樓下有喪屍: Act 15 武器
雖然經歷了三天恐怖的逃亡，但是我依然是後知後覺地不知不覺睡著了．．．
「你．．．起身啦？．．．對唔住．．．我已經兩日無食過嘢．．．所以食左你背囊入面啲嘢．．．不過仲有淨架！我無食晒架．．．」她走過來說
「唔緊要．．．對唔住．．．」我低下頭說
「我都多謝妳救我．．．無你．．．我可能要喺依度餓死．．．」她說
「．．．我唔會再搞妳，對唔住．．．我真係一時失控．．．．．．但妳放心，我會同妳一齊走！」我說
「知道左你嘅事．．．我覺得情有可原嘅．．．」她說著並給了我一支水
「唔該．．．係呢，我叫流主，妳叫咩名？」我說
「原來你叫流主，我叫Apple。」她說
「我英文名叫Samsung。」我開玩笑說
「嘻．．．你仲有心情開玩笑．．．我叫Apple係因為我叫阿萍，細細個已經有同學叫我萍果妹，所以先叫Apple架。」她說
「哈哈，幾得意，我其實無英文名嘅。話時話，妳點解會喺度嘅？」我說著，並拿了一些食物
「我係喺附近診所返工嘅，前幾日電視突然有特別新聞報導講話旺角好亂，但係唔知咩事．．．原本都仲好地地，之後夜晚差唔多閂門嗰陣，突然間有個痴線佬入嚟亂咬人！我地好驚，之後咪打電話報警囉！但係又無人聽喎．．．點知比佢咬到嗰啲人都痴埋線咬其他人！我驚啦，咪同醫生喺後門走．．．但係一出到街原來四圍都係個啲食人怪物！我即刻跑嚟差館，嚟到已經唔知醫生去左邊．．．而且依度已經無晒人．．．但係出面都仲有怪物嚟緊，我見依間房開住門，咪走入嚟避下．．．之後我都唔知過左幾耐啦．．．我又唔敢出去，好彩依度有個廁所咋！」她說
「辛苦左妳．．．一個女人．．．捱幾日餓．．．」我說
「為左我個女．．．我係唔可以死．．．我雖然喺依頭返工，但係我個女喺我媽度住．．．佢地都係住喺香港個邊．．．我尋日睇依度個電視講話香港嗰邊無事．．．所以我一定要過去．．．」她說
「原來係咁．．．好啦，我會幫妳。」我說
「咁我地宜家要點做？」她問
「我地要先搜索下依個差館，最重要係搵槍械庫同藥物。之後我地就要睇下去邊度搵船過海。」我說
「但係．．．出面好多怪物喎．．．」她緊張地說
「唔怕，我對付到佢地。」我說
我們搜索這個房間，找到了一個櫃子，裡面都放著警察的制服，Apple立即換上了。我們推斷槍械庫很大機會會在地庫，因為接近停車場，方便警察出動。於是我們便決定下去尋找．．．我們選擇走樓梯下去，到了地庫，這裡是一條長走廊。果然，真的讓我們找到槍械庫，可是我們卻沒有進入的鎖匙，而且它好像是要用鎖匙和匙卡才可以打開．．．
「睇嚟都係要搵．．．但係差館咁大都唔知要點搵．．．」Apple說
「其實唔難，揸匙嘅人一定喺附近。就算遠都一定喺依一層，如果唔係有突發事嘅時候先去搵鎖匙開門就論盡。」我說
「又係喎．．．」Apple說
我們仔細搜索這裡的所有房間，但是不要說人，連喪屍都沒有一隻．．．怎麼會有保管鎖匙的人出現．．．這時，我們來到了一個更衣室。
「啲Locker可能會有！」Apple說
我立即用鐵撬把Locker續一打開，最終找到了一張匙卡和二十多條鎖匙．．．我們回到槍械庫，用匙卡在門邊的讀卡器上刷了一下，讀卡器上的紅燈馬上轉成綠燈。
「鎖匙就等我嚟啦！」Apple說
她隨便拿起一條鎖匙開門，十分意外地竟然第一條便打開了！
「妳又知嘅？？」我問
「我估架咋！我條命係咁架，大獎唔會輪到我，但係依啲小事上往往我都好好彩！」Apple笑著說
看到她的笑容，我心裡突然不禁想，昨天晚上我還打算強姦妳了，現在妳對我好像已經完全沒有戒心一樣．．．是妳太單純．．．還是．．．妳太陰險．．．
我們一進門，便立即被眼前的畫面把我的疑慮都拋諸腦後．．．這裡．．．什麼都沒有．．．跟我預期中像電影般放滿了彈藥和各式不同槍械的畫面完全不同．．．
「唔．．．都話大獎唔到我中．．．」Apple苦笑著說
「其實都正常嘅．．．發生啲咁嘅事，警察一定會動用所有軍火．．．我應該一早估到先啱．．．」我說
既然都進來了，便隨便搜索一下吧．．．可惜，果然真的完全被清空了。
「咦？有呀有呀！」Apple說
我走過去看，是三把手槍！雖然我對槍械沒有認識，但它們看上去都是同一個型號。然而，管它是什麼槍，此刻，有槍就行了！我們也在Apple發現手槍的櫃裡找到數個皮帶槍袋，我們都帶上了並讓Apple也保管一把手槍。雖然這做法有點冒險，但我直覺覺得她應該不會害我的．．．大概．．．
「其實都唔知用唔用得著，我都唔識開槍。」Apple說
「我都唔識．．．或者我地應該試下．．．」我說
我們走到槍械庫旁邊的練靶場學習如何用槍，想不到這裡的牆上都貼了一些教學的海布，我們跟著海布的步驟嘗試．．．
「好似好簡單．．．拉下擊鎚後扳．．．扣扳．．．哇！！！」我說著便開了一槍！
想不到跟電影中的完全一樣，十分簡單．．．反動力也比想像中小，難怪香港警察都用它．．．也難怪呂晨這麼簡單便．．．．．．
Apple也急不及待試槍．．．「砰！」她幾乎嚇得把槍也掉了．．．
「好痛．．．手指公好似整到．．．」她痛得單著眼說
「無事呀嗎．．．？我諗如無必要都唔好用槍啦．．．子彈唔多，又大聲．．．如果唔係差館無喪屍我都唔會試槍．．．」我說
我們搜索了一番，找到了數十顆子彈。
「咁嚟緊去邊？」Apple問
「唔．．．搵架車先，之後去我屋企，我就住喺附近，到時再決定點過海啦。」我說
我們離開練靶場，走到後門前往地下停車場，豈料一打開門，停車場內竟然有大量喪屍！