超靈視雜誌社: 三章－上帝的手指（３）

完成 Candy 的採訪後，我和紡瑩便回到了雜誌社。時間是下午五點鐘，距離下班還有一個小時。
 
只不過到外面走一轉就已經汗流浹背，其實剩下的一個小時最適合就是呆坐在電腦前，甚至在冷氣機送出的微風中小睡一會，感受一下人類文明的偉大。
 
可是今天罕有地，杜霜虹女王仍然留守在辦公室內工作。有如鎮守在中央的不動明王，沒有給予我們偷懶的空間。
 
「阿翔，其實頭先 Candy 個 case 好難用黎做題材寫稿。」坐在旁邊辦公桌的紡瑩說：「首先如果 Candy 既預言失敗，咁就冇野值得報導；而萬一 Candy 既預言成真，我地用 Candy 既死黎大做文章既話一定會俾人鬧，會嚴重損害雜誌社既聲譽。」
 
「我都係咁諗。不過聽完之後唔理件事，自己又過意唔去。」
 




「所以阿翔你想繼續幫 Candy？」
 
「唔係……我冇咁既能力去幫人。」
 
事實上 Samantha 的死也讓我很內疚。我始終不是什麼大人物可以幫助到其他人。
 
我告訴紡瑩：
 
「但至少，我想知道成件事背後既真相。Candy 既想法實在太奇怪，我想知道原因。或者咁做唔係為左其他人，而只係為左滿足自己既好奇心。」
 




「哦，呢個係你既諗法。」紡瑩微笑著說。
 
「所以我想知道更加多關於 Candy 既事。就算佢冇家人冇朋友，但始終要係社會生活既話，就一定唔能夠避免同其他人有聯繫。我想知道係其他人眼中既 Candy 係一個點既人。」
 
「所以紡瑩你想調查 Candy 身邊既人。咁我就從另一個方向著手搵料啦。」
 
「咦，妳唔係話 Candy 個 case 唔可以用黎做題材咩？妳唔駛勉強幫手，我自己做都得架。」
 
「我話晒都係你既前輩黎架。所以幫後輩手好平常啫。而且我都想知道 Candy 其實係點諗。」
 




「原來係咁，多謝妳。」
 
「唔駛客氣。」
 
接著，紡瑩雖然沒有戴眼鏡，但還是用手指假裝托一下她的空氣眼鏡，把自己當成偵探小說裡面的主角。她問道：
 
「你仲記唔記得 Candy 話佢自己細個嗰陣有上電視？」
 
「嗯。妳知道係咩節目？」
 
「嘿嘿嘿，當然知道。一定係《靛藍兒童檔案》。係十幾年前左右，香港曾經有一段時間興起左 New Age 既熱潮。而《靛藍兒童檔案》就係當時一個好高收視既電視節目，專門搵一啲有超自然能力既小朋友上去做實驗。」
 
「New Age，好似幾年前都有聽過呢個 term。」
 
「本身潮流既野就係不斷重複架啦。我諗你聽過 New Age 係因為 2012 年 12 月 21 日既末日預言。記得嗰陣我仲係屋企溫書，諗住如果真係世界末日既話唔駛考試就好喇。」




 
「但係世界末日左之後妳就冇得食甜品架喇。」
 
「咁又係。」紡瑩猶疑了一會，說：「反正結果當日都係冇事發生。不過如果相信 New Age 既人，佢地會覺得 12 月 21 日就係新紀元既開始，即係『寶瓶座年代』呢。呢啲文化，同『靛藍兒童』一樣，都係 New Age 既思想。」
 
「我自己就覺得，呢啲野都係用黎呃神騙鬼。」
 
「就係所謂既『偽科學』，同占星術一樣。你唔可以證明佢啱，但又證明唔到佢錯。」
 
對，這就是我不喜歡偽科學的原因。你永遠不會知道它是對還是錯。就好像你看見一位美女，然後驚覺自己身處泰國一樣。是男還是女？這是一個問題。
 
紡瑩接著說：
 
「我會搵社長同電視台聯絡，睇下有冇當年節目既資料。」
 




「不過都成十幾年前，妳仲記得呢。我就完全冇印象有聽過呢個節目……」
 
「嗱、嗱，講明先，純粹係因為我鐘意研究超常現象既野，同年齡無關架！嗰陣我都好細個咩都唔知架！」
 
「我其實都係想講妳真係好鐘意研究超常現象啫……」
 
掛在牆上的時鐘不知不覺已經轉到六點正，剛剛分配好的調查工作亦只能留待明天開始。我跟紡瑩和女王道別後便離開了雜誌社，回宿舍準備晚飯。