樓下有喪屍: Act 16 黑暗的先兆
「哇！咁多嘅！？點算呀？」Apple大驚
「頂．．．掉頭啦！」我說著立即拉著Apple逃跑
我們沿著下來的樓梯回到警局大堂，卻竟然連這裡都有喪屍了！而且有些看起來身體還很「健全」，可能是由碼頭那邊過來的。我拉著Apple從正門跑出警局，想不到街上又再佈滿了喪屍，雖然情況比不上旺角那麼混亂，但是已經不是能輕輕鬆鬆的局面了．．．
「我住上面青梅樓咋，妳應該都識路架啦！我地邊殺邊走，有威脅嘅先殺，遠嗰D就唔好理佢地，仲有千祈唔好開槍！」我說
「吓．．．啊．．．嗯！」Apple跟著我走
我們一直跑，來到一個丁字馬路口。只要再沿旁邊的樓梯跑上去，就會到達我所住的大廈。
「哇．．．嗄．．．嗄．．．唔得啦．．．歇一歇先．．．頂唔順啦．．．」Apple扶著欄杆喘氣
「我地停低會好危險架喎．．．」我扶著她說
「宜家我地喺樓梯中間．．．上面又無喪屍．．．佢地上樓梯應該都無我地咁快．．．抖陣先啦．．．」Apple說
我環顧四周，的確喪屍數量比剛才警局那邊少，而且這個位置沒有死角，算是安全吧。
「咁．．．好啦，妳坐下先啦，．．．嗱，飲啖水先啦。」我遞給Apple一瓶水
「唔該．．．哇．．．你咩構造架．．．揹咁多嘢．．．又跑樓梯．．．你唔識攰嘅咩．．．」Apple苦著臉說
「ok啦．．．我本身係幾好氣嘅．．．」我笑說
「後生真係好．．．」Apple說
「．．．妳都唔係好大年紀啫。」我喝了一口水說
「我三十九歲啦，仲唔夠大呀？」Apple說
「哇．．．咁真係睇唔出．．．我以為妳頂多咪三十多少少．．．」我客氣地說
「嘻．．．你真係識氹人，呂晨執輸．．．呃．．．Sorry．．．」Apple衝口而出
「．．．唔緊要啦。」我說
我們沿路走到昇降機大堂，這裡只有一隻喪屍和數具老人的屍體．．．
「哇．．．殺左佢殺左佢．．．」Apple捉著我說
「．．．不如妳試下？」我說
「吓？點解呀．．．？」Apple說
「妳總要習慣下．．．佢地唔係人．．．佢地攻擊我地係唔會猶豫．．．」我說
Apple雖然不太情願，但還是拿著警局找到的警棍，小心地走到喪屍前．．．
「．．．哎呀．．．呀！！」Apple打了它的頭一下便立即跑回來．．．但喪屍並沒有受到太大傷害．．．
「唔．．．算啦．．．下次先啦。」我無奈說
「咁．．．警棍要嚟打人，唔係打喪屍架嘛．．．我又唔係警察．．．」Apple說
我拿著專用的鐵撬向喪屍走過去，突然，地上的死屍一手捉著我的腳，更一口咬向我的小腿！！我嚇得使力一下把它的頭顱敲破！幸好我沒有被咬傷．．．為免夜長夢多，除了那隻會走的喪屍，地上的屍體我都統統把它們的頭顱打破。
「我仲以為D屍體係已經死左．．．」我說
「如果我無估錯，可能係因為佢地本身係老人家．．．身體虛弱，甚至行動都有問題．．．所以先會爬喺地下．．．」Apple說
我們走進昇降機，很快便到達我所住的樓層。
「依度就係你屋企啦？」Apple說
「係呀，入去啦。當自己屋企得啦。」我續說「雪櫃有嘢飲，妳自己嚟啦。我用電腦上網睇下咩情況先。」
我沒有理會Apple，我搖動了一下自己電腦的滑鼠，電腦便由待機狀態回復過來。
「嗱，你都飲D嘢啦。」Apple遞給我一包紙包飲品，續說「咦？你好乖喎，專登開個File叫Studies，你一定好勤力啦！」
「使乜講．．．」我怎會告訴她這個有2 TB的Studies文件夾實際上是放什麼．．．
正當我打算上網尋找線索的時候，電腦卻突然自己關掉了！不．．．這種寧靜的感覺．．．是全屋的電器都關掉了！
「啊？唔通．．．停電？跳制？無可能架．．．」我嘗試開動任何電器
我走到電箱前，打開電箱一看．．．所有的按鈕都是ON的狀態．．．我再走到鄰居的家看看．．．原來鄰居的情況也一樣！
「大獲啦依舖．．．」我回到自己家說
「咩事．．．？」Apple問
「我估．．．全九龍新界都停電．．．發電廠可能已經淪陷．．．」我說
沒有了電力，我們就不能得到外界的消息．．．也不可能聯絡外界．．．
「咁．．．手機呢！」Apple拿出自己的手機
「係喎．．．無電．．．」我拿出手機一看
「我都係．．．」Apple說
「唔．．．辦法再諗啦，除左電．．．」我說著並走到廚房
我扭開水喉和打開煤氣爐，果然．．．沒有電，水和煤都不行了．．．
「唔．．．宜家天又開始黑．．．我地一係喺度過一晚先，聽日再打算？」Apple說
「都好嘅．．．」我說著，走到門外
因為我所住的大廈是井字結構，所以從門外可以看到整個大廈的所有單位．．．此時我發現下一層正對面其中一個單位有兩個男子走出來！
「竟然有人！！」我驚喜說著，立即用電筒照過去，因為大廈已經停電，電筒的光十分明顯
那兩個人也向我看過來．．．我向他們示意要他們上來．．．數分鍾後他們果然上來了。他們看來都是年輕人，應該是中學生吧？
「哎呀．．．竟然仲有未死嘅人．．．太好啦。」其中一個男子說
「你地點解會喺度嘅？」Apple走出來
「啊．．．原來仲有．．．仲有其他人，我地係喺附近既中學逃走過嚟，已經幾日啦。你地係差人．．．？」其中一個男子看著Apple身穿的警察制服說
「吓？唔係．．．之前件衫爛晒，所以著住先啫。」Apple說
「有生還者係好事嚟嘅，我叫流主，你地呢？」我說
「我叫基仔，佢係我同學叫善良。」其中一個男子說
「咁得意嘅個名．．．我叫Apple。你地住喺度架．．．？」Apple說
「唔係呀，我地見出面咁多喪屍，依度又無人，咪搵間屋住住先囉。」基仔說
「你地有無嘢食呀．．．我地已經有一段時間無食嘢啦．．．」善良說
「你地入嚟啦，我地有嘢食！」Apple很好客
「咁我地上緊堂，突然就話有緊急情況，不過同消防演習唔同，老師叫我地鎖好課室門窗，唔好離開．．．之後老師就走左．．．個個都諗住唔使上堂好開心啦，點知突然聽到老師尖叫，個個同學都嚇到出唔到聲，我地咪開門裝下咩事，原來成間學校都係喪屍！有D仲係我地D同學．．．個個一驚就亂咁走．．．我同善良反而唔係好驚．．．我地仲推D喪屍落操場．．．但係佢地愈來愈多，我地就喺學校匿埋．．．不過過左一段時間，我同善良仲有幾個同學覺得唔係辦法，就決定離開學校．．．可惜最終得返我同善良．．．」基仔一邊吃一邊說
「原來係咁．．．你地咁細個就經歷依D嘢．．．真係可憐．．．」Apple說
我們吃著吃著，食物終於見底了，始終我們原本就只有不多的食物，現在要分給四個人，不夠也不足為奇．．．