<真人真事> - HKU的留學生活: 第一天

第一晚我幾乎每半個鐘就扎醒一次. 我好驚我個同房會無啦啦走入嚟，而我又未清楚佢係一個咩人.

但似乎我既同房係返咗鄉下，住咗幾日都未見佢蒲頭. 所以嗰幾晚我都冇咩點再扎醒. 

今日係Crystal 落機既日子. 因為佢係香港有親戚嚟接佢機，所以我去咗堅尼地城度走一趟.

堅尼地城其實比我想像中係少咗一份熱鬧. 比起西環，堅尼地城無奈係少咗一啲有香港特色既地點. 所以我行咗一個鐘頭之後又走返去西環嗰邊.  

行行下我望到自己隻錶，嘩，原來己經兩點幾. 於是，我message 咗Crystal 睇下佢係唔係己經到咗佢要住既地方. 





我："你到咗你要住嗰間唐樓啦？" 

C: "啱啱到咗喇. 依家汁緊野，做咩呀?" 

我："冇呀，我咁啱係附近. 睇下可唔可以上嚟參觀一下你住嗰度. 順便探下你." 

C: "依家？"

我："啊...係呀. ok 嘛？" 





C: "喔. 我住22樓. " 

我："哦.咁我上嚟啦." 

C: "ok." 

其實Crystal 住既嗰棟唐樓都幾隱蔽吓. 因為有分幾多座既關係，我要經過幾條冷巷先至見到個出入口.

入到去，個保安問我去邊層. 我話係嚟探朋友. 然後，佢就見怪不怪地俾我過去搭lift.

跟住我入lift既仲有一男一女， 而呢對男女既年紀應該同我差不多. 從衣著打扮睇嚟，男既比較似一個mk仔，而女既就好似一個abc.

過咗冇幾耐，我聽到個男仔開始用港式英文同個女仔講野.  

男： "呢一層都住咗好多同你一樣咁既交流生. 我今日先帶咗幾個女仔上去. 如果你有咩問題都可以搵我. 我呢個buddy無任歡迎." 

女："咁你平時係唔係度做呢D野㗎？" 

男："有時Office叫到我去未做囉. 咁呢啲都係我嘅份內職責." 

我心諗，嘩，乜Kong u有啲咁筍嘅工咩？佢地嘅份內職責基本上係識好多唔同既ABC女.如果啲交流生要幫忙嘅話，第一時間諗到既話唔定就係呢位帶佢上房嘅社工.

所以話，讀書可以為你帶來既機會其實係多不勝數.就算呢份係無人工嘅我諗應該都會有好多人爭住去做. 

22樓呢個樓層總共有有三個單位，而我就憑着Crystal比我嘅地址去搵佢. 當我行到去門前既時候，佢剛剛正好打開楝門.  





我："hi" 

C: "hi" 

因為同佢有一排冇見既關係，我不期然地對佢上下打量一番. 著住鬆身既上衣加淺色小短褲既佢，雖然衣著充滿夏日氣息，但仍摭擋唔到佢因為時差問題而導致既疲累. 

我："你啱啱落機感覺如何呀?" 

C: "ok啦. 有少少jetlag 咁囉."

 我："點解你好似悶悶不樂咁既." 

C: "你過嚟睇下我間房先再講啦." 





當然，作為一個正常男人既我,我承認當時我有啲莫名奇妙既興奮.  但當我見到佢間房實在係連打飛機都冇地方既時候，我真係當堂謝哂. 

Crystal: "點呀？同你間房有冇得比？" 

我心諗，應該點搭佢好呀？唔通話比佢聽我間房仲大過佢嗰間，唔使訓上下格床而且仲對住個無敵大海景呀？  

其實我真係有一絲衝動想同佢講話不如搬過嚟同我住， 但我地只係普通朋友，呢啲說話又點講出囗呢？ 

我望望佢間房，跟住話："唔...香港啲樓唔嬲都係咁細架啦. 你起碼都有個廳可以活動下. 你租幾錢一個月呀？" 

Crystal: "三千蚊" 

嘩 hi. 三千蚊一個月？？？我成五千幾蚊住成個學期喎.  

我："咁起碼都平過我地係外國租既嗰啲apt. 話時話喇，你搞掂哂啲表格未呀？" 





C: "未呀. 我諗住聽日去." 

我："不如嚫我有時間，我帶你去交表順便參觀一下間大學啦." 

C: "咁等我拾埋啲野再出去啦." 

在這個夏日炎炎既天氣裡，我同Crystal由水街步行至global lounge. 見到佢啲汗水由額頭流到去面頰，我開始有啲怪自己.  

怪就怪在明知佢今日落機都唔叫佢好好休息吓. 怪就怪在末可以情人既身份去憐惜佢... 

我從身旁既販賣機嘟咗兩罐Pocari. 然後遞咗罐俾佢. 

"Crystal,請你飲㗎." 





C: "咦？呢隻未飲過喎. 咩嚟㗎？" 

我："好似Gatorade 咁㗎. 呢隻牌子係香港都幾出名下." 

C: "多謝啦." 

見到Crystal飲緊我俾佢既嗰罐Pocari, 忽然令我想番起當年我同佢仲係大學一年級生既時候.  

我記得嗰陣好多hallmates 會選擇報讀同一班，而我就剛巧有兩班都同Crystal 一樣. 因為嗰日佢同房走堂既關係，所以去另外一間課室既嗰段時間就只得我同Crystal 一齊行.

我就同Crystal提議話不如去飮杯野. 

～ 

"嗰個好似幾好味" 

我："邊度呀？睇唔到喎." 

C: "嗰度呀. 我好想買杯試下." 

其實我唔係好記得佢叫嗰樣野係咩名，因為到我想試返既時候Starbucks 就已經冇再出嗰樣野.  

我只係記得有一片片既香蕉放在啲brûlée 上面，然後Crystal佢食完之後嗰份好滿足既表情.  

～

我同Crystal逗留咗係global lounge 一陣，然後由梁銶琚一路行到去Su can.

我仲記得當時已經係晚上七點幾，而且Crystal 話有啲攰，所以我就送佢返宿舍. 

行到水街一半，我突然醒起Crystal 成日都只係食咗個飛機餐. 

我："你肚唔肚餓呀？不如我地求其搵間餐廳食啲野囉." 

Crystal: "唔. 你話事啦." 

於是，我地求其去咗新X記旁邊既一間雲呑麵店度食. 我地叫咗兩碗麵，一碟油菜，加兩杯豆漿. 但食食下先發覺原來仲漏咗碟油菜. 

老闆娘覺得可能係因為我同Crystal全程都用英文溝通，令到佢落錯單. 所以佢同個師傅就開始有少少怨言.  

"都唔知點解係亞洲人面孔但都要用英文溝通" 

其實我同Crystal落單既時候已經係用廣東話講, 之後我同Crystal繼續傾計既時候先用英文對搭. 

事實上, 老闆娘咁樣做的而且確係令到我有少少尷尬. 原因係我帶Crystal嚟呢間店度食野. 而且，嗰次仲係我同Crystal 第一次一齊係香港度共享晚餐.  

我："今餐我俾啦" 

C: " No！咁點得㗎." 

我："你下次請返我囉." 

C: "唔得！麻煩你收咗佢啦." 

雖然我見到Crystal佢企得好強硬,但最後我都係以"下次請番我"呢個理由嚟敷衍佢.  

其實，依家諗返起，或者我嗰陣真係做錯咗. 我地又唔情侶關係，難怪Crystal 會咁抗拒我請佢食飯.

但當佢咁抗拒我請佢食飯既時候，其實我心裡面巳經出現了一小撮既裂痕.  

因為Crystal想買啲日常用品，所以途中我地停留咗係便利店度. 當我想幫佢拎野既時候，佢顯得有啲唔自然.  

我："咁重不如俾我拎到門口啦" 

到咗閘口之後，我將手上既野俾返Crystal，然後就同佢講再見.  

C: "好多謝你今日幫咗我咁多" 

我: "早抖啦" 

Crystal 充滿微笑地跟我講咗一聲晚安. 之後, 我就由水街一路行返上宿舍.  

期間，我不斷問自己，其實世界上有沒有緣份這回事? 從暗戀到放手，然後又因為巧合之下，我同佢在世界既另一邊遇上. 我以爲呢啲就叫緣份，而且所謂既緣份係會攝合我地. 但原來種種既巧合就只係為咗令我認清事實既真相. 

而事實上，Crystal 係唔會鍾意我.