍聲！！這把所有人都嚇壞了！所有人都不顧一切跑向消防船！！呂晨也立即跟著跑！我們見狀，也只有跟著她。然而，前方的人群已經迫住了，我們根本上不了船！！此時後方又再傳來慘叫聲！！

「有喪屍呀！！！！」

不知道是誰在大叫著！！人群你推我撞，不斷向船迫過去！！！就在我們快要到船上時，船竟然開出了！！有些人立即跳上船逃生，有些人則被推了下海！被迫到一邊的我們根本就跳不過去．．．我向後看，原來不知何時後方已經聚集了很多喪屍．．．有的還是「新兵」！由於船已經開出，很多人都在大叫著，喪屍群也變得更加兇猛！！

「我地點算呀？？」財神問

「散水啦！！無船搭我唔撚識偷渡呀宜家！！！」求撚奇說





「呀！！！！！」此時，Brandy被一隻喪屍捉住了！！

「你老母個臭西呀！！」求撚奇立即上前幫手，但是，喪屍愈來愈多，求撚奇和Brandy都被喪屍群淹沒了！！！

「求撚奇！！！」我立即用鐵撬攻擊，但是喪屍的數量已經多得不是我能應付

「走啦！！！」財神拉著我

「屌！！！」我忍著淚水轉身就跑

可是，我們的後方也有一堆喪屍，我們進退兩難！這時，我看到不遠處有一道鐵閘，看來是離開消防碼頭的後門！

「我地走嗰邊！！」我拉著呂晨和財神說

我們拼命逃跑，但是後方還是有數隻喪屍窮追不捨！眼見快到鐵閘了！





「呂晨妳過去先，我同財神殺左後面啲喪屍先！」我轉身用鐵撬打向追上來的喪屍

幸好只有數隻喪屍，我們還可以應付得來。處理完了我們便轉身離開，卻發現．．．

「呂晨．．．？」我呆著了．．．

我隔著被牢牢關上的鐵閘看著呂晨．．．

「呂晨．．．妳做咩．．．快啲開門比我地．．．」我不敢相信地說

「對唔住，後面咁多喪屍．．．一定要有人做餌．．．」呂晨說

「呂晨？．．．妳．．．」財神也不敢相信





「．．．妳唔好玩啦．．．開門啦．．．」我依然不願意接受呂晨所說的話

「唔怕話你知．．．你真係好天真，其實一開始我已經呃左你．．．我地喺燈飾舖相遇，我話我朋友突然間比人咬．．．依啲．．．全部都係大話。真相係．．．我地由港鐵站不斷咁逃走，我同我男朋友走左入燈飾舖度暫避，但係D喪屍已經追到上嚟．．．結果，我將我男朋友推向喪屍．．．等我有時間逃走．．．」呂晨說

「咁．．．妳都係迫於無奈啫．．．」我不能相信

「你以為喺朗豪坊嗰度，Mike同Natalie點解無跳落嚟呀？就係因為我將Natalie推向喪屍度，我先可以慢慢安全咁跳落嚟。」呂晨說

「呂晨．．．」我不知道該如何反應

「宜家，情況都一樣。」呂晨竟然從背包中掏出一把手槍！！

「妳．．．妳幾時．．．」我不敢相信呂晨竟然用槍指著我

「咪就係喺警車度拎囉。」呂晨說

「妳．．．妳想殺我．．．？妳唔係．．．鍾意我嘅咩？？」我哭著說

「所以話你天真，我只係見邊個生存機會高，我就痴邊個．．．你．．．唔好話我要犧牲我嘅身體．．．我連錫你都唔使．．．就呃到你貼貼服服，樣樣嘢都維護我．．．我都估唔到。」呂晨說

「妳使唔使咁過分呀？無必要咁樣出賣我地啫！妳自己一個，妳又走得甩咩？」財神憤怒說

「咁就先送你一程，比機會你同你老婆佢地重聚。」呂晨說著，竟然向財神的胸膛打了一槍！！

「財神！！！」我立即扶著中槍跪在地上的財神

「再見啦，頭先嘅槍聲已經引嚟唔少喪屍。佢地會因為槍聲而追殺你．．．我就可以無驚無險咁離開．．．我係你就諗下辦法點走啦。．．．不過點都無所謂啦，結果都係一樣．．．係咁啦．．．男朋友。」呂晨說著便轉身離開

「我憎死妳！！！妳條死八婆！！我做鬼都唔會放過妳！！！！」我吼叫著

「你做完喪屍先講啦。」呂晨轉身過來向我微笑了一下，然後便悄悄拋下我們離開了．．．

這時,身後傳來喪屍的呻吟聲，我回頭看，它們已經把我和財神包圍住．．．看來我們真的窮途末路了．．．